Joshua 3

Ilonggo (Ang Biblia (1982))

← Chapter 2 Jump to: Chapter 4 →

1Nagbangon si Josue sing aga pa kag nagtaliwan sila gikan sa Sitim, kag nag-abut sa Jordan, sia kag ang bug-os nga katawohan sang Israel; kag nagpabilin sila didto sa wala pa sila magtabok.

2Sa tapus ang tatlo ka adlaw ang mga manugdumala nag-agi sa tunga sang dologan

3kag nagsogo sila sa katawohan, “Kon makita ninyo ang kaban sang katipan sang Ginoo nga inyo Dios kag ang mga sacerdote nga mga Levinhon nga nagadala sini, niyan magtaliwan kamo gikan sa inyo duug kag magsonod sini.

4Agud nga inyo mahibaloan ang dalanon nga dapat ninyo paglaktan, kay wala pa kamo makaagi sining dalanon tubtub karon. Apang sa tunga ninyo kag sini may antad, nga daw duha ka libo ka maniko sa takus; dili kamo magpalapit sa sini.”

5Kag si Josue nagsiling sa katawohan, “Magpakabalaan kamo; kay buwas ang Ginoo magahimo sa tunga ninyo sing mga kalatingalahan.”

6Kag si Josue nagsiling sa mga sacerdote, “Hakwata ninyo ang kaban sang katipan, kag magtabok sing una sa katawohan.” Kag ginhakwat nila ang kaban sang katipan, kag nag-una sa katawohan.

7Kag ang Ginoo nagsiling kay Josue, “Sa sining adlaw magasugud ako sa pagpakadaku sa imo sa itololok sang bug-os nga Israel, agud nga makahibalo sila nga, subong nag-upud ako kay Moises, sa amo magaupud ako sa imo.

8Kag sogoon mo ang mga sacerdote nga nagadala sang kaban sang katipan, ‘Kon mag-abut kamo sa bibi sang mga tubig sang Jordan, magdolog kamo sa Jordan.’”

9Kag si Josue nagsiling sa katawohan sang Israel, “Kari diri, kag pamatii ang mga polong sang Ginoo nga inyo Dios.”

10Kag si Josue nagsiling, “Sa sini makilala ninyo nga ang Dios nga buhi yara sa tunga ninyo, kag nga sobolon niya sing totoo gikan sa atubangan ninyo ang mga Canaanhon, ang mga Hethanon, ang mga Hevhanon, ang mga Pereznon, ang mga Gergesnon, ang mga Amornon, kag ang mga Jebusnon.

11Yari karon, ang kaban sang katipan sang Ginoo sang bug-os nga duta magatabok sa Jordan una sa inyo.

12Busa karon kuha kamo sing napulog duha ka lalaki gikan sa mga kabikahan sang Israel, sa tagsa ka kabikahan isa ka lalaki.

13Kag kon ang mga dapadapa sang mga tiil sang mga sacerdote nga nagadala sang kaban sang Ginoo, ang Ginoo sang bug-os nga duta, makapahuway sa mga tubig sang Jordan, ang mga tubig sang Jordan magahawa, kag ang mga tubig nga nagailig gikan sa ilaya magaponong sila.”

14Gani, sang nagtaliwan ang katawohan gikan sa ila mga layanglayang, sa pagtabok sa Jordan upud sang mga sacerdote nga nagadala sang kaban sang katipan nga nag-una sa katawohan,

15kag sang nag-abut sa Jordan ang nagadala sang kaban, kag ang mga tiil sang mga sacerdote nga nagadala sang kaban nakatusmog sa bibi sang tubig (ang Jordan nagaawas sa tanan niyang pangpang sa bug-os nga dag-on sang ani),

16ang mga tubig nga nag-ilig gikan sa ilaya nagdolog kag nagponong sing malawig kutub sa Adam, ang banwa sa luyo sang Saretan, kag ang mga nag-ilig pa ilawod nayon sa dagat sang Araba, ang Dagat nga Maasin, naghawa sing bug-os; kag ang katawohan nagtabok sa tampad sang Jerico.

17Kag ang mga sacerdote nga nagdala sang kaban sang katipan sang Ginoo nagtindug sing malig-on sa mamala nga duta sa tunga sang Jordan, kag ang bug-os nga Israel nagtabok sa mamala nga duta, tubtub nga ang bug-os nga pungsud nakatabok gid sa Jordan.

← Chapter 2 Jump to: Chapter 4 →