Joshua 18

Ilonggo (Ang Biblia (1982))

← Chapter 17 Jump to: Chapter 19 →

1Niyan ang bug-os nga katilingban sang katawohan sang Israel nagtingub sa Silo, kag nagpahamtang didto sang layanglayang nga tiliponan; gindaug ang duta sa atubangan nila.

2May nabilin sa katawohan sang Israel nga pito ka kabikahan nga wala pa makabahin sang ila panublion.

3Gani si Josue nagsiling sa katawohan sang Israel, “Tubtub san-o pa bala kamo magpabuyanbuyan sa pagsulud sa pagtag-iya sang duta, nga nahatag sa inyo sang Ginoo, ang Dios sang inyo mga ginikanan?

4Magpili kamo sing tatlo ka lalaki gikan sa tagsa ka kabikahan, kag ipadala ko sila, kag sila magatindug kag magalatas sa duta, kag magalatid sini sono sa ila panublion, kag magkari sila sa akon.

5Bahinon nila ini sa pito ka bahin, si Juda magpuyo sa iya ginsakpan sa bagatnan, kag ang panimalay ni Jose magpuyo sa ila ginsakpan sa aminhan.

6Kag latiran ninyo ang duta sa pito ka bahin kag dalhon ang paglatid diri sa akon; kag ako magapapalad nga sa inyo diri sa atubangan sang Ginoo nga aton Dios.

7Ang mga Levinhon wala sing bahin sa tunga ninyo, tungud nga ang pagkasacerdote sang Ginoo amo ang panublion nila; kag si Gad kag si Ruben kag ang katunga nga kabikahan ni Manases nakabaton na sang ila panublion sa tabok sang Jordan nayon sa sidlangan, nga ginhatag sa ila ni Moises nga alagad sang Ginoo.”

8Gani ang mga lalaki nagtindug kag naglakat; kag si Josue nagtulin sa mga nagkadto sa paglatid sang duta, nga nagasiling, “Lakat kamo kag maglatas sa duta kag maglatid sa iya, kag magbalik sa akon; kag ako magapapalad nga sa inyo diri sa atubangan sang Ginoo sa Silo.”

9Gani ang mga lalaki naglakat kag naglatas sa duta kag naglatid sini sa banwabanwa sa pito ka bahin sono sa tolon-an; niyan nagkadto sila kay Josue sa dologan sa Silo,

10kag si Josue nagpapalad nga sa ila sa Silo sa atubangan sang Ginoo; kag didto ginbahinbahin ni Josue ang duta sa katawohan sang Israel, sono sa ila mga bahin.

11Naggowa ang kapalaran sang kabikahan ni Benjamin sono sa ila mga panimalay, kag naggowa ang dulunan sang ila kapalaran sa tunga sang kabikahan ni Juda kag sang kabikahan ni Jose.

12Ang dulunan nila sa aminhan nga bahin kutub sa Jordan; niyan ang dulunan nagataklad sa luyo sang Jerico sa aminhan, niyan nagataklad pa kabakoloran nayon sa katundan; kag ang iya mga golowaan sa kamingawan sang Bet-aven.

13Ang dulunan nagaagi padolong sa Luz, sa luyo sang bagatnan sang Luz (nga amo ang Bet-el), nayon sa bagatnan, niyan ang dulunan nagadulhog sa Atarot-adar, paagi sa bukid nga yara sa bagatnan sang Bet-horon nga Naubus.

14Niyan nagapadayon ang dulunan kutub didto, kag nagaliko sa katundan nga bahin nayon sa bagatnan, kutub sa bukid nga yara sa atubang sang Bet-horon nayon sa bagatnan, kag ang mga golowaan sini sa Kiryat-baal (nga amo, ang Kiryat-jearim), banwa sang kabikahan ni Juda. Ini amo ang bahin nga nakatundan.

15Kag ang bagatnan nga bahin kutub sa ukbung sang Kiryat-jearim; kag ang dulunan nagapadolong nayon sa katundan, kag nagapadolong sa tuburan sang mga Tubig sang Neftoa;

16niyan nagadulhog ang dulunan sa ukbung nga bahin sang bukid nga yara sa atubang sang nalupyakan sang anak ni Hinom, nga yara sa nalupyakan sang mga Refaimnon nayon sa aminhan; kag nagadulhog sa nalupyakan ni Hinom, sa luyo sang mga Jebusnon nayon sa bagatnan, kag nagadulhog sa En-rogel;

17niyan nagapadayon nayon sa aminhan nga nagapadolong sa En-semes, nagapadolong sa Gelilot, nga yara sa tampad sang taklaran sang Adumim; niyan nagadulhog ini sa Bato ni Bohan nga anak ni Ruben;

18kag nagaubay ini padolong sa kilid nga tampad sang Araba nayon sa aminhan, kag nagadulhog sa Araba;

19niyan nagaubay ang dulunan padolong sa luyo sang Bet-hogla nayon sa aminhan; kag ang mga golowaan sang mga dulunan sa look nga naaminhan sang Dagat nga Maasin, sa ukbung nga nabagatnan sang Jordan: ini amo ang dulunan sa bagatnan.

20Ang Jordan amo ang dulunan sini sa nasidlangan nga bahin. Ini amo ang panublion sang kabikahan ni Benjamin, tungud sa ila mga dulunan palibut, sono sa ila mga panimalay.

21Karon ang kabanwaanan sang kabikahan ni Benjamin sono sa ila mga panimalay amo ang Jerico, ang Beta-hogla, ang Emek-keziz,

22ang Bet-araba, ang Zemaraim, ang Bet-el,

23ang Avim, ang Para, ang Ofra,

24ang Kepar-amoni, ang Ofni, ang Geba—napulo kag duha ka kabanwaanan pati ang ila mga minoro:

25ang Gabaon, ang Rama, ang Be-erot,

26ang Misfa, ang Kefira, ang Moza,

27ang Requem, ang Irpeel, ang Tarala,

28ang Zela, ang Elef, ang Jebus (nga amo, ang Jerusalem), ang Gibeat kag ang Kiryat—napulo kag apat ka kabanwaanan pati ang ila mga minoro. Ini amo ang panublion sang kabikahan ni Benjamin sono sa ila mga panimalay.

← Chapter 17 Jump to: Chapter 19 →