Joshua 7

Ilonggo (Ang Biblia (1982))

← Chapter 6 Jump to: Chapter 8 →

1Apang ang katawohan sang Israel naghimo sing paglapas sa napahanungud nga butang; kay si Acan, ang anak ni Carmi, ang anak ni Zabdi, ang anak ni Zera, gikan sa kabikahan ni Juda, nagkuha sa napahanungud nga butang; kag ang kaakig sang Ginoo nagdabdab batok sa katawohan sang Israel.

2Si Josue nagpadala sing mga lalaki kutub sa Jerico pa Ai, nga yara sa luyo sang Bet-aven, sa nasidlangan sang Bet-el, kag nagsiling sa ila, “Taklad kag lampitawi ninyo ang duta.” Kag ang mga lalaki nagtaklad kag naglampitaw sang Ai.

3Kag nagbalik sila kay Josue, kag nagsiling sa iya, “Dili pagpataklara ang bug-os nga katawohan, kondi magtaklad ang mga duha ukon tatlo ka libo ka lalaki kag magsulong sang Ai; dili pagpangabudlaya ang bug-os nga katawohan didto, kay pila lamang sila ka bilog.”

4Gani nagtaklad didto gikan sa katawohan ang mga tatlo ka libo ka lalaki; kag nagpalagyo sila sa atubangan sang mga lalaki sang Ai,

5kag ginpatay sa ila sang mga lalaki sang Ai ang mga katloan kag anum ka lalaki, kag ginlagas sila kutub sa atubangan sang gawang tubtub gid sa Sebarim, kag ginlabo sila sa dulhogan. Kag natunaw ang tagiposoon sang katawohan, kag nangindaw tubig.

6Niyan ginkusnit ni Josue ang iya mga panapton, kag naghapa sa duta sa atubangan sang kaban sang Ginoo tubtub sa gab-i, sia kag ang mga tigulang sang Israel; kag nagbutang sila sing yab-ok sa ila mga olo.

7Kag si Josue nagsiling, “Ay, O Ginoong Dios ngaa bala ginpatabok mo pa ining katawohan sa Jordan, sa pagtugyan sa amon sa kamut sang mga Amornon, sa pagdula sa amon? Kabay kuntani nga tuman na kami kag nagpuyo sa tabok sang Jordan!

8O Ginoo, ano bala ang isiling ko, sa tapus nga ang Israel nagtalikod sa atubangan sang ila mga kaaway!

9Kay ang mga Canaanhon kag ang tanan nga pumuluyo sang duta makabati sini, kag magalikup sa amon, kag magadula sang amon ngalan gikan sa duta; kag ano bala ang himoon mo tungud sa imo dakung ngalan?”

10Ang Ginoo nagsiling kay Josue, “Bangon ka, ngaa bala nga nagahapa ka sing subong?

11Ang Israel nakasala; ginlapas pa nila ang akon katipan nga ginsogo ko sa ila; nagkuha pa sila sang napahanungud nga butang; nangawat, kag naglikum, kag ginsimpon pa nila ini sa ila pagkabutang.

12Busa ang katawohan sang Israel indi makasarang sa pagtindug sa atubangan sang ila mga kaaway; nagtalikod sila sa atubangan sang ila mga kaaway, bangud nga nanginpinakamalaut sila. Indi na ako mag-upud sa inyo, luwas kon malaglag ninyo ang napahanungud nga butang gikan sa inyo.

13Tindug ka, pakabalaana ang katawohan, kag isiling, ‘Pakabalaana ang inyo mga kaugalingon sa buwas; kay amo ini ang ginasiling sang Ginoo, ang Dios sang Israel, “May napahanungud nga butang sa tunga mo, O Israel; indi ka makasarang magtindug sa atubangan sang imo mga kaaway, tubtub nga mapahilayo ninyo ang napahanungud nga mga butang gikan sa inyo.”

14Busa sa aga papalapiton kamo sono sa inyo mga kabikahan; kag ang kabikahan nga kuhaon sang Ginoo, magapalapit sono sa mga baranggay; kag ang baranggay nga kuhaon sang Ginoo, magapalapit sono sa mga panimalay; kag ang panimalay nga kuhaon sang Ginoo magapalapit sono sa tawo kag tawo.

15Kag ang madakpan nga may napahanungud nga butang sonogon sa kalayo, sia kag ang tanan nga iya, bangud nga ginlapas niya ang katipan sang Ginoo, kag bangud nga nakahimo sia sing kabuangan sa Israel.’”

16Gani nagbangon si Josue sing aga pa, kag ginpapalapit ang Israel sono sa ila mga kabikahan, kag ginkuha ang kabikahan ni Juda;

17kag ginpapalapit niya ang baranggay ni Juda; kag ginkuha ang baranggay sang mga Zerahanon: kag ginpapalapit niya ang baranggay sang Zerahanon sa tawo kag tawo, kag si Zabdi ginkuha;

18Kag ginpapalapit niya ang iya panimalay sono sa tawo kag tawo, kag ginkuha; kag ginpapalapit niya ang anak ni Zabdi, ang anak ni Zera, sa kabikahan ni Juda.

19Niyan si Josue nagsiling kay Acan, “Anak ko, ihatag ang himaya sa Ginoong Dios sang Israel, kag magtu-ad sa iya; kag isugid karon sa akon ang nahimo mo; dili ini pag-ililong sa akon.”

20Kag si Acan nagsabat kay Josue, “Sa pagkamatuud ako nakasala batok sa Ginoong Dios sang Israel, kag amo ini ang nahimo ko:

21sang nakita ko sa inagaw ang isa ka matahum nga takurong nga Babilonianhon, kag duha ka gatus ka siclo nga pilak, kag isa ka bilog nga bulawan nga kalim-an ka siclo ang kabug-aton, niyan ginkaibugan ko sila, kag ginkuha sila; kag yari karon, nalubong sila sa duta sa tunga sang akon layanglayang, kag ang pilak sa idalum sini.”

22Gani si Josue nagpadala sing mga manugbalita, kag nagdalagan sila sa layanglayang; kag yari karon, natago ini sa iya layanglayang kag ang pilak sa idalum sini.

23Kag ginkuha nila sila gikan sa tunga sang layanglayang kag gindala sila kay Josue kag sa tanan nga katawohan sang Israel; kag ginbutang sila sa atubangan sang Ginoo.

24Kag si Josue kag ang bugos nga Israel kaupud niya nagkuha kay Acan nga anak ni Zera, kag sang pilak kag sang takurong kag sang bilog nga bulawan, kag sang iya mga anak nga lalaki kag sang iya mga anak nga babayi, kag sang iya mga asno kag sang iya mga canero, kag sang iya layanglayang, kag sang tanan nga iya; kag gintaklad nila sila sa nalupyakan sang Acor.

25Kag si Josue nagsiling, “Ngaa bala nga gingamo mo kami? Gamohon ka sang Ginoo sining adlaw.” Kag ginbato sia sang bug-os nga Israel; kag ginsonog sila sa kalayo, kag ginbato sila.

26Kag natumpok nila sa ibabaw niya ang isa ka dakung tinumpok sang mga bato tubtub sining adlaw; niyan ang Ginoo nagtalikod sa kasingkal sang iya kaakig. Busa ginhingalanan ang duug, ang Nalupyakan sang Acor, tubtub sining adlaw.

← Chapter 6 Jump to: Chapter 8 →