Joshua 4

Ilonggo (Ang Biblia (1982))

← Chapter 3 Jump to: Chapter 5 →

1Sang nakatabok na gid sa Jordan ang bug-os nga pungsud, ang Ginoo nagsiling kay Josue,

2“Kuha sa katawohan sing napulog duha ka lalaki, isa ka lalaki gikan sa tagsa ka kabikahan,

3kag sogoa sila, ‘Kuha sa tunga sang Jordan, sa duug nga gintindugan sing malig-on sang mga tiil sang mga sacerdote, sing napulog duha ka bato kag dalhon sila ninyo, kag ibutang sila sa dayonan diin kamo magadayon sa sining gab-i.’”

4Niyan gintawag ni Josue ang napulog duha ka lalaki nga naaman niya gikan sa tunga sang katawohan sang Israel, isa ka lalaki gikan sa tagsa ka kabikahan;

5kag nagsiling sa ila si Josue, “Magtabok kamo sing una sa kaban sang Ginoo nga inyo Dios sa tunga sang Jordan, kag ang tagsa ka tawo sa inyo magpas-an sing bato, sono sa kadamuon sang mga kabikahan sang katawohan sang Israel,

6agud nga ini mangintanda sa tunga ninyo, kon ang inyo mga anak magpamangkot sa tion nga palaabuton, ‘Ano bala sa inyo ining mga bato?’

7Niyan isiling ninyo sa ila nga ang mga tubig sang Jordan naghawa sa atubangan sang kaban sang katipan sang Ginoo; sang nagtabok ini sa Jordan, ang mga tubig sang Jordan naghawa. Gani ining mga bato manginhandumanan sa katawohan sang Israel sa gihapon.”

8Kag ang mga anak sang Israel naghimo sing subong sono sa ginsogo ni Josue, kag nagkuha sing napulog duha ka bato gikan sa tunga sang Jordan, sono sa ginpamolong sang Ginoo kay Josue, sono sa kadamuon sang mga kabikahan sang katawohan sang Israel; kag gindala nila sila sa gindayonan nila, kag ginbutang sila didto.

9Kag si Josue nagpatindug sing napulog duha ka bato sa tunga sang Jordan, sa duug nga didto nagtindug ang mga tiil sang mga sacerdote nga nagdala sang kaban sang katipan; kag didto sila tubtub sining adlaw.

10Kay ang mga sacerdote nga nagdala sang kaban nagdolog sa tunga sang Jordan, tubtub nga natapus ang tagsa ka butang nga ginsogo sang Ginoo kay Josue nga ipamolong sa katawohan, sono sa tanan nga ginsogo ni Moises kay Josue. Ang katawohan nagdalidali kag nagtabok;

11kag sang nakatabok na gid ang bug-os nga katawohan, nagtabok ang kaban sang Ginoo, kag ang mga sacerdote sa atubangan sang katawohan.

12Ang mga anak ni Ruben kag ang mga anak ni Gad kag ang katunga nga kabikahan ni Manases nagtabok nga lupit sa hinganiban una sa katawohan sang Israel, subong sang ginpamolong sa ila ni Moises;

13mga kap-atan ka libo nagtabok sa atubangan sang Ginoo nga handa sa pag-awayan, pakadto sa kapatagan sang Jerico.

14Sa sadtong adlaw ginpakadaku sang Ginoo si Josue sa itololok sang bug-os nga Israel; kag ginkahadlukan nila sia, subong sang pagkahadluk nila kay Moises, sa tanan nga adlaw sang iya kabuhi.

15Kag ang Ginoo nagsiling kay Josue,

16“Sogoa ang mga sacerdote nga nagadala sang kaban sang pagpamatuud nga magtakas sila sa Jordan.”

17Busa ginsogo ni Josue ang mga sacerdote, “Takas kamo gikan sa Jordan.”

18Kag sang nakatakas ang mga sacerdote nga nagadala sang kaban sang katipan sang Ginoo gikan sa tunga sang Jordan, kag ang mga dapadapa sang mga tiil sang mga sacerdote nabayaw sa pagtapak sa mamala nga duta, ang mga tubig sang Jordan nag-uli sa ila duug kag nag-awas sa tanan niyang pangpang, subong sang sa una.

19Ang katawohan nagtakas sa Jordan sa ikapulo nga adlaw sang bulan nga nahauna, kag nagpahamtang sing dologan sa Gilgal sa dulunan nga nasidlangan sang Jerico.

20Kag ginpatindug ni Josue sa Gilgal yadtong napulog duha ka bato nga gindala nila gikan sa Jordan.

21Kag nagsiling sia sa katawohan sang Israel, “Kon magpamangkot sa ila mga ginikanan ang inyo mga anak sa tion nga palaabuton, ‘Ano bala sa inyo ining mga bato?’

22Niyan ipakilala ninyo sa inyo mga anak, ‘Ang Israel nagtabok sa mamalang duta sa sining Jordan.’

23Kay ginpahubas sang Ginoo nga inyo Dios ang mga tubig sang Jordan sa atubangan ninyo tubtub nga nakatabok kamo, subong sang ginhimo sang Ginoo nga inyo Dios sa Dagat nga Mapula, nga ginpahubas niya gikan sa atubangan naton tubtub nga nakatabok kita,

24agud nga ang tanan nga mga katawohan sang duta makakilala sang kamut sang Ginoo nga gamhanan; agud nga magkahadluk kamo sa Ginoo nga inyo Dios sa gihapon.”

← Chapter 3 Jump to: Chapter 5 →