Joshua 20

Ilonggo (Ang Biblia (1982))

← Chapter 19 Jump to: Chapter 21 →

1Niyan ang Ginoo nagsiling kay Josue,

2“Ipamolong sa katawohan sang Israel, ‘Pat-ud kamo sing mga banwa nga dalangpan, nga ginpamolong ko sa inyo paagi kay Moises,

3agud nga magpalagyo didto ang nakapatay sing bisan sin-ong tawo sing dihungud ukon wala masayori; sila dalangpan nga sa inyo gikan sa manugtimalus sang dugo.

4Sia magadangup sa isa sinang mga banwa, kag magatindug sa salamputan sang gawang sang banwa, kag magapahayag sang natabu sa iya sa mga idulungug sang mga tigulang sadtong banwa; niyan sila magapasulud sa iya sa ila sa banwa, kag mahahatag sa iya sing duug, agud nga magpuyo sia sa tunga nila.

5Kag kon ang manugtimalus sang dugo maglagas sa iya, niyan dili nila pag-itugyan ang nakapatay sing tawo sa iya kamut; bangud nga napatay niya ang iya isigkatawo sing dihungud kag wala niya pagdumti sia sang una.

6Kag magapuyo sia sa sadtong banwa, tubtub nga mag-atubang sia sa katilingban nga hukman, tubtub sa pagkapatay sang pinakamataas nga sacerdote nga mataboan sadtong mga adlaw: niyan ang nakapatay sing tawo magabalik kag magapauli sa iya kaugalingon nga banwa sa iya kaugalingon nga balay, sa banwa nga ginhalinan niya sa pagpalagyo.’”

7Gani ginpakabalaan nila ang Cades sa Galilea sa kabakoloran sang Neftali, kag ang Siquem sa kabakoloran sang Efraim, kag ang Kiryat-arba (nga amo ang Hebron) sa kabakoloran sang Juda.

8Kag sa tabok sang Jordan sa Jerico nayon sa sidlangan, ginpat-ud nila gikan sa kabikahan ni Ruben ang Bezer sa kamingawan sa kapatagan, kag gikan sa kabikahan ni Gad ang Ramot sa Galaad, kag gikan sa kabikahan ni Manases ang Golan sa Basan.

9Ini amo ang kabanwaanan nga gintangdo nga sa tanan nga katawohan sang Israel, kag sa dumuloong nga nagapanlugayaw sa tunga nila, agud nga magpalagyo didto ang bisan sin-o nga makapatay sing bisan sin-ong tawo sing dihungud, kag indi mapatay sa kamut sang manugtimalus sang dugo, tubtub nga makaatubang sia sa katilingban.

← Chapter 19 Jump to: Chapter 21 →