Joshua 5

Ilonggo (Ang Biblia (1982))

← Chapter 4 Jump to: Chapter 6 →

1Sang nakabati ang tanan nga hari sang mga Amornon nga didto sa tabok sang Jordan nayon sa katundan, kag ang tanan nga hari sang mga Canaanhon nga didto sa ubay sang dagat, kon paano nga ginpahubas sang Ginoo ang mga tubig sang Jordan sa atubangan sang katawohan sang Israel tubtub nga nakatabok kita, natunaw ang ila tagiposoon, kag wala na sing espiritu sa ila, bangud sang katawohan sang Israel.

2Sa sadtong tion nagsiling ang Ginoo kay Josue, “Buhat ka sing mga sundang nga santikan kag circuncidaha liwat ang katawohan sang Israel sa ikaduha.”

3Gani si Josue naghimo sing mga sundang nga santikan, kag gincircuncidar ang katawohan sang Israel sa Gibeat-haaralot.

4Kag amo ini ang kabangdanan nga nagcircuncidar si Josue sa ila: ang bug-os nga lalaki sang katawohan nga naggowa gikan sa Egipto, ang tanan nga lalaki sa pag-awayan, nagkalamatay sa kamingawan sa dalanon sa tapus nga naggowa sila sa Egipto.

5Bisan ang bug-os nga katawohan nga naggowa gincircuncidar, apang ang bug-os nga katawohan nga natawo sa kamingawan sa dalanon sang naggowa sila gikan sa Egipto, wala nila macircuncidar.

6Kay ang katawohan sang Israel naglakat sa kamingawan sing kap-atan ka tuig, tubtub nga napapas ang bug-os nga pungsud, ang mga tawo sa pag-awayan nga naggowa gikan sa Egipto, bangud nga wala sila magpamati sang tingug sang Ginoo; sa ila nagsumpa ang Ginoo nga indi niya sila pagpatan-awon sang duta nga ginsumpa sang Ginoo sa ila mga ginikanan nga ihatag niya sa aton, duta nga nagailig sing gatas kag dugus.

7Gani ang mga anak nila, nga ginbangon niya nga tal-us sa ila, gincircuncidar sila ni Josue; kay wala sila macircuncidar, bangud nga wala nila sila macircuncidar sa dalanon.

8Sang matapus na nila macircuncidar ang bug-os nga pungsud, nagpabilin sila sa ila mga duug sa dologan tubtub nga nag-ayo sila.

9Kag ang Ginoo nagsiling kay Josue, “Sining adlaw ginpaligid ko gikan sa inyo ang pagpakahuya sang Egipto.” Busa ang ngalan sadtong duug ginatawag Gilgal tubtub sining adlaw.

10Samtang ang katawohan sang Israel nagpahamtang sing dologan sa Gilgal ginhiwat nila ang pascua sa ikapulog apat nga adlaw sang bulan sa kahaponon sa kapatagan sang Jerico.

11Kag sa madason nga adlaw sa tapus ang pascua, nagkaon sila sang patubas sang duta, mga tinapay nga walay tapay kag uyas nga sinanlag, sa among adlaw.

12Kag ang mana nag-untat sang adlaw nga madason, sa tapus nga nakakaon sila sang patubas sang duta; kag ang katawohan sang Israel wala na gid sing mana, kondi nga nagkaon sila sang bunga sang duta sang Canaan sadtong tuig.

13Sang didto si Josue sa Jerico, ginbayaw niya ang iya mga mata kag naglantaw, kag yari karon, may isa ka lalaki nga yara sa abutangan niya nga may espada sa iya kamut; kag si Josue nagkadto sa iya kag nagsiling sa iya, “Tungud bala ikaw sa amon, ukon sa amon mga kasumpung?”

14Kag nagsiling sia, “Indi; kondi subong nga principe sang kasoldadosan sang Ginoo nagakari ako karon.” Kag si Josue naghapa sa duta, kag nagsimba, kag nagsiling sa iya, “Ano bala ang isiling sang akon Ginoo sa iya alagad?”

15Kag ang principe sang kasoldadosan sang Ginoo nagsiling kay Josue, “Huksa ang imo mga sapin sa imo tiil; kay ang duug nga ginatindugan mo balaan.” Kag amo ini ang ginhimo ni Josue.

← Chapter 4 Jump to: Chapter 6 →