Judges 11

Ilonggo (Ang Biblia (1982))

← Chapter 10 Jump to: Chapter 12 →

1Karon si Jefte nga Galaadnon gamhanan nga tawo nga isganan, apang anak sia sang babaying makihilawason. Si Galaad amay ni Jefte.

2Kag ang asawa ni Galaad nag-anak nga sa iya sing mga lalaki; kag sang nagdaku ang mga anak sang iya asawa, gintabog nila si Jefte, kag nagsiling sa iya, “Dili ka magpanubli sa balay sang amon amay; kay anak ka sang iban nga babayi.”

3Niyan si Jefte nagpalagyo gikan sa iya mga utud, kag nagpuyo sa duta sang Tob; kag nagtipon kay Jefte ang mga tawong kulangkulang, kag naggowa sila upud sa iya.

4Sa wala madugay ang mga anak ni Amon nagpakig-away sa Israel.

5Kag sang nagpakig-away batok sa Israel ang mga anak ni Amon, ang mga tigulang sang Galaad nagkuha kay Jefte gikan sa duta sang Tob;

6kag nagsiling sila kay Jefte, “Kari ka kag manginpuno namon, agud nga makapakig-away kita sa mga anak ni Amon.”

7Apang si Jefte nagsiling sa mga tigulang sang Galaad, “Wala bala ninyo ako pagdumti, kag pagtaboga sa balay sang akon amay? Ngaa bala nga nagakari kamo sa akon nga yara kamo sa kalisdanan?”

8Kag ang mga tigulang sang Galaad nagsiling kay Jefte, “Busa nagbalik kami sa imo karon, agud nga mag-upud ka sa amon kag magpakig-away sa mga anak ni Amon, kag manginpangolo ka namon sa tanan nga pumuluyo sang Galaad.”

9Si Jefte nagsiling sa mga tigulang sang Galaad, “Kon papaulion ninyo ako liwat sa pagpakig-away sa mga anak ni Amon, kag itugyan sila sang Ginoo sa atubangan nakon, manginpangolo bala ako ninyo?”

10Kag ang mga tigulang sang Galaad nagsiling kay Jefte, “Ang Ginoo manginsaksi sa tunga naton; sa pagkamatuud himoon namon sono sa imo polong.”

11Gani si Jefte nag-upud sa mga tigulang sang Galaad, kag ang katawohan naghimo sa iya nga pangolo kag punoan sa ila; kag si Jefte nagmitlang sang tanan niya nga polong sa atubangan sang Ginoo sa Mizpa.

12Niyan si Jefte nagpadala sing mga manugbalita sa hari sang mga anak ni Amon kag nagsiling, “Ano bala ang imo himoon sa akon, nga nagkari ka sa akon sa pagpakig-away sa akon duta?”

13Kag ang hari sang mga anak ni Amon nagsabat sa mga manugbalita ni Jefte, “Bangud nga gin-agaw sang Israel ang akon duta sang pagtaklad niya gikan sa Egipto, kutub sa Arnon tubtub sa Jaboc kag tubtub sa Jordan; busa karon iuli mo liwat yadtong mga duta sa paghidait.”

14Kag liwat si Jefte nagpadala sing mga manugbalita sa hari sang mga anak ni Amon

15kag nagsiling sia sa iya, “Amo ini ang ginasiling ni Jefte: Ang Israel wala mag-agaw sang duta sang Moab ukon sang duta sang mga anak ni Amon,

16apang sang nagtaklad sila gikan sa Egipto, ang Israel naglatas sang kamingawan tubtub sa Dagat nga Mapula kag nag-abut sa Cades.

17Niyan ang Israel nagpadala sing mga manugbalita sa hari sang Edom, nga nagasiling, ‘Ginaampo ko sa imo, paagiha ako sa imo duta’; apang wala magpamati ang hari sang Edom. Kag sa among bagay ang Israel nagpadala sa hari sang Moab, apang indi sia buut. Gani nagpuyo ang Israel sa Cades.

18Niyan naglatas sila sa kamingawan, kag naglibut sa duta sang Edom kag sa duta sang Moab, kag nag-abut sa luyo sang sidlangan nga kilid sang duta sang Moab, kag nagpahamtang sila sing dologan sa tabok sang Arnon; apang wala sila magsulud sa dulunan sang Moab, kay ang Arnon amo ang dulunan sang Moab.

19Niyan nagpadala ang Israel sing mga manugbalita kay Sihon nga hari sang mga Amornon, ang hari sang Hesbon; kag nagsiling sa iya ang Israel, ‘Ginaampo namon sa imo, paagiha kami sa imo duta pakadto sa akon duug.’

20Apang si Sihon wala magsalig sa Israel sa pagpaagi sa iya sa iya dulunan; gani gintipon sing tingub ni Sihon ang bug-os niyang katawohan, kag nagpahamtang sing dologan sa Jahaz, kag nagpakig-away sa Israel.

21Kag ang Ginoo, ang Dios sang Israel, nagtugyan kay Sihon kag sang bug-os niyang katawohan sa kamut sang Israel, kag gindaug nila sila; gani ginpanag-iyahan sang Israel ang bug-os nga duta sang mga Amornon, ang mga pumuluyo sadtong duta.

22Kag ginpanag-iyahan nila ang bug-os nga ginsakpan sang mga Amornon kutub sa Arnon tubtub sa Jaboc kag kutub sa kamingawan tubtub sa Jordan.

23Gani karon gin-agawan sang Ginoo, ang Dios sang Israel, ang mga Amornon sa atubangan sang Israel nga iya katawohan; kag buut mo bala panag-iyahan sila?

24Indi mo bala pagpanag-iyahan ang ginahatag ni Cemos nga imo dios sa imo pagpanag-iya? Gani ang bisan sin-o nga gin-agawan sang Ginoo nga amon Dios sa atubangan namon, sila amon panag-iyahan.

25Karon labi ka pa bala kaayo kay Balac nga anak ni Zepor, hari sang Moab? Nagsumpung bala sia sa Israel, ukon nagpakig-away bala sia sa ila?

26Samtang ang Israel nagpuyo sing tatlo ka gatus ka tuig sa Hesbon kag sa iya mga minoro, kag sa Aroer kag sa iya mga minoro, kag sa tanan nga kabanwaanan nga yara sa ubay sang Arnon, ngaa bala nga wala ninyo pagbawi-a sa sulud sadtong tion?

27Busa ako wala makasala batok sa imo, kondi ginahimoan mo ako sing sayup sa pagpakig-away sa akon; ang Ginoo, ang Hukom, maghukom sining adlaw sa tunga sang katawohan sang Israel kag sang mga anak ni Amon.”

28Apang ang hari sang mga anak ni Amon wala magpamati sang mga polong ni Jefte nga ginpadala niya sa iya.

29Niyan ang Espiritu sang Ginoo nag-abut kay Jefte, kag naglatas sia sa Galaad kag sa Manases, kag naglatas sa Mizpa sang Galaad, kag gikan sa Mizpa sang Galaad naglatas sia pakadto sa mga anak ni Amon.

30Kag si Jefte nagsaad sa Ginoo, kag nagsiling, “Kon itugyan mo sa akon kamut ang mga anak ni Amon,

31niyan ang bisan ano nga maggowa sa mga ganhaan sang akon balay sa pagsugata sa akon, kon magpauli ako sa paghidait gikan sa mga anak ni Amon, ini mangin-iya sang Ginoo, kag idolot ko ining halad-nga-sinonog.”

32Gani si Jefte naglatas pagkadto sa mga anak ni Amon sa pagpakig-away sa ila; kag gintugyan sila sang Ginoo sa iya kamut.

33Kag ginlaglag sila niya sa dakung kamatay kutub sa Aroer tubtub nga mag-abut sa Minit, duha ka pulo ka banwa, kag tubtub sa Abel-queramim. Gani ang mga anak ni Amon gindaug sa atubangan sang katawohan sang Israel.

34Niyan nag-abut si Jefte sa Mizpa sa iya balay; kag yari karon, ang iya anak nga babayi naggowa sa pagsugata sa iya nga may pandaritas kag may mga sinaut; sia bugtong niyang anak; luwas sa iya wala na sia sing anak nga lalaki ukon anak nga babayi.

35Kag sang nakita sia ni Jefte, ginkusnit niya ang iya mga panapton, kag nagsiling, “Abaw, anak ko! ginpapaubus mo gid ako, kag ikaw isa sang mga nagapakalisud sa akon; kay nakabungat ako sang akon baba sa Ginoo, kag indi na ako makaisul. ”

36Kag sia nagsiling sa iya, “Amay ko, nabungat mo ang imo baba sa Ginoo, himoa sa akon ang sono sa naggowa sa imo baba, sa bagay nga ang Ginoo nakatimalus tungud sa imo mga kaaway, sa mga anak ni Amon.”

37Kag nagsiling sia sa iya amay, “Himoa sa akon ini; pabayai ako sing duha ka bulan, agud nga magtaliwan ako kag magdulhog sa mga bukid, kag maghaya sang akon pagkaulay, ako kag ang akon kaupdanan.”

38Kag nagsiling sia, “Lakat ka.” Kag ginpahilayo sia niya sing duha ka bulan; kag nagtaliwan sia kag ang iya kaupdanan, kag naghaya sang iya pagkaulay sa mga bukid.

39Kag sa tapus ang duha ka bulan, nagbalik sia sa iya amay, nga naghimo sa iya sono sa saad nga nahimo niya. Wala sia makakilala sing lalaki. Kag ini kinabatasan sa Israel

40nga ang babayi nga mga anak sang Israel nagakadto tuigtuig sa pagsaolog sang babayi nga anak ni Jefte nga Galaadnon sing apat ka adlaw sa tuig.

← Chapter 10 Jump to: Chapter 12 →