Judges 19

Ilonggo (Ang Biblia (1982))

← Chapter 18 Jump to: Chapter 20 →

1Sa sadto nga mga adlaw, sang wala sing hari sa Israel, may isa ka Levinhon nga nagapanlugayaw sa unhan nga kabakoloran sang Efraim, nga nagkuha sing isa ka babayi gikan sa Bet-lehem-juda.

2Kag ang iya babayi nagmakihilawason batok sa iya, kag naghalin sa iya pakadto sa balay sang iya amay sa Bet-lehem-juda, kag didto sia sing apat ka bulan.

3Niyan nagtindug ang iya bana kag nag-apas sa iya, sa pag-oloolo sa iya sa pagpabalik sa iya. Ang iya alagad upud sa iya kag ang duha ka asno. Kag gindala sia niya sa balay sang iya amay; kag sang nakita sia sang amay sang pamatan-on nga babayi, nalipay sia sa pagpakigkita sa iya.

4Kag ang iya ugangan nga lalaki, ang amay sang babayi nga pamatan-on, naghawid sa iya, kag nagpabilin sia kaupud niya sing tatlo ka adlaw; gani nagkaon sila kag nag-inum, kag nagpabilin didto.

5Kag sa ikap-at nga adlaw nagbangon sila sing aga pa, kag nagtindug sia sa pagtaliwan; apang ang amay sang pamatan-on nga babayi nagsiling sa iya umagad nga lalaki, “Pabaskuga ang imo tagiposoon sa isa ka hungit nga tinapay, kag ugaling maglakat kamo sa inyo dalanon.”

6Gani naglingkod sila nga duha kag nagkaon kag nag-inum sila sing tingub; kag ang amay sang pamatan-on nga babayi nagsiling sa lalaki, “Ginaampo ko sa imo magkahamuut ka sa pagpabilin sa bug-os nga gab-i, kag magkalipay ang imo tagiposoon.”

7Kag sang nagtindug ang lalaki sa pagtaliwan, ang iya ugangan nga lalaki nagpilit sa iya, kag nagpabilin pa sia didto.

8Kag sa ikalima nga adlaw nagbangon sia sing aga pa sa pagtaliwan; kag nagsiling ang amay sang pamatan-on nga babayi, “Pabaskuga ang imo tagiposoon, kag pabilin ka tubtub nga malisding ang adlaw.” Gani nagkaon sila nga duha.

9Kag sang nagtindug ang lalaki sa pagtaliwan kag ang iya babayi kag ang iya alagad, ang iya ugangan, ang amay sang pamatan-on nga babayi, nagsiling sa iya, “Yari karon, ang adlaw nagapalapit sa kagab-ihon; ginaampo ko sa imo pabilin kamo sa bug-os nga gab-i. Yari karon, ang adlaw nagahingapus; pabilin ka diri agud nga magkalipay ang imo tagiposoon; kag buwas bugtaw kamo sa inyo dalanon, agud nga makapauli ka.”

10Apang ang lalaki indi buut magpabilin sa sadto nga gab-i; nagtindug sia kag nagtaliwan, kag nag-abut sa atubang sang Jebus (nga amo, ang Jerusalem). Kaupud niya ang duha ka asno nga nasiyahan, kag ang iya babayi man upud niya.

11Sang malapit sila sa Jebus, ang adlaw hapon na, kag nagsiling ang alagad sa iya agalon, “Kari ka, maghapit sa sini nga banwa sang mga Jebusnon, kag magpabilin sa sini.”

12Kag ang iya agalon nagsiling sa iya, “Dili kita maghapit sa banwa sang dumuloong, nga indi sa katawohan sang Israel; kondi magapadayon kita sa Gabaa.”

13Kag nagsiling sia sa iya alagad, “Kari kag magpalapit kita sa isa sini nga mga duug, kag magdayon kita sa Gabaa ukon sa Rama.”

14Gani nagpadayon sila kag naglakat sa ila dalanon; kag natunuran sila sang adlaw sa malapit sa Gabaa, nga iya sang Benjamin,

15kag naghapit sila didto, sa pagsulud sa pagdayon sa Gabaa. Kag nagsulud sia kag naglingkod sa dalan sang banwa; kay wala sing bisan sin-o nga tawo nga nagbaton sa ila sa iya balay sa pagpadayon.

16Kag yari karon, may isa ka lalaki nga tigulang nga nagpauli gikan sa iya hilikuton sa latagon sa kahaponon; ang lalaki taga-kabakoloran sang Efraim, kag nagpanlugayaw sia sa Gabaa; ang mga tawo sang duug mga Benjaminhon.

17Kag ginbayaw niya ang iya mga mata, kag nakita ang manlalakat sa dalan sang banwa; kag nagsiling ang tigulang, “Diin ka makadto? kag diin ka maghalin?”

18Kag nagsiling sia sa iya, “Nagaagi kami gikan sa Bet-lehem-juda pakadto sa unhan nga kabakoloran sang Efraim, taga-didto ako. Nagkadto ako sa Bet-lehem-juda; kag nagakadto ako sa balay sang Ginoo; kag wala sing bisan sin-o nga tawo nga nagbaton sa akon sa iya balay.

19May dagami kag kompay ako nga sa amon mga asno, nga may kalan-on kag alak man nga sa akon kag sa imo alagad nga babayi kag sa pamatan-on nga lalaki nga upud sa imo mga alagad; wala sing nakulang sa bisan ano nga butang.”

20Kag ang tigulang nagsiling, “Ang paghidait manginsa imo; sa wala sing ano man ang tanan mo nga kinahanglanon manginsa akon; lamang, indi ka magdayon sa dalan.”

21Gani gindala niya sia sa iya balay, kag ginhatagan sing kompay ang mga asno; kag nagpanghinaw sila sang ila mga tiil, kag nagkaon kag nag-inum.

22Sang nagakinasadya sila sa ila mga tagiposoon, yari karon, ang mga lalaki sang banwa, pila ka mga huroshuros, naglibut sa balay, nga nagapulpog sa ganhaan; kag nagpamolong sila sa tagbalay, ang tigulang nga lalaki, “Pagowaa ang lalaki nga nagsulud sa imo balay, agud nga makilala namon sia.”

23Kag ang lalaki, ang tagbalay, naggowa sa ila kag nagsiling sa ila, “Dili, mga utud ko, dili kamo maghimo sang among pagkalaut; sa ginatan-aw nga ining lalaki nagsulud sa akon balay, dili kamo maghimo sining kabuangan.

24Yari karon, yari ang akon anak nga babayi nga ulay kag ang babayi niya; pagowaon ko sila karon. Paubsa ninyo sila kag himoa sa ila ang maayo sa inyo; apang sa sining lalaki dili kamo maghimo sang among kabuangan.”

25Apang ang mga lalaki indi buut magpamati sa iya. Gani ginkaptan sang lalaki ang iya babayi, kag ginpagowa sia sa ila; kag sila naghiusa sa iya, kag ginhimuslan nila sia sa bug-os nga gab-i tubtub sa aga. Kag ginbuhian nila sia sang nagpamanagbanag na.

26Niyan sang pagpamanagbanag nag-abut ang babayi, kag napukan sa ganhaan sang balay sang lalaki diin ang iya ginoo, tubtub nga nagsanag.

27Kag nagbangon sa aga ang iya ginoo, kag nagbukas sang mga ganhaan sang balay kag naggowa sa pagpadayon sa iya dalanon, yari karon ang iya babayi napukan sa ganhaan sang balay, nga ang iya mga kamut sa atangan.

28Nagsiling sia sa iya, “Tindug ka, kag maglakat na kita.” Apang wala sing nagsabat. Niyan ginpahamtang niya sia sa ibabaw sang asno; kag nagtindug ang lalaki kag nagpauli sa iya duug.

29Kag sang nag-abut sia sa iya balay, nagkuha sia sing sundang, kag ginkaptan ang iya babayi kag ginhiwahiwa sia, sono sa iya mga tul-an, sa napulog duha ka bahin, kag ginpadala sia sa bug-os nga ginsakpan sang Israel.

30Kag ang tanan nga nakakita sini nagsiling, “Wala nga mas-a sing subong nga buhat nga nahimo ukon nakita kutub sang adlaw nga ang katawohan sang Israel nagtaklad gikan sa duta sang Egipto tubtub sining adlaw; patugsilingi ini, magkasugut, kag magpamolong.”

← Chapter 18 Jump to: Chapter 20 →