Judges 15

Ilonggo (Ang Biblia (1982))

← Chapter 14 Jump to: Chapter 16 →

1Sa wala madugay nga tion, sa tig-alani sang trigo, si Samson nga may tinday nga kanding nagduaw sa iya asawa; kag nagsiling sia, “Magasulud ako sa hulut sa akon asawa.” Apang ang amay indi magtugut sa iya sa pagsulud.

2Kag nagsiling ang iya amay, “Naghunahuna gid ako nga gindumtan mo sia sing totoo; gani ginhatag ko sia sa imo kaupud. Indi bala ang iya manghud nga babayi maayoayo pa sa iya? Ginaampo ko sa imo pangasaw-a sia sa tal-us niya.”

3Kag si Samson nagsiling sa ila, “Sa sini nga tion manginwala ako sing kabasolanan nahanungud sa mga Filistinhon, kon himoan ko sila sing malain.”

4Gani naglakat si Samson kag nagdakup sing tatlo ka gatus ka ido nga talonon, kag nagkuha sing mga sulo; kag gintabid ang ikog sa ikog, kag ginbutangan sing sulo sa ulut sang tagsa ka duha ka ikog.

5Kag sang nasindihan niya sing kalayo ang mga sulo, ginbuhian niya sila sa alanyon nga uyas sang mga Filistinhon, kag nasonog sing tingub ang mga tumpi kag mga alanyon nga uyas, kag ang mga katamnan sang olivo man.

6Niyan nagsiling ang mga Filistinhon, “Sin-o bala ang naghimo sini?” Kag nagsiling sila, “Si Samson, ang umagad sang Timnahanon, bangud nga ginkuha niya sa iya ang iya asawa kag ginhatag sia sa iya kaupud.” Kag nagtaklad ang mga Filistinhon, kag ginsonog sa kalayo ang babayi kag ang iya amay.

7Kag si Samson nagsiling sa ila, “Kon subong sini nga bagay ang himoon ninyo, sa pagkamatuud magatimalus ako sa inyo, kag ugaling magauntat ako.”

8Kag ginsamad niya sila sa hawak kag balikawang sa daku nga kamatay; kag nagdulhog sia kag nagpuyo sa litik sang igang sang Etam.

9Niyan ang mga Filistinhon nagtaklad kag nagpahamtang sing dologan sa Juda, kag naglapta sila sa Lehi.

10Kag ang mga lalaki sang Juda nagsiling sa ila, “Ngaa bala nagtaklad kamo batok sa amon?” Nagsiling sila, “Sa paggapus kay Samson nagtaklad kami, sa paghimo sa iya subong sang nahimo niya sa amon.”

11Niyan nagdulhog ang tatlo ka libo ka lalaki sang Juda pakadto sa litik sang igang sang Etam, kag nagsiling kay Samson, “Wala ka bala makahibalo nga ang mga Filistinhon mga manuggahum naton? Ano bala niyan ini nga nahimo mo sa amon?” Kag nagsiling sia sa ila, “Sono sa nahimo nila sa akon, amo ang nahimo ko sa ila.”

12Kag nagsiling sila sa iya, “Kami nagdulhog sa paggapus sa imo, agud nga matugyan ka namon sa kamut sang mga Filistinhon.” Kag si Samson nagsiling sa ila, “Sumpa kamo sa akon nga indi kamo inyo magdamhag sa akon.”

13Nagpamolong sila sa iya, “Indi; kondi gapuson ka namon sing malig-on kag itugyan ka sa ila kamut; apang indi gid kami magpatay sa imo.” Gani gingapus nila sia sang duha ka lubid nga bag-o, kag ginpataklad sia gikan sa igang.

14Sang nag-abut sia sa Lehi, ang mga Filistinhon nagsinggit sang nasugata nila sia; kag ang Espiritu sang Ginoo nag-abut sing gamhanan sa iya, kag ang mga lubid nga yara sa iya mga butkon nanginsubong sang lino nga nasonog sa kalayo, kag ang iya mga gapus nataktak gikan sa iya mga kamut.

15Kag nakakita sia sang bag-o nga sulang nga tul-an sang asno, kag gin-untay ang iya kamut kag ginkuha ini, kag ginsamad niya sini ang isa ka libo ka lalaki.

16Kag si Samson nagsiling, “Sa sulang nga tul-an sang asno, tinumpok sa mga tinumpok, Sa sulang nga tul-an sang asno ginsamad ko ang isa ka libo ka lalaki.”

17Sang nakatapus sia sa pagpamolong, ginpilak niya ang sulang gikan sa iya kamut; kag ginhingalanan yadto nga duug Ramat-lehi.

18Kag gin-uhaw siya sing tama, kag nagtuaw sia sa Ginoo, kag nagsiling, “Ikaw naghatag sini nga daku nga pagluwas paagi sa kamut sang imo alagad; kag karon mapatay ako sa kauhaw, kag maholog sa kamut sang mga wala macircuncidar?”

19Kag ginpalitik sang Dios ang yuhob nga yara sa Lehi, kag naggowa didto ang tubig; kag sang nakainum sia, nag-uli ang iya espiritu, kag naumpawan sia. Busa ginhingalanan ini nga En-hakore; nga yara sa Lehi tubtub sini nga adlaw.

20Kag naghukom sia sa Israel sa mga adlaw sang mga Filistinhon sing duha ka pulo ka tuig.

← Chapter 14 Jump to: Chapter 16 →