Judges 2

Ilonggo (Ang Biblia (1982))

← Chapter 1 Jump to: Chapter 3 →

1Karon ang manugtunda sang Ginoo nagtaklad gikan sa Gilgal pa Boquim. Kag nagsiling sia, “Ginpataklad ko kamo gikan sa Egipto, kag gindala kamo sa duta nga ginsumpa ko sa inyo mga ginikanan. Nagsiling ako, ‘Dili ko gid paglalison ang akon katipan sa inyo,

2kag dili kamo magpakigkatipan sa mga pumuluyo sini nga duta; lumpagon ninyo ang ila mga halaran. ’ Apang wala kamo magpamati sang akon tingug. Ngaa bala nga naghimo kamo sini?

3Gani karon ako nagasiling, Indi ko sila pagtabogon gikan sa atubangan ninyo; kondi sila manginsubong sa mga tunuk sa inyo mga kilid, kag ang ila mga dios manginsiod sa inyo.”

4Sang nagpamolong ang manugtunda sang Ginoo sini nga mga polong sa tanan nga katawohan sang Israel, ang katawohan nagbayaw sang ila tingug kag naghibi.

5Kag ginhingalanan nila yadtong duug Boquim; kag naghalad sila didto sa Ginoo.

6Sang napataliwan ni Josue ang katawohan, ang katawohan sang Israel nagpauli ang tagsa ka tawo sa iya panublion sa pagtag-iya sang duta.

7Kag ang katawohan nag-alagad sa Ginoo sa tanan nga adlaw ni Josue, kag sa tanan nga adlaw sang mga tigulang nga naglawig pa kay Josue, nga nakakita sang bug-os nga buhat nga daku sang Ginoo nga iya nahimo tungud sa Israel.

8Kag si Josue nga anak ni Nun, ang alagad sang Ginoo, napatay nga isa ka gatus kag napulo ka tuig.

9Kag ginlubung nila sia sa dulunan sang iya panublion sa Timnat-heres, sa kabakoloran sang Efraim, sa aminhan sang Bukid sang Gaas.

10Kag yadtong bug-os man nga kaliwatan ginsimpon sa ila mga ginikanan; kag may nagbangon nga isa pa ka kaliwatan sa olihi nila, nga wala makakilala sa Ginoo ukon sang buhat nga iya nahimo tungud sa Israel.

11Kag ang katawohan sang Israel naghimo sang malaut sa itololok sang Ginoo kag nag-alagad sa mga Baal;

12kag ginbayaan nila ang Ginoo, ang Dios sang ila mga ginikanan, nga nagpagowa sa ila sa duta sang Egipto; nagsonod sila sa iban nga dios, sa mga dios sang katawohan sa palibut nila, kag nagyaub sila sa ila; kag ginpaakig nila ang Ginoo.

13Ginbayaan nila ang Ginoo, kag nag-alagad sa mga Baal kag sa Astarot.

14Gani ang kaakig sang Ginoo nagdabdab batok sa Israel, kag gintugyan niya sila sa mga kamut sang mga mangangati, nga nag-ati sa ila; kag ginbaligya niya sila sa mga kamut sang ila mga kaaway sa palibut, agud nga indi na sila makatindug sa atubangan sang ila mga kaaway.

15Bisan diin sila maggowa, ang kamut sang Ginoo batok sa ila sa malaut, sono sa napamolong sang Ginoo, kag sono sa nasumpa sang Ginoo sa ila; kag tama ang ila kapipit-an.

16Niyan ang Ginoo nagbangon sing mga hukom, nga nagluwas sa ila gikan sa kamut sang mga nag-ati sa ila.

17Kag bisan pa wala sila magpamati sa ila mga hukom; kay nagmakihilawason sila sa pagsonod sa iban nga mga dios kag nagyaub sila sa ila; naglipas sila sing madali gikan sa dalanon nga ginlaktan sang ila mga ginikanan, nga nagtuman sang mga sogo sang Ginoo, kag sila wala maghimo sing subong.

18Sang nagbangon ang Ginoo sa ila sing mga hukom, niyan ang Ginoo nag-upud sa hukom, kag sia nagluwas sa ila gikan sa kamut sang ila mga kaaway sa tanan nga adlaw sang hukom; kay ini nagpakalisud sa Ginoo bangud sang ila mga pag-ugayong tungud sa mga nagpigus sa ila kag nagsakit sa ila.

19Apang sang napatay ang hukom, nagbalik sila kag naggawi sing labi pa kadunut sa ila mga ginikanan, sa pagsonod sa iban nga mga dios, sa pag-alagad sa ila kag sa pagyaub sa ila; wala sila mag-untat sa ila mga ginahimo ukon sa ila binatinggilan nga mga paagi.

20Gani ang kaakig sang Ginoo nagdabdab batok sa Israel; kag nagsiling sia, “Bangud ining katawohan naglapas sang akon katipan nga ginsogo ko sa ila mga ginikanan, kag wala magpamati sa akon tingug,

21ako man kutub karon indi magtabog gikan sa atubangan nila sang ano sang mga pungsud nga ginbilin ni Josue sang napatay sia,

22agud nga paagi sa ila matilawan ko ang Israel, kon bala magabantay sila ukon indi sang dalanon sang Ginoo sa paglakat sa sini, subong sang pagbantay sini sang ila mga ginikanan.”

23Gani ginbilin sang Ginoo yadtong mga pungsud, nga wala pagtaboga sila sing madali, kag wala niya sila pag-itugyan sa kamut ni Josue.

← Chapter 1 Jump to: Chapter 3 →