Judges 14

Ilonggo (Ang Biblia (1982))

← Chapter 13 Jump to: Chapter 15 →

1Nagdulhog si Samson pa Timna, kag nakakita sa Timna sing isa ka babayi sa mga anak sang mga Filistinhon.

2Niyan nagtaklad sia, kag nagsugid sa iya amay kag sa iya iloy, “Ako nakakita sa Timna sing babayi sa mga anak sang mga Filistinhon; busa karon ipaasawa ninyo sia sa akon.”

3Apang ang iya amay kag ang iya iloy nagsiling sa iya, “Wala na gid bala sing babayi sa babayi nga mga anak sang imo mga utud, ukon sa tunga sang bug-os ko nga katawohan, nga nagalakat ka sa pagkuha sang asawa gikan sa mga Filistinhon nga wala macircuncidar?” Apang si Samson nagsiling sa iya amay, “Ipaasawa sia sa akon; kay sia nagapahamuut sa akon sing maayo.”

4Ang iya amay kag ang iya iloy wala makahibalo nga ini nagikan sa Ginoo; kay sia nagpangita sing kahigayonan batok sa mga Filistinhon. Sa sadto nga tion ang mga Filistinhon naggahum sa Israel.

5Niyan si Samson nagdulhog upud ang iya amay kag ang iya iloy sa Timna, kag nag-abut sa mga ulubasan sang Timna. Kag yari karon, isa ka bataon nga leon nagngurub batok sa iya;

6kag ang Espiritu sang Ginoo nag-abut sing gamhanan sa iya, kag ginkusnit niya ang leon subong sang magkusnit sia sang tinday nga kanding; kag wala sia sing bisan ano sa iya kamut. Apang wala sia magsugid sa iya amay ukon sa iya iloy sang iya nahimo.

7Niyan nagdulhog sia kag nagpakighambal sa babayi; kag nagpahamuut sia sing maayo kay Samson.

8Kag sa wala madugay nagbalik sia sa pagpangasawa sa iya; kag naglipas sia sa pagtan-aw sang lawas nga patay sang leon, kag yari karon, sa lawas sang leon may nagpungyot nga mga putyokan, kag dugus.

9Gindala niya ini sa iya kamut, kag nagpadayon sa paglakat, nga nagakaon sa nagalakat sia; kag nag-abut sia sa iya amay kag sa iya iloy, kag ginhatagan sila, kag nagkaon sila. Apang wala niya sila pagsugiri nga iya nakuha ang dugus gikan sa lawas sang leon.

10Kag nagdulhog ang iya amay pakadto sa babayi, kag si Samson naghimo didto sing sinalusalo; kay amo ini ang kinabatasan nga himoon sang mga pamatan-on.

11Kag sang nakita nila sia, nagdala sila sing katloan ka kaupdanan nga magaupud sa iya.

12Kag si Samson nagsiling sa ila, “Karon matugma ako sa inyo sing paktakon; kon sa sulud sang pito ka adlaw sang sinalusalo mapatpat ini ninyo sa akon, kag mapakot ini, niyan ako magahatag sa inyo sing katloan ka bayo nga lino kag mga ilislan nga panapton;

13apang kon indi ninyo mapatpat ini sa akon, niyan kamo magahatag sa akon sing katloan ka bayo nga lino kag katloan ka ilislan nga panapton.” Kag sila nagsiling sa iya, “Itugma ang imo paktakon, agud nga mabatian namon.”

14Kag nagsiling sia sa ila, “Gikan sa manugkaon naggowa ang kalan-on. “Gikan sa makusug naggowa ang katam-is.” Kag indi sila makapatpat sang paktakon sa tatlo ka adlaw.

15Sa ikapito nga adlaw nagsiling sila sa asawa ni Samson, “Oloolohi ang imo bana agud nga mapatpat niya sa amon ang paktakon, basi sonogon ka namon kag ang balay sang imo amay sa kalayo. Gin-agda bala kami ninyo sa pagpaimol sa amon? Indi bala?”

16Kag naghibi ang asawa ni Samson sa atubangan niya, kag nagsiling, “Nagadumut ka lamang sa akon, kag wala nagahigugma sa akon; nagtugma ka sing paktakon sa mga anak sang akon banwa, kag wala magsugid sa akon.” Kag sia nagsiling sa iya, “Yari karon, wala ko ini masugid sa akon amay ukon sa akon iloy, kag isugid ko bala sa imo?”

17Naghibi sia sa atubangan niya sa pito ka adlaw tubtub natapus ang ila sinalusalo; kag sa ikapito nga adlaw ginsugiran niya sia, bangud nga ginpilit sia niya sing tama. Niyan ginsugid niya sa mga anak sang iya banwa ang paktakon.

18Kag sa ikapito nga adlaw sa wala pa magsalup ang adlaw ang mga lalaki sang banwa nagsiling sa iya, “Ano bala ang matam-is pa sa dugus? Ano bala ang makusug pa sa leon?” Kag nagsiling sia sa ila: “Kon wala ninyo pag-iarado ang akon bakiya, Wala ninyo masapwi ang akon paktakon.”

19Kag ang Espiritu sang Ginoo nag-abut sing gamhanan sa iya, kag nagdulhog sia pa Ascalon kag ginsamad niya ang katloan ka lalaki sa ila, kag ginkuha ang bayo nila kag ginhatag ang mga ilislan nga bayo sa mga nagpahayag sang paktakon. Nagdabdab ang iya kaakig kag nagtaklad sia sa balay sang iya amay.

20Kag ang asawa ni Samson ginhatag sa iya kaupud, nga abyan niya anay.

← Chapter 13 Jump to: Chapter 15 →