Judges 21

Ilonggo (Ang Biblia (1982))

← Chapter 20 Jump to:

1Karon ang mga lalaki sang Israel nagsumpa sa Mizpa, “Wala sing bisan sin-o sa aton nga magpaasawa sang iya anak nga babayi kay Benjamin.”

2Kag ang katawohan nag-abut sa Bet-el, kag naglingkod didto tubtub sa kahaponon sa atubangan sang Dios, kag nagbayaw sang ila tingug kag naghibi sing tama.

3Kag nagsiling sila, “O Ginoo, ang Dios sang Israel, ngaa bala nahanabu ini sa Israel, nga may makulang sini nga adlaw sing isa ka kabikahan sa Israel?”

4Kag sang adlaw nga madason ang katawohan nagbangon sing aga pa, kag nagpatindug didto sing halaran, kag nagdolot sing mga halad-nga-sinonog kag mga halad-sa-paghidait.

5Kag ang katawohan sang Israel nagsiling, “Sin-o bala sa tunga sang tanan nga kabikahan sang Israel nga wala magtaklad sa katilingban sa Ginoo?” Kay nakahimo sila sing daku nga sumpa batok sa wala magtaklad sa Ginoo sa Mizpa, nga nagasiling, “Sa pagkamatuud patyon sia.”

6Kag naghinulsul ang katawohan sang Israel tungud kay Benjamin nga ila utud, kag nagsiling, “May isa ka kabikahan nga nautud gikan sa Israel sini nga adlaw.

7Paano bala ang pagpaasawa naton sa ila nga nabilin, sa ginatan-aw nga nagsumpa kita sa Ginoo nga indi kita magpaasawa sa ila sang aton mga anak nga babayi?”

8Kag nagsiling sila, “Ano bala nga isa ka kabikahan sang Israel nga wala magtaklad sa Ginoo sa Mizpa?” Kag yari karon, wala sing bisan isa nga nag-abut sa dologan sa pagtilipon gikan sa Jabes-galaad.

9Kay sang gin-isip ang katawohan, yari karon, wala gid sing bisan sin-o didto nga gikan sa mga pumuluyo sang Jabes-galaad.

10Gani ang katilingban nagpadala didto sing napulo kag duha ka libo ka lalaki nga labi gid kaisganan, kag ginsogo sila, “Lakat kamo kag patya ninyo sa sulab sang espada ang mga pumuluyo sang Jabes-galaad; pati ang mga babayi kag ang mga magamay.

11Amo ini ang butang nga himoon ninyo; laglagon ninyo sing totoo ang tanan nga lalaki kag ang tanan nga babayi nga nakahulid sa lalaki.”

12Kag nakita nila sa tunga sang mga pumuluyo sang Jabes-galaad ang apat ka gatus ka pamatan-on nga babayi nga ulay nga wala makahulid sa lalaki; kag gindala sila nila sa dologan sa Silo, nga yara sa duta sang Canaan.

13Niyan ang bug-os nga katilingban nagpadala kag nagpamolong sa mga anak sang Benjamin nga yadto sa igang sang Rimon, kag nagbantala sa ila sing paghidait.

14Kag nagbalik ang mga Benjaminhon sadto nga tion; kag ginhatag nila sa ila ang mga babayi nga ginluwas nila nga buhi sa mga babayi sang Jabes-galaad; apang wala sila makatapud sa ila.

15Kag ang katawohan naghinulsul tungud kay Benjamin bangud nga ang Ginoo naghimo sing bulwang sa mga kabikahan sang Israel.

16Niyan nagsiling ang mga tigulang sang katilingban, “Paano bala ang pagpaasawa naton sa ila nga nabilin, sa ginatan-aw nga ang mga babayi gikan sa Benjamin nalaglag?”

17Kag nagsiling sila, “Kinahanglan nga may panublion sa mga nakapalagyo sang Benjamin, agud nga indi mapanas ang isa ka kabikahan sa Israel.

18Wala sing sapayan indi kita makapaasawa sa ila sang aton mga anak nga babayi.” Kay ang katawohan sang Israel nakasumpa, “Pinakamalaut sia nga nagahatag sing asawa sa Benjamin.”

19Gani nagsiling sila, “Yari karon, may piesta sa Ginoo tuigtuig sa Silo, nga yara sa aminhan sang Bet-el, sa nasidlangan sang dalan nga nagataklad gikan sa Bet-el pa Siquem, kag sa bagatnan sang Lebona.”

20Kag nagsogo sila sa mga anak sang Benjamin, nga nagasiling, “Kadto kamo kag magpuut sa mga ulubasan,

21kag tan-awa ninyo; kon ang babayi nga mga anak sang Silo maggowa sa pagsaut sa mga sinaut, niyan maggowa kamo gikan sa mga ulubasan kag magdakup ang tagsa ka tawo sa inyo sang iya asawa sa babayi nga mga anak sang Silo, kag magkadto sa duta sang Benjamin.

22Kag kon mag-abut ang ila mga ginikanan ukon ang ila mga utud sa pagyamo sa aton, kita magsiling sa ila, ‘Ihatag ninyo sila sa amon nga dolot; bangud nga wala kami magkuha nga sa tagsa ka tawo sang iya asawa sa inaway, kag wala man ninyo pag-ihatag sila sa ila, kay kontani malinapason kamo karon.’”

23Kag amo ini ang ginhimo sang mga anak sang Benjamin, kag nagkuha sila sing mga asawa, sono sa ila kadamuon, gikan sa ila nga nagsaut nga gintaban nila; niyan naglakat sila kag nagpauli sa ila panublion, kag nagpatindug sang mga banwa, kag nagpuyo sa ila.

24Kag ang katawohan sang Israel nagtaliwan gikan didto sa sadto nga tion, ang tagsa ka tawo sa iya kabikahan kag sa iya panimalay, kag naghalin sila didto ang tagsa ka tawo pakadto sa iya panublion.

25Sa sadto nga mga adlaw wala sing hari sa Israel; ang tagsa ka tawo naghimo sang matarung sa iya kaugalingon nga mga mata.

← Chapter 20 Jump to: