Judges 7

Ilonggo (Ang Biblia (1982))

← Chapter 6 Jump to: Chapter 8 →

1Niyan si Jerubbaal (nga amo, si Gideon) kag ang tanan nga katawohan kaupud niya nagbangon sing aga pa kag nagpahamtang sing dologan sa luyo sang tuburan sang Harod; kag ang dologan sang Midian yara sa aminhan nga kilid nila, sa luyo sang bakolod sang More, sa nalupyakan.

2Ang Ginoo nagsiling kay Gideon, “Ang katawohan nga kaupud nimo tama kadamu sa akon sa pagtugyan sang Midianhon sa ila kamut, basi nga ang Israel magpabugal sila batok sa akon, nga nagasiling, ‘Ang akon kamut nagluwas sa akon.’

3Busa karon ibantala sa mga idulungug sang katawohan, nga nagasiling, ‘Ang bisan sin-o nga mahadlukon kag nagakurug, magpauli sia kag magtaliwan gikan sa bukid nga Galaad.’ ” Kag may nagpauli sang katawohan nga duha ka pulo kag duha ka libo, kag may nagpabilin nga napulo ka libo.

4Kag ang Ginoo nagsiling kay Gideon, “Tama pa gid kadamu ang katawohan; padulhoga sila sa tubig kag didto tilawan ko sila nga sa imo; kag ang bisan sin-o nga isiling ko sa imo, ‘Ini magaupud sa imo,’ ang amo magaupud sa imo; kag ang bisan sin-o nga isiling ko sa imo, ‘Ini indi mag-upud sa imo,’ ang amo indi mag-upud sa imo.”

5Gani ginpadulhog niya ang katawohan sa tubig; kag ang Ginoo nagsiling kay Gideon, “Ang tagsatagsa nga nagalaklak sang tubig sang iya dila, subong sang paglaklak sang ido, painon mo sia; subong man ang tagsatagsa nga nagaduko nga nagaluhud sa pag-inum.”

6Kag ang kadamuon sang mga naglaklak, nga nagabutang sang ila kamut sa baba nila, tatlo ka gatus ka lalaki; apang ang tanan nga nabilin sang katawohan nagduko nga nagaluhud sa pag-inum sang tubig.

7Kag ang Ginoo nagsiling kay Gideon, “Paagi sa tatlo ka gatus ka lalaki nga naglaklak luwason ko kamo, kag itugyan ang Midianhon sa imo kamut; kag papauli-a ang bug-os nga katawohan ang tagsa ka tawo sa iya duug.”

8Gani ang katawohan nagdala sing mga balon sa ila mga kamut, kag sang ila mga budyong; kag ginpapauli ni Gideon ang tanan nga lalaki sang Israel ang tagsa ka tawo sa iya layanglayang, apang ginhawiran ang tatlo ka gatus ka lalaki; kag ang dologan sang Midian yara sa ubus niya sa nalupyakan.

9Sa amo nga gab-i ang Ginoo nagsiling sa iya, “Tindug ka, dulhog ka sa dologan; kay natugyan ko ini sa imo kamut.

10Apang kon nahadluk ka sa pagdulhog, dulhog ka sa dologan kaupud ni Pura nga imo sologoon;

11kag mabatian mo ang ginasiling nila, kag ugaling ang imo mga kamut magabaskug sa pagdulhog sa dologan.” Niyan sia nagdulhog upud si Pura nga iya sologoon sa nahigad gid nga bahin sang mga lalaki nga lupit sa hinganiban nga yara sa dologan.

12Kag ang mga Midianhon kag ang mga Amalecnon kag ang tanan nga katawohan sang Sidlangan nahamtang sa nalupyakan kaangay sa kadamuon sang apan; kag ang ila mga camelyo dimaisip, subong sang balas nga yara sa baybayon sa kadamuon.

13Sang nag-abut si Gideon, yari karon may tawo nga nagsugid sing damgo sa iya kaupud; kag nagsiling sia, “Yari karon, ako nagdamgo sing damgo; yari karon, ang isa ka bilog nga tinapay nga sebada nagligid pakadto sa dologan sang Midian, kag naglambut sa layanglayang, kag nagbunggo sini sa bagay nga napukan ini, kag nagbaliskad sini, sa bagay nga ang layanglayang naghaplak.”

14Kag ang iya kaupud nagsabat, “Ini indi liwan kondi ang espada ni Gideon nga anak ni Joas, lalaki sang Israel; gintugyan sang Dios sa iya kamut ang Midian kag ang bug-os nga kasoldadosan.”

15Sang si Gideon nakabati sang pagsugid sang damgo kag sang iya kasaysayan, nagsimba sia; kag nagbalik sia sa dologan sang Israel, kag nagsiling sia, “Tindug kamo; kay natugyan sang Ginoo sa inyo kamut ang kasoldadosan sang Midian.”

16Kag ginbahinbahin niya ang tatlo ka gatus ka lalaki sa tatlo ka kabon, kag nagbutang sia sa kamut nila nga tanan sing mga budyong kag mga tibud nga wala sing sulud, nga may mga sulo sa sulud sang mga tibud.

17Kag nagsiling sia sa ila, “Tolok kamo sa akon, kag maghimo sing subong; kon ako maglambut sa nahigad nga bahin sang dologan, sono sa himoon ko amo ang himoon ninyo.

18Kon ako magpatonog sang budyong, ako kag ang tanan nga upud sa akon, niyan kamo magpatonog sang mga budyong man sa tagsa ka kilid sang bug-os nga dologan, kag magsiling, ‘Tungud sa Ginoo kag kay Gideon.’”

19Gani si Gideon kag ang isa ka gatus ka lalaki nga upud sa iya nag-abut sa nahigad gid nga bahin sang dologan sa pagpamuno sang natunga nga pagpulaw, sang bag-o pa lamang mabutang nila ang mga bantay; kag ginpatonog nila ang mga budyong kag ginbuka ang mga tibud nga yara sa ila mga kamut.

20Kag ang tatlo ka kabon nagpatonog sang mga budyong kag nagbuka sang mga tibud, kag ginkaptan sa ila mga kamut nga wala ang mga sulo, kag sa ila mga kamut nga too ang mga budyong sa pagpatonog; kag nagsinggit sila, “Ang espada sang Ginoo kag ni Gideon!”

21Nagtindug ang tagsa ka lalaki sa iya duug sa palibut sang dologan, kag ang bug-os nga kasoldadosan nagdalagan; kag nagsinggit sila kag ginpatal-as sila.

22Sang ginpatonog nila ang tatlo ka gatus ka budyong, ginbutang sang Ginoo ang espada sang tagsa ka lalaki batok sa iya kaupud kag batok sa bug-os nga kasoldadosan; kag ang kasoldadosan nagpalagyo tubtub sa Bet-sita nayon sa Cerera, tubtub sa dulunan sang Abel-mehola, sa luyo sang Tabat.

23Kag nagtipon sing tingub ang mga lalaki sang Israel gikan sa Neftali kag gikan sa Aser kag gikan sa bug-os nga Manases, kag naglagas sang Midian.

24Kag si Gideon nagpadala sing mga manugbalita sa bug-os nga kabakoloran sang Efraim, nga nagasiling, “Dulhog kamo batok sa Midian kag agawa ninyo sing una sa ila ang mga tubig, tubtub sa Bet-bara, kag ang Jordan man.” Gani ang tanan nga lalaki sang Efraim gintipon sing tingub, kag gin-agaw ang mga tubig tubtub sa Bet-bara, kag ang Jordan man.

25Kag gindakup nila ang duha ka principe sang Midian, si Oreb kag si Zeeb; kag ginpatay nila si Oreb sa igang sang Oreb, kag si Zeeb ginpatay nila sa linasan sang uvas sang Zeeb, kag ginlagas ang Midian; kag gindala nila ang mga olo ni Oreb kag Zeeb kay Gideon sa tabok sang Jordan.

← Chapter 6 Jump to: Chapter 8 →

Recommended Reading

Commentary Judges Commentaries → Devotional Judges Devotional Guide → Get This Bible 1982 Study Bible →