Judges 13

Ilonggo (Ang Biblia (1982))

← Chapter 12 Jump to: Chapter 14 →

1Kag ang katawohan sang Israel naghimo liwat sang malaut sa itololok sang Ginoo; kag gintugyan sila sang Ginoo sa kamut sang mga Filistinhon sing kap-atan ka tuig.

2Kag may isa sadto ka lalaki sang Zora, gikan sa panimalay sang mga Danhanon, nga ginahingalanan Manoa; kag ang iya asawa baw-as kag wala mag-anak.

3Kag ang manugtunda sang Ginoo nagpahayag sa babayi kag nagsiling sa iya, “Yari karon, ikaw baw-as kag wala nagaanak; apang magapanamkon ka kag magaanak sing lalaki.

4Busa karon mag-andam, kag dili mag-inum sing alak ukon masingkal nga ilimnon, kag dili magkaon sing butang nga mahigko,

5kay yari karon, ikaw magapanamkon kag magaanak sing lalaki. Wala sing inugkiskis nga mag-agi sa iya olo, kay ang bata mangin-Nazareo sa Dios kutub sa tiyan; kag magasugud sia sa pagluwas sang Israel gikan sa kamut sang mga Filistinhon.”

6Niyan ang babayi nagkadto kag nagsugid sa iya bana, “Isa ka tawo sang Dios nag-abut sa akon, kag ang iya dagway kaangay sang dagway sang manugtunda sang Dios, makahalanguyus gid; kag wala ako magpamangkot sa iya kon diin sia maghalin, kag wala sia magsugid sa akon sang iya ngalan;

7apang nagsiling sia sa akon, ‘Yari karon, ikaw magapanamkon kag magaanak sing lalaki; kag karon dili mag-inum sing alak ukon masingkal nga ilimnon, kag dili magkaon sing butang nga mahigko, kay ang bata mangin-Nazareo sa Dios kutub sa tiyan tubtub sa adlaw sang iya kamatayon.’”

8Niyan nagpakilooy si Manoa sa Ginoo kag nagsiling, “O, Ginoo, ginaampo ko sa imo, pabalika sa amon ang tawo sang Dios nga ginpadala mo, kag magtudlo sa amon kon ano ang amon himoon sa bata nga matawo.”

9Kag ang Dios nagpamati sa tingug ni Manoa, kag ang manugtunda sang Dios nagbalik liwat sa babayi sang nagalingkod sia sa latagon; apang ang iya bana nga si Manoa wala upud sa iya.

10Kag ang babayi nagdalidali kag nagdalagan kag nagsugid sa iya bana, “Yari karon, nagpahayag sa akon ang lalaki nga nag-abut sa akon sang isa ka adlaw.”

11Kag nagtindug si Manoa kag nagsonod sa iya asawa, kag nagkadto sa lalaki kag nagsiling sa iya, “Ikaw bala ang lalaki nga nagpamolong sa babayi?” Kag nagsiling sia, “Amo ako.”

12Kag si Manoa nagsiling, “Karon pahanabua ang imo polong, ano bala ang pagpatubo sang bata, kag ano ang himoon namon sa iya?”

13Kag ang manugtunda sang Ginoo nagsiling kay Manoa, “Ang babayi mag-andam sa tanan nga ginsiling ko sa iya.

14Dili sia makakaon sang bisan ano nga butang nga nagagikan sa balagon nga uvas, kag dili pagpaimnon sing alak ukon masingkal nga ilimnon, ukon magkaon sang bisan ano nga butang nga dimatinlo; magbantay sia sang tanan nga ginsogo ko sa iya.”

15Si Manoa nagsiling sa manugtunda sang Ginoo, “Ginaampo ko sa imo, magpahawid ka sa amon, agud nga makahiwat kami sing tinday nga kanding nga sa imo.”

16Kag ang manugtunda sang Ginoo nagsiling kay Manoa, “Kon hawiran mo ako, indi ako magkaon sang imo kalan-on; kag kon maghanda ka sing halad-nga-sinonog, kinahanglan ihalad mo ini sa Ginoo.” (Kay wala kahibalo si Manoa nga sia manugtunda sang Ginoo.)

17Kag si Manoa nagsiling sa manugtunda sang Ginoo, “Sin-o bala ang imo ngalan, agud nga, kon matuman ang imo polong, pasidunggan ka namon?”

18Kag ang manugtunda sang Ginoo nagsiling sa iya, “Ngaa bala nagapamangkot ka sang akon ngalan, sa ginatan-aw nga ini makatilingala?”

19Gani nagkuha si Manoa sing isa ka diotay nga kanding pati ang halad-nga-kalan-on, kag ginhalad niya ini sa ibabaw sang igang sa Ginoo, sa iya nga nagahimo sing mga kalatingalahan.

20Kag sang nagpaibabaw ang dabdab gikan sa halaran pa langit, ang manugtunda sang Ginoo nagsaka sa dabdab sang halaran sang si Manoa kag ang iya asawa nagtolok; kag naghapa sila sa duta.

21Ang manugtunda sang Ginoo wala na gid magpahayag kay Manoa ukon sa iya asawa. Niyan nahibal-an ni Manoa nga sia manugtunda sang Ginoo.

22Kag si Manoa nagsiling sa iya asawa, “Sa pagkamatuud mapatay kita, bangud nga nakita naton ang Dios.”

23Apang ang iya asawa nagsiling sa iya, “Kon buut kita patyon sang Ginoo, wala sia kuntani magbaton sa aton mga kamut sang halad-nga-sinonog kag sang halad-nga-kalan-on, kag wala sia kuntani magpakita sa aton sini tanan nga butang, ukon magsugid sa sini nga tion sang subong sini nga butang.”

24Kag ang babayi nag-anak sing lalaki, kag ginhingalanan sia Samson; kag ang bata nagtubo, kag ginpakamaayo sia sang Ginoo.

25Kag ang Espiritu sang Ginoo nagpamuno sa pagdaldal sa iya sa Mahane-dan, sa ulut sang Zora kag Estaol.

← Chapter 12 Jump to: Chapter 14 →