Zechariah 1

Ilonggo (Ang Biblia (1982))

Jump to: Chapter 2 →

1Sa ikawalong bulan, sa ikaduha nga tuig ni Dario, nag-abut ang polong sang Ginoo kay Zacarias nga anak ni Berequias, ang anak ni Iddo, ang manalagna, nga nagasiling,

2“Ang Ginoo naakig sing tama sa inyo mga ginikanan.

3Busa isiling mo sa ila, Amo ini ang ginasiling sang Ginoo sang mga kasoldadosan: Balik kamo sa akon, nagasiling ang Ginoo sang mga kasoldadosan, kag ako magabalik sa inyo, nagasiling ang Ginoo sang mga kasoldadosan.

4Dili kamo magsubong sa inyo mga ginikanan, nga sa ila nagsinggit ang una nga mga manalagna, ‘Amo ini ang ginasiling ang Ginoo sang mga kasoldadosan, Talikod kamo karon sa inyo malaut nga mga dalanon kag sa inyo malaut nga mga buhat.’ Apang wala sila magpamati ukon magtalupangud sa akon, nagasiling ang Ginoo.

5Ang inyo mga ginikanan, diin na bala sila? Kag ang mga manalagna, nagakabuhi sila bala sing dayon?

6Apang ang akon mga polong kag ang akon mga palatukuran, nga ginsogo ko sa akon mga alagad nga mga manalagna, wala bala nila malambut ang inyo mga ginikanan? Gani nagbalik sila kag nagsiling, Sono sa ginahinyo sang Ginoo sang mga kasoldadosan nga himoon sa aton sono sa aton mga dalanon kag mga binuhatan, amo ini ang paghisayo niya sa aton.”

7Sa ikaduha ka pulo kag apat nga adlaw sang bulan nga ikapulog isa nga amo ang bulan nga Sebat, sa ikaduhang tuig ni Dario, nag-abut ang polong sang Ginoo kay Zacarias nga anak ni Berequias, ang anak ni Iddo, ang manalagna; kag si Zacarias nagsiling,

8“Nakita ko sa kagab-ihon, kag yari karon, isa ka lalaki nga nagasakay sa kabayo nga mapula! Nagdolog sia sa tunga sang mga mirto nga yara sa ubus; kag sa olihi niya may mapula, badyaw, kag maputi nga mga kabayo.

9Niyan nagsiling ako, ‘Ginoo ko, ano bala ini sila?’ Ang manugtunda nga nagpakighambal sa akon nagsiling sa akon, ‘Ipakita ko sa imo kon ano ini sila.’

10Gani ang lalaki nga nagdolog sa tunga sang mga mirto nagsabat, ‘Ini sila amo ang ginpadala sang Ginoo sa paglibud sa duta.’

11Kag sila nagsabat sa manugtunda sang Ginoo nga nagdolog sa tunga sang mga mirto, ‘Ginlibud namon ang duta, kag yari karon, ang bug-os nga duta matinong, kag nagapahuway.’

12Niyan ang manugtunda sang Ginoo nagsabat, ‘O Ginoo sang mga kasoldadosan, tubtub pa bala san-o nga indi ka magkalooy sa Jerusalem kag sa kabanwaanan sang Juda, nga batok sa ila naalipungut ka sini nga kapitoan ka tuig?’

13Kag ang Ginoo nagsabat sa manugtunda nga nagpakighambal sa akon sa maayo kag makalilipay nga mga polong.

14Gani ang manugtunda nga nagpakighambal sa akon nagsiling sa akon, ‘Singgit ka, Amo ini ang ginasiling sang Ginoo sang mga kasoldadosan: Nagakaimon ako sa Jerusalem kag sa Sion sa daku nga kaimon.

15Kag nagakaakig ako sing tama gid sa mga pungsud nga yara sa katawhay; kay naakig ako lamang sing diotay kag nagbulig sila sa pagpadayon sang kapipit-an.

16Busa, amo ini ang ginasiling sang Ginoo, nagabalik ako sa Jerusalem nga may mga kalooy; patindugon sa iya ang akon balay, nagasiling ang Ginoo sang mga kasoldadosan, kag ang latid untayon sa ibabaw sang Jerusalem.

17Singgit pa liwat, Amo ini ang ginasiling sang Ginoo sang mga kasoldadosan: Ang akon kabanwaanan magaawas pa sa kauswagan, kag lipayon pa sang Ginoo ang Sion kag pilion pa ang Jerusalem.’”

18Kag ginbayaw ko ang akon mga mata kag nakakita, kag yari karon, ang apat ka sungay!

19Kag nagsiling ako sa manugtunda nga nagpakighambal sa akon, “Ano bala ini sila?” Kag nagsabat sia sa akon, “Ini sila amo ang mga sungay nga nagpaaplaag sang Juda, sang Israel, kag sang Jerusalem.”

20Niyan ginpakitaan ako sang Ginoo sing apat ka manugsalsal.

21Kag nagsiling ako, “Ano bala ang ginakari nila sini nga himoon?” Nagpamolong sia, “Ini sila amo ang mga sungay nga nagpaaplaag sang Juda, sa bagay nga wala sing tawo nga nagtukhayaw sang iya olo; apang ini sila nagkari sa pagpakugmat sa ila, sa pagpungal sang mga sungay sang mga pungsud nga nagbayaw sang ila sungay batok sa duta sang Juda sa pagpaaplaag sa iya.”

Jump to: Chapter 2 →

Recommended Reading

Commentary Zechariah Commentaries → Devotional Zechariah Devotional Guide → Get This Bible 1982 Study Bible →