Zechariah 6

Ilonggo (Ang Biblia (1982))

← Chapter 5 Jump to: Chapter 7 →

1Kag ginbayaw ko liwat ang akon mga mata kag nakakita, kag yari karon, may nag-abut nga apat ka kangga gikan sa ulut sang duha ka bukid; kag ang mga bukid mga bukid nga saway.

2Sa nahaunang kangga may mga kabayo nga mapula, sa ikaduhang kangga mga kabayo nga maitum,

3sa ikatlong kangga mga kabayo nga maputi, kag sa ikap-at nga kangga mga kabayo nga makusug nga abohon.

4Niyan ako nagsiling sa manugtunda nga nagpakighambal sa akon, “Ano bala ini sila, ginoo ko?”

5Kag ang manugtunda nagsabat sa akon, “Ini sila amo ang apat ka hangin sang langit, nga nagagowa gikan sa pagtindug sa atubangan sang Ginoo sang bug-os nga duta.

6Ang kangga nga may mga kabayo nga maitum nagapadolong nayon sa duta nga naaminhan, ang maputi nagapadolong nayon sa duta nga nakatundan, kag ang abohon nagpadolong nayon sa duta nga bagatnan.”

7Sang paggowa sang makusug nga mga kabayo, nagtinguha sila sa paglakat sa paglibud sa duta. Kag nagsiling sia, “Lakat, libura ang duta.” Gani ginlibud nila ang duta.

8Niyan nagsinggit sia sa akon, “Yari karon, ang mga nagapadolong nayon sa duta nga naaminhan nagpalinong sang akon Espiritu sa duta nga naaminhan.”

9Kag ang polong sang Ginoo nag-abut sa akon:

10“Kuha ka sa kabihagan kanday Heldai, Tobias, kag Jedaya, nga nag-abut gikan sa Babilonia; kag lakat sa amo nga adlaw sa balay ni Josias, nga anak ni Sofonias.

11Kuhai sila sing pilak kag bulawan, kag maghimo sing mga purungpurung, kag ibutang sila sa olo ni Josue nga anak ni Josadac, ang pinakamataas nga sacerdote;

12kag ipamolong sa iya, ‘Amo ini ang ginapamolong sang Ginoo sang mga kasoldadosan, “Yari karon, ang lalaki nga ang iya ngalan amo ang Salingsing: kay magatubo sia sa iya duug, kag patindugon niya ang templo sang Ginoo.

13Sia gid magapatindug sang templo sang Ginoo, kag magadala sia sang himaya, kag magalingkod kag magadumala sa iya trono, kag manginmay sacerdote sa luyo sang iya trono, kag ang makidaiton nga paghangpanay manginsa tunga nila nga duha.” ’

14Kag ang mga purungpurung manginkanday Heldai, Tobias, Jedaya, kag Josias nga anak nga lalaki ni Sofonias nga sa handumanan sa templo sang Ginoo.

15“Kag ang mga sa malayo magaabut kag magabulig sa pagpatindug sang templo sang Ginoo; kag makilala ninyo nga ang Ginoo sang mga kasoldadosan nagpadala sa akon sa inyo. Kag mahanabu ini, kon tumanon ninyo sing makugihon ang tingug sang Ginoo nga inyo Dios.”

← Chapter 5 Jump to: Chapter 7 →