Zechariah 12

Ilonggo (Ang Biblia (1982))

← Chapter 11 Jump to: Chapter 13 →

1Ang lulan sang polong sang Ginoo nahanungud sa Israel: Amo ini ang ginasiling sang Ginoo, nga nagahumlad sang mga langit kag nagapasad sang sadsaran sang duta kag nagahuman sang espiritu sang tawo sa sulud niya:

2“Yari karon himoon ko ang Jerusalem nga tagayan sang pagdulingduling sa tanan nga mga katawohan sa palibut; sa Juda man manginyari ini sa pagkibon sang Jerusalem.

3Sa sadtong adlaw himoon ko ang Jerusalem nga mabug-at nga bato sa tanan nga mga katawohan; ang tanan nga magapabug-at sa ila sini mapilas sing tama. Kag ang tanan nga mga pungsud sang duta magatipon sing tingub batok sini.

4Sa sadtong adlaw, nagasiling ang Ginoo, pakugmaton ko ang tagsa ka kabayo, kag pasalahon ang iya manugsakay. Apang muklaton ko ang akon mga mata sa panimalay sang Juda, kon bulagon ang tagsa ka kabayo sang mga katawohan.

5Niyan ang mga pangolo sang Juda magasiling sa ila tagiposoon, ‘Ang mga pumuluyo sang Jerusalem akon kusug sa Ginoo sang mga kasoldadosan, nga ila Dios.’

6“Sa sadtong adlaw himoon ko ang mga pangolo sang Juda kaangay sang kalaha nga kalayo sa tunga sang gatong, kaangay sang sulo nga nagadabadaba sa tunga sang mga linaylay; kag lamonon nila ang tanan nga mga katawohan sa palibut sa too kag sa wala, samtang ang mga sa Jerusalem magapuyo pa liwat sa ila kaugalingon nga duug, sa Jerusalem.

7“Kag ang Ginoo man magaluwas sing una sang mga layanglayang sang Juda, agud nga ang himaya sang panimalay ni David kag ang himaya sang mga pumuluyo sang Jerusalem indi maglabaw sang sa iya sang Juda.

8Sa sadtong adlaw ang Ginoo magaapin sang mga pumuluyo sang Jerusalem agud nga ang maluya sa ila sa sadtong adlaw manginsubong kay David, kag ang panimalay ni David manginsubong sang Dios, subong sang manugtunda sang Ginoo, sa atubangan nila.

9Kag sa sadtong adlaw magatinguha ako sa paglaglag sang tanan nga mga pungsud nga nagasumpung sa Jerusalem.

10“Kag ipasagahay ko sa panimalay ni David kag sa mga pumuluyo sang Jerusalem ang espiritu sang bugay kag sang pag-ampo, kag magatolok sila sa akon nga ila ginbuno, kag magalalaw sila tungud sa iya, subong sang isa nga nagalalaw sa iya bugtong nga anak nga lalaki, kag manginsa kapaitan tungud sa iya, subong sang isa nga yara sa kapaitan tungud sang iya panganay.

11Sa sadtong adlaw may daku nga paglalaw sa Jerusalem subong sang paglalaw sang Adadrimon sa nalupyakan sang Meguido.

12Ang duta magalalaw, ang tagsa ka panimalay sing pahain; ang panimalay sang balay ni David sing pahain, kag ang ila mga asawa sing pahain; ang panimalay sang balay ni Natan sing pahain, kag ang ila mga asawa sing pahain;

13ang panimalay sang balay ni Levi sing pahain, kag ang ila mga asawa sing pahain; ang panimalay sang mga Simeinhon sing pahain, kag ang ila mga asawa sing pahain;

14ang tanan nga mga panimalay nga nabilin, ang tagsa ka panimalay sing pahain, kag ang ila mga asawa sing pahain.

← Chapter 11 Jump to: Chapter 13 →