Zechariah 3

Ilonggo (Ang Biblia (1982))

← Chapter 2 Jump to: Chapter 4 →

1Niyan ginpakita niya sa akon si Josue nga pinakamataas nga sacerdote nga nagatindug sa atubangan sang manugtunda sang Ginoo, kag si Satanas nga nagatindug sa iya too nga iya kasumpung.

2Kag ang Ginoo nagsiling kay Satanas, “Ang Ginoo nagasabdong sa imo, O Satanas! Ang Ginoo nga nagpili sang Jerusalem nagasabdong sa imo! Indi bala ini agipo nga ginkuha sa kalayo?”

3Karon si Josue napanaptan sing mga panapton nga mahigko, kag nagatindug sa atubangan sang manugtunda.

4Kag nagpamolong ang manugtunda sa mga nagatindug sa atubangan niya, “Ubaha ninyo sa iya ang mga bayo nga mahigko.” Kag nagsiling sia sa iya, “Yari karon, ginpataliwan ko sa imo ang kalautan nimo, kag panaptan ko ikaw sing bayo nga malahalon.”

5Kag nagsiling ako, “Takbongan nila sia sing turbante nga matinlo sa iya olo.” Gani gintakbongan nila sing turbante nga matinlo ang iya olo kag ginpanaptan sia sing mga panapton; kag ang manugtunda sang Ginoo nagatindug sa luyo.

6Kag ang manugtunda sang Ginoo nagpamatuud kay Josue,

7“Amo ini ang ginasiling sang Ginoo sang mga kasoldadosan: Kon maglakat ka sa akon mga dalanon kag kon magbantay ka sang akon tinulin, niyan magahukom ka man sang akon balay kag magabantay man sang akon mga luwang, kag hatagan ko ikaw sing alagyan sa tunga sang mga nagatindug sa luyo.

8Pamatii karon, O Josue nga pinakamataas nga sacerdote, ikaw kag ang imo kaupdanan nga nagalingkod sa atubangan mo, kay mga lalaki sila nga katingalahan: yari karon, pakarion ko ang akon alagad nga Salingsing.

9Kay yari karon, ang bato nga ginbutang ko sa atubangan ni Josue, sa isa ka bato nga may pito ka mata, itigib ko ang inugtigib sa iya, nagasiling ang Ginoo sang mga kasoldadosan, kag kuhaon ko ang kalautan sadtong duta sa isa ka adlaw.

10Sa sadtong adlaw, nagasiling ang Ginoo sang mga kasoldadosan, magaagdahay kamo ang tagsa ka tawo sa iya isigkatawo sa idalum sang uvas kag sa idalum sang higuera.”

← Chapter 2 Jump to: Chapter 4 →