Zechariah 7

Ilonggo (Ang Biblia (1982))

← Chapter 6 Jump to: Chapter 8 →

1Sa ikap-at nga tuig ni Hari Dario, ang polong sang Ginoo nag-abut kay Zacarias sa ikap-at nga adlaw sang bulan nga ikasiam, nga Kislev.

2Karon ang mga taga-Bet-el nagpadala kay Sarezer kag kay Regem-melec kag sang ila mga tawo, sa pagpakilooy sang kahamuut sang Ginoo,

3sa pagpamolong sa mga sacerdote sang balay sang Ginoo sang mga kasoldadosan, kag sa mga manalagna, “Maghibi bala ako sa ikalima nga bulan, nga nagapahain sang akon kaugalingon, subong sang ginhimo ko sining madamu na gid nga tuig?”

4Niyan nag-abut sa akon ang polong sang Ginoo sang mga kasoldadosan;

5“Ipamolong sa tanan nga katawohan sang duta kag sa mga sacerdote, Sang nagpuasa kamo kag naglalaw sa ikalima kag sa ikapitong bulan, sa sining kapitoan ka tuig, nagpuasa bala kamo gayud sa akon?

6Kag kon magkaon kamo kag kon mag-inum kamo, wala bala kamo nagakaon sa inyo kaugalingon kag nagainum sa inyo kaugalingon?

7Indi bala ini ang mga polong nga ginpahayag sang Ginoo paagi sa mga manalagna nga una, sang napuy-an ang Jerusalem kag mauswagon, kag napuy-an ang iya kabanwaanan sa iya palibut, kag ang Bagatnan kag ang kapatagan?

8Kag ang polong sang Ginoo nag-abut kay Zacarias, nga nagasiling,

9“Amo ini ang ginpamolong sang Ginoo sang mga kasoldadosan, Hikota ang matuud nga mga paghukom, magpahayag sing kalolo kag kaawa ang tagsa ka tawo sa iya utud,

10dili pagpiguson ang balo nga babayi, ukon ang ilo, ang manlulugayaw, ukon ang makalolooy; kag walay bisan sin-o sa inyo nga magpadugi sing malaut sa iya tagiposoon batok sa iya utud.”

11Apang nagdumili sila sa pagtalupangud, kag nagtalikod sang mabinatoon nga abaga, kag nagsungsung sang ila mga idulungug agud nga indi sila makabati.

12Ginhimo nila ang ila tagiposoon subong sang diamante, basi nga makabati sila sang kasogoan kag sang mga polong nga ginpadala sang Ginoo sang mga kasoldadosan paagi sa iya Espiritu sa una nga mga manalagna. Busa may nag-abut nga dakung kasingkal gikan sa Ginoo sang mga kasoldadosan.

13“Subong nga ako nagpanawag, kag indi sila magpamati, sa amo nagpanawag sila, kag ako indi magpamati,” nagasiling ang Ginoo sang mga kasoldadosan,

14“kag paaplaagon ko sila sang buhawi sa tunga sang tanan nga pungsud nga wala nila makilala. Sa amo ang duta mamingaw sa olihi nila, sa bagay nga walay tawo nga nag-agi ukon nagbalik, kag ginpamingaw nila ang maayong duta.”

← Chapter 6 Jump to: Chapter 8 →