Zechariah 4

Ilonggo (Ang Biblia (1982))

← Chapter 3 Jump to: Chapter 5 →

1Kag nagbalik ang manugtunda nga nagpakighambal sa akon, kag nagpukaw sa akon, subong sang tawo nga ginpukaw sa iya katologon.

2Kag nagsiling sia sa akon, “Ano bala ang ginatan-aw mo?” Nagsiling ako, “Nakita ko, kag yari karon, ang isa ka candelero nga bus-og nga bulawan, nga may yahong sa ibabaw sini, kag ang iya pito ka suga sa ibabaw niya, may pito ka iligan sa tagsa ka suga nga yara sa ibabaw niya.

3Kag duha ka olivo sa luyo sini, ang isa sa too nga kilid sang yahong kag ang isa sa iya wala nga kilid.”

4Kag nagpamolong ako sa manugtunda nga nagpakighambal sa akon, “Ano bala ini sila, ginoo ko?”

5Niyan ang manugtunda nga nagpakighambal sa akon nagsabat sa akon, “Wala ka bala makakilala kon ano ini sila?” Nagsiling ako, “Wala, ginoo ko.”

6Niyan nagpamolong sia sa akon, “Ini amo ang polong sang Ginoo kay Zorobabel: Indi sa kusug, ukon sa gahum, kondi sa akon Espiritu, nagasiling ang Ginoo sang mga kasoldadosan.

7Sin-o bala ikaw, O daku nga bukid? Sa atubangan ni Zorobabel manginkapatagan ka; kag dalhon niya ang bato nga naibabaw nga may sininggit sang ‘Bugay, bugay sa iya!’”

8Labut pa ang polong sang Ginoo nag-abut sa akon, nga nagasiling,

9“Ang mga kamut ni Zorobabel nagpasad sang sadsaran sini nga balay; ang iya mga kamut man magahuman sini. Niyan makilala mo nga ang Ginoo sang mga kasoldadosan nagpadala sa akon sa inyo.

10Kay sin-o bala ang nagtamay sang adlaw sang magamay nga mga butang? Kay ining pito magakalipay, kag magatan-aw sang tonton sa kamut ni Zorobabel. “Ining pito mga mata sang Ginoo, nga nagapanoloktolok sa bug-os nga duta.”

11Niyan nagsiling ako sa iya, “Ano bala ining duha ka olivo sa too sang candelero kag sa iya wala?”

12Kag sa ikaduha nagsiling ako sa iya, “Ano bala ining duha ka sanga nga olivo, nga yara sa luyo sang duha ka tarog nga bulawan nga nagapailig sang bulawanon nga lana gikan sa ila?”

13Nagsiling sia sa akon, “Wala ka bala makakilala kon ano ini sila?” Nagsiling ako, “Wala, ginoo ko.”

14Niyan nagsiling sia, “Ini sila amo ang duha ka hinaplas nga nagatindug sa luyo sang Ginoo sang bug-os nga duta.”

← Chapter 3 Jump to: Chapter 5 →