Zechariah 14

Ilonggo (Ang Biblia (1982))

← Chapter 13 Jump to:

1Yari karon, ang adlaw sang Ginoo, nagaabut, nga ang imo inagaw bahinbahinon sa tunga nimo.

2Kay tiponon ko ang tanan nga pungsud sa inaway batok sa Jerusalem, kag ang banwa agawon kag ang mga balay atihon kag ang mga babayi luguson; ang katunga sang banwa magakadto sa kabihagan, kag ang salin sang katawohan indi pagpapason sa banwa.

3Niyan magagowa ang Ginoo kag magapakig-away batok sa sadtong mga pungsud subong sang pag-away niya sa adlaw sang inaway.

4Sa sadtong adlaw ang iya mga tiil magatindug sa Bukid sang mga Olivo nga yara sa atubang sang Jerusalem sa sidlangan; kag ang Bukid sang mga Olivo mapihak sa tunga niya nayon sa sidlangan kag nayon sa katundan kag manginmay daku gid nga nalupyakan; kag ang katunga sang Bukid magaisdug pa aminhan, kag ang katunga sini pa bagatnan.

5Kag magapalagyo kamo paagi sa nalupyakan sang akon mga bukid, kay ang nalupyakan sang mga bukid magalambut tubtub sa Azal; kag magapalagyo kamo kaangay sang pagpalagyo ninyo gikan sa linog sa mga adlaw ni Uzias nga hari sang Juda. Niyan ang Ginoo nga akon Dios magaabut, kag upud sa iya ang tanan nga balaan.

6Sa sadtong adlaw wala na sing kapawa; ang mga masiga mapalong sila.

7Kondi ini mangin-isa ka adlaw (nga nakilala sang Ginoo), indi adlaw kag indi gab-i, kay sa kagab-ihon may kapawa.

8Sa sadtong adlaw ang mga tubig nga buhi magagowa gikan sa Jerusalem, ang katunga nila nayon sa dagat nga nasidlangan kag ang katunga nila nayon sa dagat nga nakatundan; ini magapadayon sa tingadlaw kag sa tigtulugnaw.

9Ang Ginoo mangin-hari sa bug-os nga duta; sa sadtong adlaw ang Ginoo mangin-isa kag ang iya ngalan isa.

10Ang bug-os nga duta himoon nga kaangay sa Araba kutub sa Geba tubtub sa Rimon sa bagatnan sang Jerusalem. Apang pataason sia kag magapuyo sa iya duug kutub sa Gawang ni Benjamin tubtub sa duug sang nahaunang gawang, tubtub sa Gawang sa Pamusud, kag kutub sa Torre ni Hananel tubtub sa mga linasan sang uvas sang hari.

11Kag ang mga tawo magapuyo sa iya, kay wala na sing pagpakamalaut; ang Jerusalem magapuyo sing malig-on.

12Kag mangin-amo ini ang kalalat-an nga isakit sang Ginoo sa tanan nga mga katawohan nga nagpakig-away sa Jerusalem: ang ila unud mahagas samtang nagatindug sila, ang ila mga mata mahagas sa ila mga boho, kag ang ila mga dila mahagas sa ila mga baba.

13Kag sa sadtong adlaw ang dakung kagahud gikan sa Ginoo manginsa tunga nila, kag magakapyot ang tagsatagsa sa kamut sang iya isigkatawo, kag ang iya kamut magabayaw batok sa kamut sang iya isigkatawo;

14bisan ang Juda man magaaway sa Jerusalem. Kag ang manggad sang tanan nga pungsud sa palibut tiponon sing tingub, ang bulawan, ang pilak, kag ang panapton sa dakung kabugana.

15Kag amo man ang kalalat-an sang kabayo, sang mula, sang camelyo, sang asno, kag sang tanan nga kasapatan nga mangindidto sa sadtong mga dologan subong sadtong kalalat-an.

16Niyan ang tagsatagsa nga nabilin sang tanan nga pungsud nga nag-abut batok sa Jerusalem magataklad tuigtuig sa pagsimba sang Hari, ang Ginoo sang mga kasoldadosan, kag sa paghiwat sang piesta sang mga kayangkayang.

17Kag kon ang bisan sin-o sang tanan sang panimalay sang duta nga wala nagataklad sa Jerusalem sa pagsimba sang Hari, ang Ginoo sang mga kasoldadosan, walay matupa nga ulan sa ila.

18Kag kon ang panimalay sang Egipto indi magtaklad kag indi magkari, indi man ini magtupa sa ila; may kalalat-an nga isakit ang Ginoo sa mga pungsud nga wala nagataklad sa paghiwat sang piesta sang mga kayangkayang.

19Ini manginsilot sa Egipto kag silot sa tanan nga pungsud nga wala magtaklad sa paghiwat sang piesta sang mga kayangkayang.

20Sa sadtong adlaw sa mga kilingkiling sang mga kabayo may, “Balaan sa Ginoo.” Kag ang mga kolon sa balay sang Ginoo manginkaangay sang mga yahong sa atubangan sang halaran;

21kag ang tagsa ka kolon sa Jerusalem kag sa Juda manginbalaan sa Ginoo sang mga kasoldadosan, agud nga ang tanan nga nagahalad magakari kag magakuha sa ila kag lagaan sila. Kag sa sadtong adlaw wala na sing Canaanhon sa balay sang Ginoo sang mga kasoldadosan.

← Chapter 13 Jump to: