bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
2 Chronicles 30
2 Chronicles 30
Ika 2018 Bible
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
1
Eze wụ Hezikaya nọ zi ozi jẹnni Izrẹlụ ile lẹ Juda, dezi ẹkụkwọ-ozi jẹnni ndị Ifrem lẹ Manasẹ; ọ sị wẹ ile bịa Ụlọ-nsọ Osolobuẹ rị Jerusalẹm d'e mẹni Osolobuẹ wụ Chuku Izrẹlụ Mmẹmmẹ-nghafe.
2
Eze lẹ ịhaịmẹ ẹ lẹ Izrẹlụ ile zu imẹ Jerusalẹm kwerigbama nị ifọn nke ẹbụọ kẹ w'e gi mẹ Mmẹmmẹ-nghafe hụ.
3
Asanị wẹ ẹka mẹ ẹ ogẹn wẹ gi e mẹ ẹ, makẹni ndị nchụn-ẹjan fe ẹhụ ebuni ọda, ẹlẹzikwọ ịhịan ile zu imẹ Jerusalẹm.
4
Ogẹn ahụn wẹ kaye a sụọghọ eze lẹ Izrẹlụ ile.
5
Ebẹhụ kẹ wẹ nọ kweri nị wẹ k'a hị a ghagbama alị Izrẹlụ ile — gha Biẹshẹba d'e rukwọrị Danị, sị ịhịan ile bịa Jerusalẹm d'e mẹni Osolobuẹ wụ Chuku Izrẹlụ Mmẹmmẹ-nghafe. Makẹni ebutuni wẹ ọda mẹ mmẹmmẹ hụ kẹ Iwu dọn ku.
6
Kẹ eze dọn ku ẹ, ndị o zi nọ gi ẹkụkwọ-ozi hụ eze lẹ ịhaịmẹ ẹ de ghagbarị Izrẹlụ lẹ Juda ile. Ihiẹn wẹ de wụ: “Ndị Izrẹlụ, kinhẹn ni d'e kunrun Osolobuẹ wụ Chuku Ebraham, Aziki lẹ Izrẹlụ, kẹni o kinhẹn d'e kunrun ụnụ ndị họdụnị, ndị wanahịn ndị-nze Asiria.
7
Anọkwọlẹ ni kẹ ndị nẹdi ụnụ lẹ umunẹ ụnụ, hụn sọnzilẹni Osolobuẹ wụ Chuku ndị nẹdi wẹ, ọ nọ gi wẹ họnrin ihiẹn-ụya kẹ ụnụ dọn nwan rị a hụn a.
8
Ebukwọlẹ ni isi-ikẹn nọkẹ ndị nẹdi ụnụ; humẹni ni Osolobuẹ isi. Bịa nị Ụnọ-nsọ hụn o dọn nsọ jẹnrin ejẹn. Fe ni Osolobuẹ wụ Chuku ụnụ, kẹni olulu ọkụn ọ rị e busọn ụnụ rọ.
9
Ụnụ rogharị femẹzi Osolobuẹ, ndị nwụnrụn umunẹ ụnụ lẹ ụmụ ụnụ k'e mẹni wẹ omikẹn, a nị wẹ wẹ lụakinhẹn alịnị, makẹni Osolobuẹ wụ Chuku ụnụ wụ onyẹ ẹfọma lẹ onyẹ omikẹn. O bupụkọ ụnụ ihun, omẹni ụnụ e rogharị femẹzi ẹ.”
10
Ndị ozi hụ ghasọnmẹ obodo ndị rị imẹ alị Ifrem lẹ Manasẹ rudẹ alị Zẹbulọnụ, kanị wẹ hụ a mụgbu wẹ ẹmụ, e gi wẹ e mẹ ihiẹn ẹmụ.
11
K'osilẹrị, o nwọnghọ ndị Asha, Manasẹ lẹ Zẹbulọnụ welụa enwẹn wẹ alị, shi Jerusalẹm.
12
Ẹka Osolobuẹ rịzịkwọ imẹ ndị Juda, o ye wẹ obi ohu gi mẹ ihiẹn eze lẹ ịhaịmẹ ẹ sị wẹ mẹ nọkẹ kẹ Osolobuẹ dọn sị wẹ mẹ ẹ.
13
Ya igunrun hi-ogbe nọ zu imẹ Jerusalẹm ifọn nke ẹbụọ kẹni wẹ mẹ Mmẹmmẹ brẹdi nwọnlẹni yisti o gi a fụ.
14
E bupụchanrịn wẹ ukpo mmọn ndị rị Jerusalẹm, wepụchanrịn ukpo ndị wẹ nọ a mụnị wẹ nsẹnsi, ma wẹ ye Ọdanmgbugbu Kidrọnụ.
15
Nke akp'ọhịn mmẹnọ imẹ ifọn nke ẹbụọ hụ kẹ wẹ gi gbu nwa-atụnrụn wẹ gi e mẹ Mmẹmmẹ-nghafe. Ya ifẹnrẹn nọ mẹmẹ ndị nchụn-ẹjan lẹ ndị Livaị kelẹni fe ẹhụ, wẹ nọ nwan gwẹrụ fepụ ẹhụ, wẹhẹ ẹjan w'a dụn ọkụn Ụnọ-nsọ Osolobuẹ.
16
Ya wẹ nọ werisọnmẹ ọnọdị wẹ kẹ Iwu Mozizi odibo Chuku dọn ku. Ndị nchụn-ẹjan hụ e fe ẹdeke ẹjan ndị hụ e ye ukpo nchụn ẹjan kẹ ndị Livaị dọn rị e buye wẹ ya.
17
Ebe o mẹni ndị bu ọda imẹ igunrun ahụn efeni ẹhụ, ya ndị Livaị nọ gbuni wẹ ụmụ-atụnrụn wẹ gi bịa d'e mẹ Mmẹmmẹ-nghafe, makẹni asakọ wẹ ẹka gbuni Osolobuẹ atụnrụn wẹ ebe o mẹni wẹ rụ arụ.
18
Imẹ igwerigwe ahụn ghasọnmẹ Ifrem lẹ Manasẹ lẹ Isaka lẹ Zẹbulọnụ bịa, ndị ka ọda efeni ẹhụ, kanị e righọkwọ wẹ Oriri-nghafe hụ, ọsụọn'a nị Iwu sị ndị nọ ẹrịra erikọ a. Wẹ ri ẹ makẹni eze wụ Hezikaya mẹni wẹ ekpere, sị, “Osolobuẹ, Onyẹ hụn rị mma, dodo gbagharị onyẹ ọwụlẹ
19
hụn wepụha obi ẹ n'o fe yụ wụ Chuku, Osolobuẹ hụn wụ Chuku ndị nẹdi ẹ, ọsụọn'a nị ete rịnị wẹ ọchan kẹ Iwu Ụnọ-nsọ dọn ku.”
20
Osolobuẹ nụ ekpere Hezikaya, gbagharị wẹ.
21
Ndị Izrẹlụ hụ ile bịa Jerusalẹm nọ gi okẹn ịghọghọ mẹ Mmẹmmẹ brẹdi nwọnlẹni yisti o gi a fụ. Ọrọgbọ akpọhịn ẹsa kẹ wẹ gi mẹ ẹ; ndị Livaị lẹ ndị nchụn-ẹjan hụ a bụnị Osolobuẹ ẹbụ ụhụọhịn ile, a kpọ ihiẹn-egu wẹ gi a ja Osolobuẹ mma e ye ẹ.
22
Hezikaya nọ ku ndụn ye ndị Livaị obi, makẹni wẹ ghọsị n'a ghọtaghọ wẹ kẹ w'e fe Osolobuẹ ọhụnma. Wẹ nọ ri oriri hụ ọrọgbọ akp'ọhịn ẹsa wẹ gi e ri ẹ, a chụn ẹjan-ekele, a kpanmịn Osolobuẹ, Chuku ndị nẹdi wẹ.
23
Ya wẹ ile rị ebẹhụ nọ kweri nị wẹ mẹzi mmẹmmẹ hụ akp'ọhịn ẹsa. Ya wẹ nọ gi ịghọghọ mẹzi ẹ ọrọgbọ akp'ọkịn ẹsa.
24
Hezikaya wụ eze Juda wepụhanị Izrẹlụ okẹn-efin nnụ-uku lẹ atụnrụn lẹ ewu nnụ-uku ẹsa; ndị-isi e wepụha okẹn-efin nnụ-uku lẹ atụnrụn lẹ ewu nnụ-uku iri. Ndị nchụn-ẹjan fe ẹhụ e bukẹmẹkẹ ọda.
25
Ndị Juda ile hụ a ghọghọ, wẹ lẹ ndị nchụn-ẹjan lẹ ndị Livaị lẹ ndị ile gha Izrẹlụ Ẹbamịn ugu bịa mmẹmmẹ hụ, wẹ lẹ abịamabịa ndị bi Izrẹlụ Ẹbamịn ugu lẹ ndị bi Juda.
26
Okẹn ịghọghọ rị imẹ Jerusalẹm, makẹni ihiẹn nọ ẹrịra emẹtuzini imẹ Jerusalẹm kete Solomọnụ nwa Defidi kịgụ Izrẹlụ.
27
Omẹgụ, ndị nchụn-ẹjan lẹ ndị Livaị nọ wuzo ọtọ, gọzi ndị hụ ile rị ebẹhụ, Osolobuẹ nọ za wẹ ekpere, makẹni ekpere wẹ ru elu-igwee, ebe obibi ẹ hụn rị nsọ.
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36