2 Chronicles 9

Ika 2018 Bible

← Chapter 8 Jump to: Chapter 10 →

1Ogẹn okpoho wụ eze Shẹba gi nụ otiti Solomọnụ, ọ nọ bịa Jerusalẹm d'e gi ajụjụ zeni lele Solomọnụ. O gi okẹn ọghọ bịa, ya lẹ anyịnyan-mkpukpuke o gi buhẹ ihiẹn ichẹn-ichẹn e shin ọhụnma, goru bugbu enwẹn ẹ ọda lẹ ọmụma e gbukeni rị ichẹn-ichẹn w'a chọ achọ. O ru ebahụn, ya lẹ Solomọnụ nọ kuchanrịn oku ihiẹn ile rị a obi.

2Solomọnụ zachanrịn a ụta a ile; onwọnni ihiẹn fụka Solomọnụ ọrụn ịzan'a.

3Ogẹn okpoho hụ wụ eze Shẹba gi hụn amamihiẹn Solomọnụ, hụn obi-eze ọ tụn,

4hụn ihiẹn-oriri rị teburu ẹ, hụn kẹ ịhaịmẹ ẹ a nọdị, hụn idibo ẹ rị ọrụn lẹ ẹwuru wẹ tuerusọnmẹ alị, hụn ndị e buye ẹ manya lẹ ẹwuru wẹ tuerusọnmẹ alị, hụnzị ẹjan ndị w'a dụn ọkụn hụn ọ chụnsọnmẹ Ụlọ-nsọ Osolobuẹ, ndụn nọ gụ a.

5Ọ nọ sị eze wụ Solomọnụ, “Ihiẹn m nụ alị m banyeni oku-ọnụ ị lẹ amamihiẹn i wụ ezioku.

6Egini m ihiẹn wẹ ku dọn d'e runi a bịa m, gi ẹnya m hụn. Ezioku-ezioku, ihiẹn ile wẹ gwa m banyeni amamihiẹn i erudẹni ahanmahan ihiẹn m hụn; y'a karịkẹnmẹkẹ ihiẹn wẹ gwa m.

7Ndị nke i e nwọnkẹ ngọzi! Idibo i hụn e wuzo ihun i ogẹn ile a nụ oku i gi amamihiẹn i e ku e nwọnkẹ ngọzi!

8Ịja-mma ya rịnị Osolobuẹ wụ Chuku i, hụn ihiẹn ị sụọ, ọ nọ bu i che ukpo ẹ, n'ị hụn ụzọ wụrụ eze, a kịnị Osolobuẹ wụ Chuku i. Ufiri ni ihiẹn ndị Izrẹlụ sụọ Chuku i lẹ n'ọ chọ n'o mẹ wẹ turu jẹnrin ejẹn haịn o gi kin i eze wẹ, n'ị hụn ụzọ mẹ ezioku lẹ ezi-omumẹ weri ọnọdị.”

9Ọ nọ ye eze wụ Solomọnụ ẹkpa goru uku ọgụn-isin (120) lẹ ihiẹn ndị e shin ọhụnma hini lẹ ọmụma e gbukeni w'a chọ achọ hụn bu ọda. Ihiẹn e shin ọhụnma han kẹ hụnnị okpoho wụ eze Shẹba ye Eze wụ Solomọnụ arịtuni imẹ Izrẹlụ.

10(Idibo Hiram lẹ idibo Solomọnụ a ghazịghọ Ofiri buhẹ goru; wẹ buhẹzi osisi al'gumu (al'mugu) w'a chọ achọ lẹ ọmụma-ọma ichẹn-ichẹn e gbukeni w'a chọ achọ.

11Solomọnụ gi osisi al'gumu ndị ahụn mẹmẹ mgbanyinrin wẹ gi e nyinban Ụlọ-nsọ Osolobuẹ lẹ mgbanyinrin obi-eze, gizi ẹ mẹmẹni ndị a kụ egu ụbọ-hapụ lẹ ụbọ-layẹ. Ahụntuni wẹ ihiẹn nọ kẹ wẹ imẹ Juda.)

12Eze wụ Solomọnụ ye eze-okpoho Shẹba ihiẹn ile ọ chọ lẹ ihiẹn ọ rịọ a; ihiẹn Solomọnụ ye ẹ ka ihiẹn o wẹhẹni Solomọnụ. Ọ nọ lama, lashi alị a, ịya lẹ ihu ẹ.

13Goru Solomọnụ e nwọnhẹn ahụa-ahụa wụ ẹkpa uku isin kwasị ọgụn-mmẹtọ kwasị nnụ (666),

14cheni hụn ndị rị a gha alị a lẹ ndị-afịa a tụha; ndị nze ile rị alị Arebịa lẹ ndị gọvanọ rị a kịn'a alị hụ e wẹhẹsọnmẹzini Solomọnụ goru lẹ siliva.

15Solomọnụ gi goru mẹmẹ akpaịn ọgụn-iri shịanị, akpụrụ goru ọgụn-iri kwasị nnụ wụ kilo isin lẹ mkpikpi kẹ wẹ gi kpụ akpaịn ohu-ohu.

16O gizi goru mẹmẹ akpaịn ndị-nta ọgụn mmisẹn, akpụrụ goru ọgụn-mmisẹn wụ kilo ẹtọ lẹ hụn rulẹni mkpikpi kẹ wẹ gi kpụ akpaịn ndịnị ohu-ohu. Obi-eze ẹ wụ “Obi-eze Ẹgboko Lẹbanọnụ” kẹ eze butọ wẹ.

17Eze rụn ukpo-eze hi ogbe wẹ nyanyesọnmẹ eze-enyi ebe w'a nọdị rịn'a, gi ezigbo goru nyan ẹhụ a.

18Mkpọnyin isin kẹ w'e nyinrin d'a nọdị alị ukpo-eze ahụn; ukpo-eze ahụn nwọn ihiẹn-goru rịn'a w'a tụkwasị ụkụ hụn wẹ rụngbama ya lẹ ịya. Ẹka rị ocho ahụn ụsụọnị lẹ ụsụọnị; ẹwọrọ ohu-ohu wẹ kpụ wuzo ụsụọ ohu-ohu.

19Ẹwọrọ mmẹbụọ wẹ kpụ wuzo mkpọnyin isin ahụn wẹ gha e nyinrin ukpo-eze hụ, ohu-ohu rịsọnmẹ mgbanyinrin ndị hụ isini lẹ isini. Emẹmẹtuni wẹ ihiẹn nọ ẹrịra imẹ alị-eze ọzọ.

20Mkpu ile eze wụ Solomọnụ nwọn wụchanrịn ezigbo goru wẹ buchelẹni ihiẹn ọzọ; arịa ile rị imẹ obi-eze ẹ w'a kpọ “Obi-eze Ẹgboko-Lẹbanọnụ” wụchanrịn goru. Onwọnni hụn wẹ gi siliva rụn, makẹni onwọnkẹni ihiẹn ọnụ kpọ siliva ogẹn Solomọnụ.

21Eze wụ Solomọnụ nwọn igunrun ụgbọ-mirin wẹ gi a zụ afịa hụn idibo eze Taya wụ Hiram a nyann'a. Ahụa ẹtọ-ẹtọ kẹ ụgbọ-mirin ndị ahụn gi a lụa, e bulụa goru, siliva, eze-enyi lẹ ọzọ lẹ adaka.

22Eze wụ Solomọnụ kachanrịn ndị-nze ile rị enu-ụwa ọdanfịn e hi, ka wẹ amamihiẹn e nwọn.

23Ndị-nze ile rị ụwa a chọ nị wẹ gọn Solomọnụ ntịn, kẹni wẹ nụ amamihiẹn Chuku buche imẹ ẹ hụn rị a gha a ọnụ a pụha.

24Ahụa ile, ndị rị a bịanị hụ e wẹhẹn'ẹ ihiẹn siliva lẹ ihiẹn goru lẹ ẹwuru lẹ ihiẹn-ọgụn lẹ ihiẹn ndị e shin ọhụnma lẹ ẹshin lẹ mulu hụn ẹshin lẹ jaki gba mụ.

25Solomọnụ nwọn ụlọ nnụ-iri (4,000) w'e dọnmẹ ẹshin lẹ ụgbọ-ẹshin, lẹzi ẹshin nnụ-uku ọgụn-isin (12,000) o butọ imẹ obodo ichẹn-ichẹn o butọ ụgbọ-ẹshin lẹ imẹ Jerusalẹm ebe ya lẹ enwẹn ẹ rị.

26Solomọnụ kịchanrịn ndị-nze ile rị gha Iyi-Yufretisi d'e ru alị ndị Filistia d'e rukwọrị okẹn ịya lẹ alị Ijiptu.

27Solomọnụ mẹ siliva jun Jerusalẹm kẹ ọmụma dọn jun ebẹhụ; o mẹ osisi sida barahị kẹ osisi sikamọ dọn barahị ibẹka Shẹfẹla rị ukun ugu.

28Alị Ijiptu lẹ alị ndị ọzọ ile kẹ Solomọnụ gha e ṅọnhẹn ẹshin.

29Ihiẹn ndị ọzọ hụn mẹ kẹ Solomọnụ rị a kị, gha mbidọn d'e ru ọgụgụ, rịsọnmẹ imẹ ẹkụkwọ Natanị onyẹ amụma detọ ihiẹn lẹ ebe wẹ detọ amụma Ahija onyẹ Shilo bu lẹ ebe wẹ detọ ọhụn Ido hụn a hụn ọhụn hụnsọnmẹ banyeni Jerobụam nwa Nebatị.

30Ahụa ọgụnnaị kẹ Solomọnụ nọ imẹ Jerusalẹm kị Izrẹlụ ile.

31Ọ nọ nwụnhụn, laburu ndị nẹdi ẹ, wẹ nọ li ẹ ye imẹ Obodo Defidi. Nwa a wụ Rehobụam nọ rikin ẹ eze.

← Chapter 8 Jump to: Chapter 10 →