1 Corinthians 10

Ilokano (Ti Biblia (1973))

← Chapter 9 Jump to: Chapter 11 →

1Ta diac cayat a dicay maammoan, cacabsat, a dagidi ammatayo addada amin iti baba ti ulep, ket bimmaliasatda amin iti uneg ti taaw;

2Ket nabautizaranda amin ken Moises iti ulep ken iti baybay;

3Ket nanganda amin iti daydiay met la a pagtaraon a naespirituan;

4Ket imminumda amin iti daydiay met la nga inumen a naespirituan; ta imminumda iti daydiay a bato a naespirituan a sumursurot cadacuada idi: ket daydi a bato isu idi ni Cristo.

5Nupay casta, ti Dios saan a naayayo cadagiti ad-adu cadacuada; ta napucawda idiay let-ang.

6Ket dagidi a banbanag isuda dagiti ulidan cadatayo, tapno ditay aguman dagiti banbanag a dakes, a cas ti panagagumda.

7Dicay met agrucbab cadagiti ladladawan a cas cadagidi dadduma cadacuada; cas adda a naisurat; Nagtugawda dagiti umili a mangan ken uminum, ket timmacderda a nagay-ayam.

8Ditay met makikamalala, a cas inaramid dagiti dadduma cadacuada, ket iti maymaysa nga aldaw napasag dagiti duapulo ket tal-lo a ribo.

9Ditay met ruroden ti Apo, cas inaramid dagiti dadduma cadacuada, ket natayda gapu cadagiti ululeg.

10Dicay agtanabutob, cas cadagiti dadduma cadacuada a nagtanabutobda, ket natayda gapu iti agpapatay.

11Ket dagitoy a banbanag naaramidda cadacuada a pagulidanan ket naisuratda tapno pacabagbagaantayo, a dimtengen dagiti panungpalan dagiti aldaw.

12Gapuna, ti mangipagarup nga adda a sitatacder, kitaenna ta di maiculbo.

13Saan nga immay cadacayo ti uray ania a pannacasulisog a di met simro cadagiti isu-amin a tattao: ngem ti Dios mapagtalcan isu a dinto mangipalubos a masulisogcayo iti aglabes iti mabalinanyo; no di ket, maigiddanto iti pannacasulisog, isaganananto met ti dalan a paglissian, tapno mabalinyo a pagballigian.

14Gapuna, ay-ayatec, pumanawcayo iti panagrucbab cadagiti ladladawan.

15Agsaoac cadacayo a cacas la mamasirib; ipatoyo ti sao-ec.

16Ti copa ti bendicion a bendicionantayo, saan aya nga isu ti pannacairaman iti dara ni Cristo? Ti tinapay a pisientayo, saan aya nga isu ti pannacairaman iti bagi ni Cristo?

17Agsipud ta adda maymaysa a tinapay, datayo idinto nga adutayo, maymaysatayo a bagi; ta mairamantayo amin iti daydiay maymaysa a tinapay.

18Kitaenyo ni Israel cas iti lasag: Dagiti mangan cadagiti datdaton, saanda aya a mairaman iti altar?

19Ania ngarud ti cunac? a ti maidaton cadagiti ladladawan adda capapay-anna? wenno ti ladawan adda capapay-anna?

20Awan, no di ket dagiti banbanag nga idaton dagiti Gentil, idatonda ida cadagiti sairo, a saan nga iti Dios: ket diac cayat nga adda pacairamananyo cadagiti sairo.

21Saanyo a mabalin ti uminum iti copa ti Apo ken iti copa dagiti sairo. Saanyo a mabalin ti mairaman iti panganan ti Apo ken iti panganan dagiti sairo.

22Wenno gargarientayo aya nga agimun ti Apo? Napigpigsatayo aya ngem isu.

23Dagiti amin a banag maipalubosda ngem saanda a maipaay amin. Dagiti amin a banag maipalubosda, ngem saanda a maipaay amin a mamatibker.

24Awan coma ti agagawa iti cabucbucudanna no di ket iti pagimbagan ti sabali.

25Isu-amin a malaco iti paguragaan, canenyo; a dicay agin-intuud a gapu iti conciencia?

26Ta ti Apo cucuana ti daga ken dagup ti aglasud kencuana.

27No awisennacayo ti maysa cadagiti saan a mamati, ket cayatyo ti mapan, dagup ti isangoda cadacayo, kanenyo, a dicay agsalsaludsud a gapu iti conciencia.

28Ngem no adda agsaonto cadacayo: Daytoy naidaton iti altar: saanyo a canen, gapu iti daydiay nangibaga, ken gapu iti conciencia.

29Ti conciencia, cunac, saan a ti concienciam no di ket ti concienciana; ta apayapay maocomto ti wayawayac gapu iti conciencia ti sabali?

30No mairamanac a siyayaman iti Dios, apayapay mababalawacto gapu iti daydiay pagyamanac?

31Gapuna, uray mangancayo, uray uminumcayo, wenno uray ania nga aramidenyo, aramidenyo amin a maipaay iti dayaw ti Dios.

32Saancay coma nga agbalin a pacaiculboan, uray cadagiti Judio, uray cadagiti Griego, uray iti Iglesia, ti Dios:

33A cas met caniac iti isu-amin agawaac nga ay-ayoen dagiti amin a tattao, a saanco a sapulen ti paglaingac, no di ket ti paglaingan dagiti adu, tapno isuda maisalacanda.

← Chapter 9 Jump to: Chapter 11 →