1 Corinthians 13

Ilokano (Ti Biblia (1973))

← Chapter 12 Jump to: Chapter 14 →

1No agsaoac coma agraman cadagiti dildila dagiti tattao, ken dagiti angel, ngem awan coma ti ayatco, nagbalinac coma a cas bronce nga aguni, wenno piangpiang nga umaweng.

2Ket no cupicupac coma ti talunggading ti pammadto, ket ammoc coma dagiti isu-amin a palimed, ken ti amin a sirib; ket no cupicupac coma ti isu-amin a pammati, a mabalinco coma a garawen dagiti banbantay, ngem awan ti ayatco, awan met pategco.

3Ket no iwarasco coma dagiti isu-amin a cucuac tapno maipacan cadagiti napanglaw, ket no yawatco coma toy bagic tapno mapuuran, ngem awan ti ayatco, awan coma ti magonggonac.

4Ti ayat managitured ken nalaing; ti ayat awan apalna; ti ayat saan a napasindayag, saan a natangsit,

5Saan a naalas ti panagcucuana, saan nga aginbubucodan, saan nga aglucsaw, saanna nga icancano ti maysa a pannacaranggas;

6Saanna a pagragsacan ti kinakillo, ngem makipagrag-o iti kinapudno;

7Isu-amin sagabaenna, isu-amin patienna, isu-amin inanamaenna, isu-amin ituredna.

8Ti ayat saan a maibus uray caano: uray pay dagiti padpadto manungpaldanto ket dagiti dildila agsardengdanto; ken ti sirib mapucawto.

9Ta ammotay ti dadduma a paset, ket padtoantay ti dadduma a paset;

10Ngem inton umay daydiay kinaananay, daydiay kinacurang mapucawto.

11Idi ubingac, nagsasaoac a cas la ubing, nagricricnaac, nagpanunutac a cas la ubing; ngem idi nacagtengacon a tao, binaybay-ac dagiti inuubingan a banbanag.

12Ta ita cumitatayo a sicucudrep babaen ti maysa a sarming, ngem intono cuan, rupanrupanton; ita ammoc ti dadduma a paset, ngem intono cuan naananayton ti pannacaammoc, a cas met ti pannacaammona caniac.

13Ket ita mataginayon ti pammati, ti inanama, ti ayat, dagitoy a tal-lo; ket ti cadackelan cadacuada isu ti ayat.

← Chapter 12 Jump to: Chapter 14 →