1 Corinthians 8

Ilokano (Ti Biblia (1973))

← Chapter 7 Jump to: Chapter 9 →

1No maipapan cadagiti maidaton cadagiti ladladawan a didiosen: Ammomi a datay amin adda siribtayo. Ti sirib mamagtangsit, ngem ti ayat mamaglaing.

2Ket no panunuten ti maysa nga adda bassit ammona, awan pay ti ammona cas iti rebbengna a panangammo;

3Ngem no ti maysa ayatenna ti Dios, daytoy a tao naammoan ti Dios,

4No maipapan ngarud iti pannangan cadagiti maidaton cadagiti ladladawan a didiosen, ammomi a ti ladawan a didiosen awan papaayna ditoy lubong, ket awan Dios no di maymaysa.

5Ta uray no adda dagiti naganenda a didios idiay langit, wenno ditoy daga a cas la ket tay aduda dagiti didios ken adu dagiti apappo;

6Ngem cadatayo adda maymaysa a Dios, ti Ama nga paggapuan dagiti isu-amin a banag, ket datayo maipaaytayo kencuana; ken maymaysa nga Apo, ni Jesu-Cristo, a gapu kencuana adda dagiti isu-amin a banag, ken gapu kencuana addatayo,

7Ngem, daytoy a pannacaammo awan cadagiti isu-amin; ta agingga ita dagiti dadduma a nairuam cadagiti ladladawan a didiosen, manganda cadagiti sidsida a naidaton a cas naidaton iti maysa a ladawan a didiosen; ket ti nakemda, idinto a nacapuy, matulawan.

8Ngem ti pagtaraon saan nga isu ti mangitalec cadatayo iti Dios: saantayo a dacdakes no ditay mangan, ket saantay met a nasaysayaat no mangantayo.

9Ngem agannadcayo, di la ket ta daytoy a wayawayayo agbalin a pacaiculboan dagiti nacapuy.

10Ta no adda macakitanto kenca, nga adda siribmo, a makipanganca idiay simbaan dagiti ladladawan a didiosen, ti nakemna no nacapuy dinto aya mapabileg a mangan cadagiti sidsida a naidaton cadagiti ladladawan?

11Ta gapu iti siribmo mabalin a madadael a nacapuy, ti cabsat a nacaigapuan ni Cristo a natay.

12Ket idinto nga agbasolcayo iti castoy a macadadael cadagiti cacabsat, ket sugatenyo ti nakemda a nacapuy, agbasolcayo, iti maisalungasing ken Cristo.

13Gapuna, no ti pagtaraon iculbona ti cabsatco, saanacto nga agsida ti lasag iti uray caanoman, tapno diac maiculbo ti cabsatco.

← Chapter 7 Jump to: Chapter 9 →