1 Corinthians 5

Ilokano (Ti Biblia (1973))

← Chapter 4 Jump to: Chapter 6 →

1Maipadpadamagen nga adda mannakicamalala cadacayo, ket iti casta a kita ti pannakicamalala uray cadagiti Gentil awan, a ti maysa cadacayo cupicupanna ti asawa ni amana.

2Ket dacayo agtangsitcayo, idinto a rebbengyo coma ti agladingit tapno maiccat coma iti tengngayo ti nagaramid iti castoy.

3Ta siac, iti kinapudnoanna, uray awanac cadacayo, sisasango ti nakemco, Ket daydiay nakingapuanan iti castoy nga aramid, cas la addaac a sisasango, impatocon,

4Gapu iti nagan ni Apotayo a Jesus, idinto a naggigimongcayo ken ti nakemco, gapu iti pannacabalin ni Apotayo a Jesus,

5Dayta mayawat coma ken Satanas, a maipaay a pacapucawan ti linalasag, tapno ti cararua maisalacan inton aldaw ni Apo Jesus.

6Saan a nasayaat ti pagtangsitanyo. Dicay ammo aya a ti bassit a levadura banglesenna ti amin a masa?

7Ugasanyo cadacayo ti baac a levadura, tapno agbalincayo a baro a masa, ta awanen ti levadurayo: ta naidaton met ti Pascuatayo, nga isu ni Cristo:

8Iti casta ngarud ngilinentayo ti fiestatayo; saan a buyugen ti baac a levadura, saan met nga iti levadura ti panagipato ti dakes ken ti kinadakes, no di ket iti awan levadurana a tinapay ti kinadalus ti nakem ken kinapudno.

9Insuratco cadacayo idi suratco, a dicay coma makicadcaddua cadagiti mannakicamalala;

10Ngem saan a dagiti mannakicamalala ditoy lubong, dagiti naagum, dagiti managpaanac, dagiti agrucbab cadagiti ladladawan: ta no casta, masapulyonto ti pumanaw ditoy lubong:

11Ngem ita, insuratco cadacayo a dicay makicadcaddua iti uray siasino nga managanan cabsat, no isu mannakicamalala wenno naagum, wenno agrucbab cadagiti ladawan, wenno managsao ti dakes, wenno managbartec, wenno nagarumugam; iti casta a tao, uray makipangan kencuana, saan.

12Ta ania ti rebbengco a mangocom cadagiti taga ruar? Saan aya a dacayo ti mangocom cadagiti taga uneg?

13Ngem dagiti taga ruar ocomen ida ti Dios. Iccatenyo ngarud daydiay tao a dakes iti tengngayo.

← Chapter 4 Jump to: Chapter 6 →