1 Corinthians 16

Ilokano (Ti Biblia (1973))

← Chapter 15 Jump to:

1No maipapan iti maurnong a maipaay cadagiti sasanto, cas imbilinco cadagiti Iglesia ti Galacia, aramidenyo met ti casta.

2Tunggal umuna nga aldaw ti lawas, tunggal maysa cadacayo, mangilasin ti idulinna cas iti irarangaynanto, tapno intono umayac, saanto a masapul ti agurnong.

3Ket intono dumtengac, ibaonconto dagidiay anamunganyonto babaen cadagiti surat, tapno ipanda ti paraburyo idiay Jerusalem;

4Ket no maicarinto a mapanac met, makicuyogdanto caniac.

5Ngem umayacto cadacayo inton masarungcarac ti Macedonia; ta masapulco a pagnaen ti Macedonia.

6Ket nalabit makipaggianacto cadacayo, ken aggianac pay iti calamecna, tapno dacayo idalandac iti uray sadino a masapul a papanac.

7Ta diac cayat a makitacayo ita a labasan; ta inanamaec ti agtaeng, iti sumagmamano nga aldaw cadacayo, no ipalubos ti Apo.

8Ngem agsardengacto idiay Efeso agingga iti Pentecostes;

9Ta naluctan caniac ti maysa a ruangan a dackel ken paglaingan, ket dagiti cabusor aduda.

10Ket no umayto ni Timoteo, kitaenyo tapno aggian cadacayo a di agbutbuteng; ta isu aramidenna ti aramid ti Apo, a cas caniac:

11Awan ngarud ti mangumsi kencuana; ngem isu idalanyo a sitatalna, tapno umay caniac: ta isu ururayec agraman dagiti cacabsat.

12Ngem no maipapan ken cabsat nga Apolos, nagdawatac unay kencuana tapno umay idi cadacayo a makikuyog cadagiti cacabsat, ket dina cayat ti umay ita, ngem umayto intono adda pannacaipaayna.

13Agsalucagcayo, agtalinaedcayo a sititibker iti pammati, agbiagcayo a siiingel, napigsacayo coma.

14Maaramid coma dagiti isu-amin nga aramidyo a buyugen ni ayat.

15Dawatec cadacayo, cacabsat, (ammoyo a dagiti cabbalay ni Estefanas, isuda ti immun-una a bungbunga ti Acaya, ket indatonda ti bagida iti panagservi cadagiti sasanto),

16A paiturayancayo cadacuada ken iti tunggal maysa a tumulong ken agbannog.

17Ket agragsacac gapu iti iyaay ni Estefanas, ken ni Fortunato ken ni Acaico; ta ti nagcuranganyo, pinunnoanda.

18Ta rinagragsacda ti nakemco ken ti nakemyo: Bigbigenyo ngarud dagiti cacasta.

19Cablaawandacayo dagiti Iglesia ti Asia. Da Aquila ken Prisca cablaawandacayo unay iti Apo, agraman ti Iglesia nga adda iti balayda.

20Isu-amin dagiti cacabsat cablaawandacayo. Agkikinnablaawcayo iti maysa ken maysa a buyugan ti nasantoan nga agep.

21Ti cablaawco, insurat toy imac met laeng, Pablo.

22No adda di agayat ken Apo Jesu-Cristo, mapagtalaw coma. Ti Apo umay coma.

23Ti parabur ni Apo Jesu-Cristo agtaeng coma cadacayo.

24Agtaeng coma ti ayatco cadacayo amin ken Jesu-Cristo. Amen.

← Chapter 15 Jump to: