1 Corinthians 12

Ilokano (Ti Biblia (1973))

← Chapter 11 Jump to: Chapter 13 →

1Ket no maipapan cadagiti naespirituan a parparabur, cacabsat, diac cayat a dicay maammoan.

2Ammoyo nga idi Gentilcayo, naipancayo cadagiti ladladawan nga awan timecda, a cas iti pannacaidalanyo.

3Gapuna ipacaammoc cadacayo, nga awan ti tao, nga idinto nga agsao babaen ti Espiritu Santo a ni Jesus isu ti anatema; ket awan ti macabalin nga agsao a ni Jesus isu ti Apo, no di babaen ti Espiritu Santo.

4Ngem adda pagdudumaan dagiti parparabur ngem maymaysa ti Espiritu.

5Ket adda agduduma a panagaywan, ngem maymaysa ti Apo.

6Ket adda agduduma a panagaramid, ngem isu met laeng a Dios, ti agaramid amin cadagiti isu-amin.

7Ngem maited iti tunggal maysa ti paltiing ti Espiritu a maipaay a paglaingan.

8Ta gapu iti Espiritu, maited ti sao ti kinasirib iti maysa: ket iti sabali ti sao ti pannacaammo, gapu iti isu met laeng nga Espiritu;

9Iti sabali, maited ti pammati, gapu iti isu met laeng nga Espiritu; iti sabali dagiti talunggading ti panangagas, gapu iti maymaysa met laeng nga Espiritu;

10Iti sabali maited dagiti pannacabalin nga agaramid cadagiti datdatlag; iti sabali ti panangascasaba; iti sabali ti panagilasin cadagiti espiritu; iti sabali nadumaduma a kita dagiti pagsasao; iti sabali ti panagipatarus cadagiti sasao:

11Ngem isu-amin dagitoy a banbanag gapuanan ida daydiay maymaysa ken isu met laeng nga Espiritu, nga agibunong iti tunggal maysa cas iti cayatna.

12Ta cas iti bagi maymaysa ngem adu dagiti camcamengna, ket isu-amin dagiti camcameng, idinto nga aduda, maymaysada a bagi, castamet ni Cristo.

13Ta gapu iti maymaysa nga Espiritu datay amin nabautizarantayo, iti panagmaymaysa a bagi, uray Judio wenno Griego tayo; uray paad-adipen wenno agwayawaya; ket datay amin napainumtayo iti maymaysa nga Espiritu.

14Ta ti bagi saan nga maymaysa a cameng, no di ket adu.

15No cunanto ti saca: Gapu ta saanac nga ima, saannac a canayon ti bagi; saan ngarud a gapu itoy saanen a canayon ti bagi.

16Ket no cunaento ti lapayag: Gapu ta saanac a mata, saannac a canayon; saan ngarud a gapu itoy saanen a canayon ti bagi.

17No ti amin a bagi mata coma, adino coma ti yan ti pagdengngeg? No amin a bagi lapayag coma, adino coma ti yan ti pagangot?

18Ngem kinapudnona, ti Dios insaadna ti tunggal maysa a camcameng iti bagi, cas iti kinayatna.

19No ngarud no isuda amin maymaysada coma a cameng, adino como ti yan ti bagi?

20Ngem ita dagiti camcameng aduda, ngem maymaysa ti bagi.

21Ket saan a mabalin ti mata a sao-en iti ima: Awan pacasapsapulac kenca; saan met a cunaen ti olo cadagiti sacsaca: Awan pacasapsapulac cadacayo.

22Ngem nangnangrona ketdi a masapul dagidiay camcameng a pagarupen nga nacapuy unay:

23Ket dagidiay camcameng ti bagi a pagarupentayo nga nacurcurang ti dayawda, ad-addada nga idaydayawtayo unay; ket dagiti camcamengtayo a nalaad, ad-adda ti pannacatarimaanda;

24Idinto a dagiti camcameng a nalibnos awan ti pacasapsapulanda; ngem ti Dios inurnosna ti bagi nga iniccanna ti dacdackel a dayaw daydiay camcameng nga agcurang;

25Tapno awan coma ti panagsisina iti bagi, no di ket dagiti camcameng agsisinnakitda iti maysa ken maysa.

26Ket no agsagaba ti maysa a camcameng, agsagabada coma a mairaman kencuana dagiti isu-amin a camcameng; ket no agnam-ay ti maysa a camcameng, dagiti isu-amin a camcameng makipagragragsacda coma kencuana.

27Dacayo ngarud ti bagi ni Cristo, ket tunggal maysa cadacayo camcamengna.

28Ket ti Dios insaadna iti Iglesia, umuna dagiti apostol, maicadua dagiti mangascasaba, maicatlo dagiti mannursuro, sumaganad datdatlag, sumaganad dagiti talunggading ti panangagas, ti itutulong, ti panangituray, ken kitkita dagiti pagsasao.

29Apostolda amin? mangascasabada amin? mannursuroda amin? mannacabalinda amin?

30Addaanda amin ti taltalunggading ti panangagas agsaoda amin iti nadumaduma a pagsasao? agipatarusda amin?

31Ngem tarigagayanyo a sirarayray dagiti casayaatan a talunggading. Ket maysa a dalan a nasaysayaat pay ipakitac cadacayo.

← Chapter 11 Jump to: Chapter 13 →