Numbers 3

Ilokano (Ti Biblia (1973))

← Chapter 2 Jump to: Chapter 4 →

1Dagitoy ita dagiti capcaputotan ni Aaron ken ni Moises iti aldaw a pannakisao idi ni Jehova ken Moises idiay bantay Sinai.

2Ket dagitoy dagiti nagnagan dagiti annac a lallaki ni Aaron: Ni Nadab nga inauna, ni Abiu, ni Eleazar, ken ni Itamar.

3Dagitoy dagiti nagnagan dagiti annac a lallaki ni Aaron, dagiti papadi a napolotan, isuda a kinonsagrarna nga agannong iti takem ti padi.

4Ket ni Nadab ken ni Abiu natayda iti saclang ni Jehova idi nangidatonda iti apuy a sabali iti sango ni Jehova idiay let-ang ti Sinai, ket ni Eleazar ken ni Itamar nagannongda iti takem ti padi iti imatang ni Aaron nga amada.

5Ket ni Jehova nakisao ken Moises, a kinunana,

6Yasidegmo ti caputotan ni Levi, ket ipanmo ida iti sango ni Aaron a padi tapno agservida kencuana.

7Ket isuda salimetmetandanto ti italecna ken ti italec ti dagup ti gimong iti sango ti tolda ti gimong tapno aramidenda ti annongen iti tabernaculo.

8Ket isuda aywanandanto amin dagiti al-alicamen ti tolda ti gimong, ken ti italec dagiti annac ti Israel, a panagservi iti tabernaculo.

9Ket sica itedmonto dagiti Levitas ken Aaron, ken cadagiti annacna a lallaki: isuda maiteddanto amin kencuana iti biang dagiti annac ti Israel.

10Ket tudingamto ni Aaron ken dagiti annacna a lallaki, ket salimetmetandanto ti kinapadida: ket ti gangannaet nga umasideg mapapatayto.

11Ket ni Jehova nagsao ken Moises, a kinunana,

12Ket adtoy, siac, innalac dagiti Levitas cadagiti annac ti Israel a sucat dagiti amin nga inauna nga anac, a manglucat iti aanacan cadagiti annac ti Israel; ket dagiti Levitas isudanto ti cucuac:

13Ta amin nga inauna nga anac cucuac ida; idi aldaw a panangcabilco iti isu-amin nga inauna nga anac iti daga nga Egipto, a pinasantoca maipaay caniac ti dagup ti inauna nga anac iti Israel, tao man ken animal; cucuacto ida: siac ni Jehova.

14Ket ni Jehova nakisao ken Moises idiay let-ang ti Sinai, a kinunana.

15Bilangem dagiti annac ni Levi cadagiti balbalay dagiti ammada, cadagiti finamfamilia cadacuada: tunggal lalaki nga agtawen manipud iti maysa a bulan ken agpangato bilangem ida.

16Ket ni Moises binilangna ida cas iti sao ni Jehova, cas naibilin kencuana.

17Ket dagitoy dagiti annac a lallaki ni Levi iti nagnaganda: ni Gerson, ni Coat ken ni Merari.

18Ket dagitoy ti nagnagan dagiti annac ni Gerson iti finamfamiliada; ni Libni ken ni Simei.

19Ket dagiti annac a lallaki ni Coat iti finamfamiliada: ni Amram, ni Izhar, ni Hebron, ken ni Uziel.

20Ket dagiti annac a lallaki ni Merari iti finamfamiliada: ni Mahali ni Musi. Dagitoy isuda dagiti famfamilia dagiti Levitas a mayannurot cadagiti balbalay dagiti ammada.

21Iti Gerson adda idi ti familia dagiti Libnitas ken ti familia dagiti Semitas: dagitoy isuda ti famfamilia dagiti Gersonitas.

22Dagidiay a nabilang cadacuada a mayannurot iti bilang ti amin a lallaki nanipud agtawen iti maysa a bulan ken agpangato, a dagidiay met laeng nabilang cadacuada, pito a ribu ket lima a gasutda.

23Dagiti famfamilia dagiti Gersonitas agpacarsodanto iti licudan ti tabernaculo iti bangirna iti laud.

24Ket ti pangolo ti balay dagiti amma dagiti Gersonitas isunto ni Eliasaf nga anac a lalaki ni Lael.

25Ket dagiti annac a lallaki ni Gerson iti tolda ti gimong aywanandanto ti tabernaculo, ken ti Tolda ken linungna ken ti bengbe iti ruangan ti tolda ti gimong.

26Ken dagiti cortina ti parangan nga adda iti sikigan ti tabernaculo, ken iti sikigan nga aglawlaw ti altar, ken dagiti lublubidna a maipaay iti amin a pacaiservianna.

27Ket iti Coat adda idi ti familia dagiti Amramitas, ken ti familia dagiti Izeharitas, ken ti familia dagiti Hebronitas, ken ti familia dagiti Ozielitas: dagitoy isuda dagiti famfamilia dagiti Coatitas.

28Cas mayannurot iti bilang ti amin a lalaki, manipud agtawen iti maysa a bulan ken agpangato, adda walo a ribu ket innem a gasutda a mangaluad iti pannacaaywan ti santuario.

29Dagiti famfamilia dagiti annac a lallaki ni Coat agpacarsodanto iti sikigan nga abagatan ti tabernaculo.

30Ket ti pangolo cadagiti balbalay dagiti amma dagiti famfamilia dagiti Coatitas isunto ni Elizefan nga anac a lalaki ni Uzziel.

31Ket aywanandanto ti lacasa, ken ti lamisaan, ken ti candelero, ken dagiti alaltar, ken dagiti vasvaso ti santuario a pagannonganda, ken ti abbong ken amin nga al-alicamenna.

32Ket ni Eleazar nga anac a lalaki ni Aaron a padi isunto ti pangolo dagiti pangpangolo dagiti Levitas ket imatonanna ida a mangsalsalimetmet ti pannacaaluad ti santuario.

33Iti Merari adda idi ti familia dagiti Mahalitas, ken ti familia dagiti Musitas: dagitoy isuda dagiti famfamilia ni Merari.

34Ket dagidiay nabilang cadacuada a mayannurot iti bilang ti amin a lalaki, nanipud agtawen iti maysa a bulan ken agpangato, innem a ribu ket duagasutda.

35Ket ti pangolo ti balay dagiti amma dagiti famfamilia ni Merari isu idi ni Suriel nga anac a lalaki ni Abihail: isudanto ti agpacarso iti akinamianan a sikigan ti tabernaculo.

36Ket ti natuding nga aywanan dagiti annac ni Merari isunto dagiti tabtabla ti tabernaculo, ken dagiti balbalunetna, ken dagiti adadigina, ken dagiti batbatayna, ken amin nga ar-aruatna, ken amin nga iservi kencuana;

37Ken dagiti adadigi ti paraangan nga aglawlaw ken dagiti batbatayda, ken dagiti paspasocda ken dagiti lublubidda.

38Ket dagiti agpacarso iti sango ti tabernaculo iti daya a sangoanan ti tolda ti gimong nga agpaleleggacan ti init, isudanto da Moises ken Aaron, ken dagiti annacna a lallaki a mangaluad ti pannacaaywan ti santuario nga aywanan dagiti annac ti Israel; ket ti gangannaet nga umasideg mapapatayto.

39Amin dagiti nabilang cadagiti Levitas a binilang da Moises ken Aaron iti panagbilin ni Jehova, a finamfamiliada dagup dagiti lallaki nanipud iti maysa a bulan ken agpangato duapulo ket dua a ribuda.

40Ket ni Jehova kinunana ken Moises, Bilangem amin nga inauna nga annac a lallaki cadagiti annac ti Israel, manipud iti agtawen iti maysa a bulan ken agpangato, ket alaem ti bilang dagiti nagnaganda.

41Ket alaemto nga agservi caniac dagiti Levitas (siac ni Jehova) a sunoanda dagiti isu-amin nga inauna nga annac cadagiti annac ti Israel; ken ti an-animal dagii Levitas a sucat dagiti inauna nga annac cadagiti an-animal dagiti anac ti Israel.

42Ket ni Moises binilangna, cas imbilin ni Jehova kencuana, amin dagiti inauna cadagiti annac ti Israel.

43Ket amin nga inauna a nayanac a lallaki, cas mayannurot iti bilang dagiti nagnagan, nanipud agtawen iti maysa a bulan ken agpangato, cadagidiay a nabilang cadacuada duapulo ket dua a ribu, dua gasut ket pitopulo ket talloda.

44Ket ni Jehova nakisao ken Moises, a kinunana,

45Alaem dagiti Levitas a sucat dagiti amin nga inauna nga annac cadagiti annac ti Israel, ken dagiti an-animal dagiti Levitas a sucat dagiti an-animalda; ket dagiti Levitas isudanto ti cucuac: siac ni Jehova.

46Ket ti pannacasubbot dagiti dua gasut ket pitopulo ket tallo cadagiti inauna cadagiti annac ti Israel a suroc ken adaduana ngem iti bilang dagiti Levitas,

47Mangalacanto iti lima a siclo iti tunggal maysa nga olo; cas ti siclo ti santuario ti alaemto cadacuada, (ti siclo isu ti duapulo a gerah):

48Ket itedmonto ken Aaron ken cadagiti annacna a lallaki ti pirac a pangsubbot ti suroc ti bilangda.

49Ket ni Moises innalana cadacuada ti panubbot a pirac iti suroc ken ad-aduanna ngem dagiti nasubot gapu cadagiti Levitas;

50Cadagiti inauna cadagiti annac ti Israel, innalana ti pirac a sangaribu tallo gasut innem a pulo ket lima a siclo, a cas ti siclo ti santuario;

51Ket ni Moises intedna ti panubbot a pirac ken Aaron ken cadagiti annacna a lallaki a mayabuloy iti sao ni Jehova, cas imbilin ni Jehova ken Moises.

← Chapter 2 Jump to: Chapter 4 →

Recommended Reading

Commentary Numbers Commentaries → Devotional Numbers Devotional Guide → Get This Bible 1973 Study Bible →