Numbers 35

Ilokano (Ti Biblia (1973))

← Chapter 34 Jump to: Chapter 36 →

1Ket ni Jehova naisao ken Moises iti tantanap ti Moab iti abay ti Jordan sadi Jerico, a kinunana,

2Ibilinmo cadagiti annac ti Israel, tapno itedda cadagiti Levitas nga agtaud iti tawid a pagtagicuanda dagiti il-ili a pagnaedanda; casta met ti palpalasot dagiti il-ili iti lawlawda, itedyonto cadagiti Levitas.

3Ket maaddaandanto cadagiti il-ili a pagnaedanda; ket dagiti palpalasotda agservidanto cadagiti an-animalda, ken cadagiti cucuada, ken amin nga an-animalda.

4Ket dagiti palpalasot dagiti il-ili nga itedyonto cadagiti Levitas, manipudto iti bacud ti ili, sangaribu a casico nga aglawlaw.

5Ket rucodenyonto ti ruar ti ciudad a beddengna iti daya, ti dua a ribu a cacico, ket ti bangirna iti abagatan, dua a ribu a casico, ket iti bangirna iti laud, dua a ribu a casico, ket ti bangirna iti amianan dua a ribu a casico nga agtengnganto ti ili. Daytoy isunto cadacuada ti palasot dagiti il-ili.

6Ket dagiti il-ili nga itedyonto cadagiti Levitas isudanto dagiti innem nga il-ili a pagcamangan, nga itedyonto iti macapapatay tapno agcamang idiay: ket mainayon cadagidiay, itedyonto pay ti uppat a pulo ket dua nga il-ili.

7Amin dagiti il-ili nga itedyonto cadagiti Levitas uppat a pulo danto ket walo nga il-ili: itedyonto ida agraman palpalasotda.

8Ket ti maipapan cadagiti il-ili nga itedyonto a nayon ti tagicuaen dagiti annac ti Israel, cadagiti adu, mangalacayto iti adu; ket cadagiti babassit, mangalacayto iti bassit; tunggal maysa cas mayannatup iti apagna a tawiden, mangitedto iti nayon dagiti il-ilina cadagiti Levitas.

9Ket ni Jehova nakisao ken Moises, a kinunana,

10Ibagam cadagiti annac ti Israel, ket cunam cadacuada, Intono aglasatcayo iti Jordan a mapan iti daga a Canaan,

11Tudinganyonto ngarud dagiti il-ili tapno agservida cadacayo nga il-ili a pagcamangan; tapno ti macapapatay a nacapatay a dina ginagara ti siasinoman a tao mabalinna ti agcamang sadiay.

12Ket dagiti il-ili agservidanto cadacayo a pagcamangan nga umadayo ken mangibales, tapno ni macapapatay saan a matay, agingga iti di agparang a maocom iti sango ti gimong.

13Ket dagiti il-ili nga itedyonto innemdanto nga il-ili nga agservi cadacayo a pagcamangan.

14Itedyonto dagiti tallo nga il-ili iti bal-lasiw ti Jordan, ken tallo nga il-ili iti daga a Canaan itedyonto; dagitanto dagiti il-ili a pagcamangan.

15Cadagiti annac ti Israel, ken iti gangannaet, ken iti agbanbaniaga cadacuada, dagitoyto innem nga il-ili ti pagcamangan; tapno tunggal maysa a macapapatay a dina ginagara iti siasinoman a tao mabalinna ti agtaray sadiay.

16Ngem no kinabilna iti maysa nga alicamen a landoc, nga isu ti nacatayanna, isu nacapapatay: ti nacapapatay di-bumurong a mapapatayto.

17Ken no dinanarna iti bato nga iniggamanna a mabalin a pacatayan ti maysa a tao, ket natay, daydiay nacapapatay: ti nacapapatay di bumurong a mapapatayto.

18Wenno no kinabilna iti maysa a cayo nga alicamen nga ig-iggamanna, a mabalin a pacatayan ti maysa a tao, ket natay, isu nacapapatay: ti nacapapatay di bumurong a mapapatayto.

19Ti mangibales ti dara isunto met laeng ti mangpatay ken nacapapatay: no masabatna, papatayennanto.

20Ket no dinuyocna a sigugura, wenno sinanebna a pinalapal nga isu ti nacatayanna;

21Wenno gapu iti gura kinabilna iti imana, nga isu ti nacatayanna: ni kimmabil kencuana, mapapatayto a di-bumurong; isu maysa a nacapapatay: ni bumales iti dara papatayennanto ti nacapapatay no masaracanna.

22Ngem no dinuyocna iti apagdaricmat nga awan pannakibusorna, wenno pinalapalna iti uray ania a dina ket sinansaneb;

23Wenno uray ania a bato, a pacatayan ti maysa a tao, idinto a dina nakita, ket napuntaanna, isu a nacatayanna, ket dina met ngarud cabusor, wenno dina pinanggep ti pacaranggasanna:

24No casta ti gimong ocomennanto ti kimmabil ken ti mangibales iti dara cas mayannurot cadagitoy a panangeddeng;

25Ket ti gimong icanawananto ti nacapapatay iti ima ni mangibales iti dara, ket ti gimong isublinanto ni nacapapatay iti ilina a pagcamangan, isu a nagtarayanna: ket agnaedto sadiay inggana ti ipapatay ti cangatoan a padi a napulotan iti nasantoan a lana.

26Ngem no ti nacapapatay malabsannanto iti uray ania nga aldaw ti nagbeddengan ti ilina a pagcamangan, isu a napananna;

27Ket ti mangibales iti dara matumpunganna iti ruar ti beddeng ti ilina a pagcamangan, ket ti mangibales iti dara patayenna ni namapatay; isu saanto a macabasol iti dara:

28Gapu ta rebbengna coma ti nagnaed iti ilina a pagcamangan agpapan iti ipapatay ti cangatoan a padi; ngem calpasan ti ipapatay ti cangatoan a padi, ti nacapapatay agsublinto iti daga a pagtagicuaanna.

29Ket dagitoy isudanto ti maysa a pagbilinan ken alagaden cadacayo agpapan caputotanyo iti amin a pagnaedanyo.

30Siasinoman a mangpatay iti maysa a tao, ti nacapapatay mapapatayto iti pamanecnec dagiti macasacsi: ngem ti maymaysa a sacsi dinto macapanecnec iti maibusor iti uray siasinoman a tao tapno matay.

31Maysa pay, dicayto mangala iti subbot ti biag ti maysa a nacapapatay, a nacabasol iti patay; no di ket mapapatayto a di-bumurong.

32Ket dicayto met mangala iti subbot ti nagtaray iti ilina a pagcamangan tapno agsubli nga agnaed iti dagana, inggana iti ipapatay ti padi.

33Iti casta dicayto mamulitan ti daga a pagyananyo: ta ti dara daytoy mulitanna ti daga; ket awan mabalin nga aramiden a pangsubbot a maipaay iti daga, iti dara a naibucbuc idiay no di met laeng ti dara ni nangibucbuc.

34Ket dicanto rugitan ti daga a pagnaedanyo, nga iti tengngana pagtaengac: ta siac a Jehova agnaedac iti tengnga dagiti annac ti Israel.

← Chapter 34 Jump to: Chapter 36 →