Numbers 9

Ilokano (Ti Biblia (1973))

← Chapter 8 Jump to: Chapter 10 →

1Ket ni Jehova nakisao ken Moises iti let-ang ti Sinai iti umuna a bulan ti maicadua a tawen calpasan ti ipapanawda iti daga nga Egipto, a kinunana,

2Maysa pay dagiti annac ti Israel ngilinenda coma ti pascua iti naituding nga aldawna.

3Iti maicasangapulo ket uppat nga aldaw iti daytoy a bulan iti sumipnget ngilinenyonto iti natudingan nga aldawna, cas mayannurot cadagiti isu-amin nga al-alagaden iti dayta, ken cas mayannatup iti isu-amin a bilbilin iti dayta, salimetmetanyonto.

4Ket ni Moises imbagana cadagiti annac ti Israel tapno ngilinenda ti pascua.

5Ket ngililinda ti pascua iti umuna a bulan, iti maicasangapulo ket uppat nga aldaw ti bulan idi sumipnget idiay let-ang ti Sinai: cas mayannurot iti isu-amin nga imbilin ni Jehova ken Moises, casta ti inaramidda dagiti annac ti Israel.

6Ket adda idi dadduma a lallaki a saan a nadalus a gapu iti bangcay ti maysa a tao a natay, a dida nacabalinan a nangngilinan iti pascua iti daydiay nga aldaw: ket immayda iti sango da Moises ken ni Aaron iti daydiay nga aldaw:

7Ket dagidiay a lallaki kinunada kencuana, Saancami a nadalus a gapu iti bangcay ti maysa a tao a natay: ania ti gapuna a matipdancami tapno dicami mangidatag iti daton ken Jehova iti natudingan nga aldawna iti tengnga dagiti annac ti Israel?

8Ket ni Moises kinunana cadacuada, Aguraycayo; ta denggec no ania ti ibilinto ni Jehova maipapan cadacayo.

9Ket ni Jehova nakisao ken Moises, a kinuna,

10Ibagam cadagiti annac ti Israel, a cunam, No siasinoman a tao cadacayo wenno cadagiti caputotanyo saanto a nadalus gapu iti bangcay ti tao a natay, wenno adda iti dalan nga adayu, nupay casta ngilinennanto ti pascua ken Jehova.

11Iti maicadua a bulan iti maicasangapulo ket uppat nga aldaw iti sumipnget, isu ti ngilinendanto; canendanto agraman di-nalevaduraan a tinapay, ken napait a natnateng.

12Awanto ti tiddaenda iti dayta agingga iti bigat, didanto tuccolen iti uray maysa la a tulangna: cas mayannurot iti isu-amin nga alalagaden ti pascua ngilinendanto.

13Ngem ti tao a nadalus, ket awan iti dalan, ket liwayanna a ngilinen ti pascua, dayta a tao maipusayto iti ilina; gapu ta saanna nga indatag ti daton ken Jehova iti natudingan nga aldawna, dayta a tao awitennanto ti basolna.

14Ket no maysa a gangannaet a makipagnaed cadacayo, ket ngilinenna ti pascua ken Jehova, cas mayannatup iti alagaden ti pascua ken cas mayannurot iti naibilin iti dayta, casta ti aramidennanto. Addaancayto iti maymaysa a pagalagadan, agpada a maipaay iti gangannaet, ken maipaay iti agnaed iti daga.

15Ket iti aldaw a pannacabangon ti tabernaculo, ti ulep inabungotanna ti tabernaculo, a di tolda met laeng ti pamanecnec: ket iti sumipnget adda iti rabaw ti tabernaculo a cas ti apuy, agpapan iti bigat.

16Casta idi nga agnanayon: ti ulep inabungotanna ket nagparang a cas apuy iti rabii.

17Ket idi nagpangato ti ulep nanipud iti rabaw ti tabernaculo, iti calpasan dayta ngarud, dagiti annac ti Israel nagnada: ket iti disso a nagsardengan ti ulep, sadiay ti nagpacarsoan dagiti annac ti Israel,

18Iti panagbilin ni Jehova, dagiti annac ti Israel nagnada, ket iti panagbilin ni Jehova nagpacarsoda; bayat ti panagyan ti ulep iti rabaw ti tabernaculo nagsardengda a nacatoldada.

19Ket no nagtactac ti ulep iti rabaw ti tabernaculo iti adu nga aldaw, dagiti annac ti Israel ngarud sinalimetmetanda ti ingunamgunam ni Jehova, ket saanda a nagluas.

20Ket no dadduma, ti ulep agyan idi, iti sumagmamano nga aldaw iti rabaw ti tabernaculo; iti casta nagsardengda a nacatoldada cas ti imbilin ni Jehova, ket nagluasda cas mayannurot iti bilin ni Jehova.

21Ket no dadduma daydi ulep nagyan nanipud sumipnget inggana iti bigat, ket idi a ti ulep naipangato iti bigat, nagluasda: wenno no agtuloy iti aldaw ken rabii, idi a naipangato di ulep, nagnada.

22No nagdua nga aldaw, wenno macabulan, wenno nacatawen a nagtaeng ti ulep iti rabaw ti tabernaculo nga agyan idiay dagiti annac ti Israel nagbatida a nacatoldada ket saanda a nagluas; ngem idi naipangato, nagnada.

23Iti panagbilin ni Jehova nagtoldada, ket iti panagbilin ni Jehova nagluasda; sinalimetanda ti alagaden ni Jehova, iti panangibilin ni Jehova ken Moises.

← Chapter 8 Jump to: Chapter 10 →