Numbers 36

Ilokano (Ti Biblia (1973))

← Chapter 35 Jump to:

1Ket dagiti pangpangolo dagiti balbalay dagiti amma ti familia nga annac ni Galaad, nga anac a lalaki ni Maquir, nga anac a lalaki ni Manases, cadagiti famfamilia dagiti annac ni Jose, immasidegda ken nagsaoda iti sango ni Moises ken iti sango dagiti agturturay a pangpangoloen dagiti balbalay dagiti amma dagiti annac ti Israel:

2Ket kinunada, Ni Jehova imbilinna iti apoc nga itedna ti tawid iti ginnasanggasat, cadagiti annac ti Israel: ket ti apoc nabilin ken Jehova iti panangitedna ti tawid ni Zelofehad a cabsatmi a lalaki cadagiti annacna a babai.

3Ket no maasawaanda iti siasinoman cadagiti annac ti sabali a capcaputotan dagiti annac ti Israel, ti tawidda maiccatto ngarud iti tawid dagiti ammami ket mainayonto iti tawid ti capcaputotan a pacaicamanganda: casta ti pannacaipusaydanto iti naipagasat a tawidmi.

4Ket no ti jubileo dagiti annac ti Israel madanunanto, ti tawidda ngarud mainayonto iti tawid ti caputotan a pacaicamangandanto: casta ti pannacaipusayto ti tawidda iti tawid ti caputotan dagiti ammami.

5Ket ni Moises imbilinna cadagiti annac ti Israel cas mayannurot iti sao ni Jehova, a kinunana, Ti caputotan dagiti annac ni Jose nalinteg ti saoda.

6Daytoy ti ibilin ni Jehova maipapan cadagiti annac a babbai ni Zelofehad, a cunana, Makiasawada coma cadagiti isisipenda a casasayaatan; iti laeng familia ti caputotan ni amada ti pakiasawaandanto.

7Ti casta dinto agalis-alis iti caputotan ken caputotan ti tawid dagiti annac ti Israel: ta dagiti anac ti Israel tunggal maysa petpetannanto ti tawid ti caputotan dagiti ammana.

8Ket tunggal anac a babai nga agtagicua iti maysa a tawid iti uray asinoman a caputotan dagiti annac ti Israel, asawaento ti maysa iti familia ti caputotan ni amana, tapno dagiti annac ti Israel, tunggal maysa a lalaki tagicuaenna ti tawid dagiti ammana.

9Casta ti dinto panagalis-alis iti pinutonputot ti tawid; ta dagiti capcaputotan dagiti annac ti Israel, cupicupanto ti tunggal maysa ti bucodna a tawid.

10Cas met la ti panangibilin ni Jehova ken Moises, casta ti inaramid dagiti annac a babbai ni Zelofehad:

11Ta da Maala, Tirsa, ken Hogla, ken Milcha, ken Noa, nga annac a babbai ni Zelofehad, nakiasawada cadagiti annac dagiti cacabsat ni amada.

12Isuda naasawaanda cadagiti famfamilia dagiti annac ni Manases, nga anac ni Jose, ket ti tawidda nagbati iti caputotan ti familia ti amada.

13Dagitoy isuda dagiti bilbilin ken linlinteg nga intuyang ni Jehova iti ima ni Moises cadagiti annac ti Israel, iti tantanap ti Moab nga asideg ti Jordan sadi Jerico.

← Chapter 35 Jump to: