Hosea 14

Mien Bible (Thai Script) © Thailand Bible Society, 2007

← Chapter 13 Jump to:

1โอ อิสะลาเอน เมี่ยน อ้า! หฑวน ต้าย ล์อ เฒี้ยว, เม่ย บัว เญย ทิน-ฮู่ง, เหว่ย หฒุ หลาย เม่ย บัว เญย ฒุ์ย-หนิบ เม่ย บัว ดิ๊ หฒุ ดอบ.

2อ๋อย หฒุ ต้อ เจี๊ยน เหญี่ยม ฒุ์ย เญย หว่า หฑวน ต้าย ล์อ เฒี้ยว. อ๋อย หฒุ ก๊อง บั๋ว นิ่น, “โท้ เฒาะ ฆอย เยีย บัว เญย เหยียด ฒู้ง ฒุ์ย, โท้ ฒิบ หลง เยีย บัว, เยีย บัว ฯฒฯ หล่ง เยีย บัว เญย หว่า ฝ่ง ห่อ ต๋อง หล่ง ง่ง โก๊ว เหฒี่ย.

3อัดซีเลีย ไม้ ไฮ่ เหฌียว เยีย บัว, เยีย บัว ไม้ ตุ๊ เก้ ม์า. เยีย บัว ไม้ แอ๋ง ก๊อง บั๋ว เยีย บัว กั้น เญย ปั์ว โหฒว ต้าย เญย กะน้าย, ‘เม่ย เซ เยีย บัว เญย ทิน-ฮู่ง,’ เหว่ย หฒุ กู้ ฮั่น ฝุเจว๊ย ไฮ่ เขา เฒี้ยว ตุ๊ นิ่น ค้อ-เลี่ยน.”

4“เยีย อ๋อย หฒ่อ นิ่น บัว ไม้ เหฒียบ ฒัวะ เญย เจ๊า, เยีย อ๋อย หล่ง เหฑ่ง เฮญี้ยว ฮนั้ม นิ่น บัว, เหว่ย หฒุ เยีย กะเฉีย ฟิว, ไม้ เฉีย เจี์ย นิ่น บัว อ๊ะ.

5เยีย ฯฒฯ เหว่ย อิสะลาเอน ฮนั้ง บยู่ง-ซุ้ย, นิ่น ฯฒฯ ฮนั้ง แปะ เหาะ เปี้ยง ฆอย ต้าย. นิ่น หย่า เหฌี่ย ฑู่ง ฮนั้ง เลบานอน เญย สีดา ฒ่ง เดี๋ยง.

6นิ่น เญย หธุน อ๋อย หฮยาง เจี๊ยน มี่ง, นิ่น ฯฒฯ เหฑว่ย ฮนั้ง กะลั้น เดี๋ยง, นิ่น หย่า ม่าย ดาง เญย เฉีย ฮนั้ง เลบานอน เญย สีดา ฒ่ง เดี๋ยง.

7นิ่น บัว อ๋อย หฑวน ต้าย เยียม เจี๊ยน เยีย เญย ต้ง ลิ่น กะเดี๊ย. นิ่น บัว หย่า ตุ๊ หลง เจี๊ยน ฝาว ฮนั้ง หฮวีง. นิ่น บัว ตุ๊ ฆอย เปี้ยง ฮนั้ง อะหงุ่น เฮมย, หย่า ม่าย เฉีย ดาง ฮนั้ง เลบานอน เญย อะหงุ่น ติ๊ว.

8โอ เอฟาอิม อ่า, เยีย เหธา หมิ่ว-ฝัง ม่าย หาย หญู่ง เกวน หฒุ? เซ เยีย กั้น เตา หย่า โก๋ว เจี๊ยน เม่ย บัว. เยีย ฮนั้ง หฒั่นๆ เญี์ยม เญย ฒ่ง เดี๋ยง, เม่ย บัว เญย ฟุ เยียม เยีย ต้าย.”

9หาย เต้า ม่าย ธง-เม่ง ปุน นิ่น เปียะ เฮญี้ยว น้าย เต๋ย หว่า. หาย เต้า ไฮ่ สัม ตุ๊ ธ้วด, ปุน นิ่น ฮิ้ว ตุ๊ น้าย เต๋ย สี่, เหว่ย หฒุ เฒี้ยว เญย เจ๊า เซ หอบ เญย. คู้ เมี่ยน หย่า กัน น้าย ติ้ว เจ๊า ยั่ง, มป่า ฒุ์ย-เมี่ยน เยียม น้าย ติ้ว เจ๊า ดิ๊ หฒุ ดอบ.

← Chapter 13 Jump to: