Hosea 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1“ปย๊ม หฑัด ม่าะ! เหว่ย หฒุ ม่าย เต้า วิน-วั้ง ฮนั้ง ต้ม จ๊าง-ง่ง เยียม เฒี้ยว เญย เปย๊า กู้ หงว่าย, เหว่ย หฒุ แปะ ฝีง แหง่ง เยีย เญย แหง่ง หว่า หย่า ป์าม เยีย เญย เล์ย-หลัด.

2นิ่น บัว เห่ว เจี๊ยน เยีย ก๊อง, เยีย เญย ทิน-ฮู่ง อ้า! เยีย บัว, อิสะลาเอน เมี่ยน, ฮิ้ว ตุ๊ เม่ย เญย.”

3หลง เญย วั้ว หญู่ง, อิสะลาเอน เฆ่ม, วิน-วั้ง ฯฒฯ หฒุ่น หฒ่าย นิ่น.

4นิ่น บัว เหลียบ ฮู่ง เตี๋ย, มป่า ไม้ เฒ์ย เยีย พ้าย. นิ่น บัว เหลียบ เจียน, มป่า เยีย ไม้ ฮิ้ว. นิ่น บัว หล่ง เจียม หล่ง ญ่าน เหว่ย กั้น โหฒว หมิ่ว-ฝัง เหว่ย ปุน นิ่น บัว กั้น หฒุ เหมียด.

5สะมาเลีย อ้า! เยีย เฆ่ม เม่ย บัว เญย ง่ง ตอน. เยีย เญย กะเฉีย แป๊ด ธ้วด ปุน นิ่น บัว. นิ่น บัว เถา หาย หฒั่น หธีง ต้าย ธีง-เหฑ่ง?

6นิ่น บัว เยียม อิสะลาเอน, ม่าย หฒั่ง เมี่ยน โต๋ ต้าย เญย ง่ง ตอน, มป่า เซ ไม้ เฒ์ย ทิน-ฮู่ง. เยียม สะมาเลีย เญย ง่ง ตอน ฒู้ง อ๋อย หฒุ เบ๊าะ ฮู้ เหฑ่ง.

7“เหว่ย หฒุ นิ่น บัว หฒวัง เญย เซ หฑยาว, นิ่น บัว เซียว เญย ฯฒฯ เป๋น หฑยาว-หฒุ่น. เบย้า ฒู่ง ไม้ ธ้วด ต๊อ, ฯฒฯ ไม้ ธ้วด เบย้า เหว่ย โหฒว บ๊วน. สี ก๊อง ธ้วด เบย้า นอ, กั้น ฝีง เมี่ยน หย่า ต้าย หญั่น เหฑ่ง.

8อิสะลาเอน หฒุ นะ เหฑ่ง หมี่ อ๊ะ. อี้ หฒั่น เยียม หม่าน ฝีง บุด๋ง เป๋น ไม้ ลั่ม หล่ง เญย เนีย-มอ ฮู้.

9นิ่น บัว มี่ง เขา อัดซีเลีย ฮนั้ง เต้า เฮยี่ย ล่อ โดะ โย่ว เจี๊ยน มี่ง. เอฟาอิม หย่า ธี้ง เมี่ยน ฮนั้ม นิ่น.

10ไม้ กุ๊น นิ่น บัว ธี้ง กั้น กั๊วะ เมี่ยน โหฒว ต่อย, ไม้ เล่า เยีย อ๋อย เซียว นิ่น บัว ฒุ้น. นิ่น บัว ฯฒฯ เจี์ย กอน เฮย เจี๊ยน เหฌี่ย หลาย ฮู่ง เตี๋ย เหธา เจียน ปุน นิ่น บัว ดาม เฮนี้ย.

11เอฟาอิม จา โหฒว เหฒี่ย-ต้อง เหว่ย ฟิ ฒุ์ย ต๋าว หฑวน น้าย เต๋ย เหฒี่ย-ต้อง ปุน นิ่น ป์าม ฒุ์ย.

12สี ก๊อง เยีย เหว่ย นิ่น เฟี้ย หว่านๆ ติ้ว เยีย เญย เล์ย-หลัด, นิ่น ขูง ฝุน เป๋น กั้น หญู่ง กะน้าย ฮนั้ง.

13นิ่น บัว อะเฮน้ย ฝ่ง ห่อ เหฒี่ย. นิ่น บัว หล่ง แซง-คู้ ฝ่ง ห่อ เหฒี่ย หย่า หญั่น วั้ว เต๋ย อ๊อ, มป่า เฒี้ยว ไม้ อะเฮน้ย นิ่น บัว. อี้ หฒั่น นิ่น อ๋อย จั๋ง นิ่น บัว เญย ฒุ์ย-หนิบ หย่า ตี่ง นิ่น บัว เญย ฒุ์ย, นิ่น บัว ฯฒฯ หฑวน อียิบ เต่ย-ปูง.

14อิสะลาเอน เมี่ยน หละคุ เหฒย นิ่น บัว ต้าย วั้ว เต้า หย่า เหธย ฮู่ง ติ่น. ยูดา เมี่ยน หย่า เหลียบ เว่ย ว้วน เญย ฒี่ง จา ธั้ม เจี๊ยน ฝาว, มป่า เยีย อ๋อย ปุน โต์ว ปั๊ว นิ่น บัว เญย ฒี่ง, โต์ว ฯฒฯ ปั๊ว ชุย นิ่น บัว เว่ย ว้วน เญย ต๋อง.

← Chapter 7 Jump to: Chapter 9 →