Hosea 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1อิสะลาเอน เมี่ยน อ้า! ไม้ ตู๋ง ฮนั้ง กั้น ฝีง เมี่ยน เฌียน-โย่ว ออน-เหลาะ, เหว่ย หฒุ เม่ย บัว โหฒว เหฮยียน เญย เมี่ยน, กวั่ง เม่ย บัว เญย ทิน-ฮู่ง. เม่ย บัว เยียม นอมๆ เบ๊าะ เบย้า เธี้ยง อะเฮน้ย ตุ๊ ธี้ง หม่าย ซิน เมี่ยน เญย จ๋า-ฒิ่น.

2เบ๊าะ เบย้า เธี้ยง เหธา เญว่ย อะหงุ่น ติ๊ว เญย ฒ่อง ไม้ เก๋า หวุย นิ่น บัว. เซียง-อะหงุ่น ติ๊ว หย่า ตั๋ง หมี่ อ๊ะ.

3นิ่น บัว ไม้ ตุ๊ เยียม เฒี้ยว เญย เต่ย-ปูง. มป่า เอฟาอิม อ๋อย หฒุ หฑวน อียิบ เต่ย-ปูง. นิ่น บัว อ๋อย หฒุ เยียม อัดซีเลีย หญั่น ม่าย หวุย เญย กะน้าย.

4นิ่น บัว ไม้ ตุ๊ หล่ง อะหงุ่น ติ๊ว เธี้ย ปุน เฒี้ยว, หย่า ไม้ ตุ๊ เหว่ย นิ่น บัว ฝ่ง ห่อ เหฒี่ย เญย กะน้าย ปุน นิ่น หอบ เฮญี้ยว. นิ่น บัว หญั่น เญย กะน้าย ฯฒฯ ฮนั้ง เฑ่า เญี้ยม เญย เมี่ยน หญั่น เญย กะน้าย. เหยียด ฒู้ง หญั่น เญย เมี่ยน ฯฒฯ ม่าย หวุย อ๊ะ. เหว่ย หฒุ นิ่น บัว หญั่น เญย เซ เถง กั้น เญย กะเซีย เป๊ว, ไม้ ตุ๊ ต้อ เปียะ เฒี้ยว เญย เปย๊า.

5เถา ตี่ง ต้าย เจี๋ย ฒิบ เญย ฮนอย, เหธา เจี๋ย เฒี้ยว เญย ฒิบ วั้ว ฮนอย, เม่ย บัว ฮนั้ง หาย นอ โหฒว?

6หมั่ง ม่าะ! นิ่น บัว เปย๋า หฒุ เหมียด เญย เจ๊า, อียิบ เมี่ยน อ๋อย เซียว นิ่น บัว ฒุ้น, เมมฟิด เมี่ยน ฯฒฯ ปย๊บ นิ่น บัว เญย เซย. หล่ง ญ่าน โหฒว ต้าย จ๋าย เญย กะน้าย หฒุ ม่าย ฌิ้ม เญย เมี้ย บย์อง เจี๊ยน, นิ่น บัว เญย ด๊บ-ลิ่ว หย่า ธ้วด ฌิ้ม ปวั๊ง เหฑ่ง.

7ตี่ง ฒุ์ย เญย ฮนอย-เหญียะ เถา ต้าย อ๊ะ. หฒุ จ๊าว วิน เญย ฮนอย เถา, อิสะลาเอน ฯฒฯ ฮิ้ว อ๊ะ. โต่ว หว่า เมี่ยน เป๋น กะน้าย-หฮงง หมี่ อ๊ะ, ตุ๊ สีง ลี่ง เญย เมี่ยน ปุ๊ด ดิน หลาย เม่ย บัว เญย ฒุ์ย-หนิบ โฮล ไห่, หย่า หลาย เม่ย บัว ปะหละ โน์ว.

8โต่ว หว่า เมี่ยน โหฒว เยีย เญย ทิน-ฮู่ง เญย แปะ ฝีง, เอฟาอิม เมี่ยน เญย เซี้ยว แกง เมี่ยน, มป่า เยียม โต่ว หว่า เมี่ยน เญย ติ้วๆ เจ๊า ม่าย แฒง เหนาะ เญย มู์ง, หย่า ม่าย ฑอง เญย สี่ เยียม นิ่น เญย ทิน-ฮู่ง เญย เปย๊า.

9นิ่น บัว โหฒว หว่าย สี่ โด ไห่, ฮนั้ง เยียม กิเบอา เญย ฮนอย-เหญียะ นอ, ทิน-ฮู่ง ฯฒฯ จั๋ง นิ่น บัว เญย ฒุ์ย-หนิบ, หย่า ตี่ง นิ่น บัว เญย ฒุ์ย.

10“เยีย ล์อ ปวัด อิสะลาเอน ฮนั้ง ล์อ ปวัด อะหงุ่น เปี๊ยว เยียม เต่ย-ปูง-ฮวาง. เยีย ล์อ ปวัด เม่ย บัว เญย อง-ถาย, ฮนั้ง ปวัด ง่ง หญอ เดี๋ยง เฒี่ยง ต้าว หฑุ่น เญย ต้าว ถอง เปี๊ยว. มป่า นิ่น บัว ต้าย เถา บาอันเปโอ, เฒาะ กั้น ฝูง ปุน บาอัน เฒี่ยน, ฯฒฯ ทิ้ว เป๋น กั้ม เฑี้ย เญย กะน้าย ฮนั้ง นิ่น บัว ฮนั้ม เญย กะน้าย.

11เอฟาอิม เมี่ยน เญย ฌัง-หล่าง อ๋อย ฮนั้ง นอม เหนาะ ได๋ มี่ง, ไม้ ตุ๊ ยู์ง กู้งว์า, ไม้ ม่าย ซิน, ไม้ ม่าย แซง-ยู์ง.

12ไม้ กุ๊น นิ่น บัว ต้อ ฝุเจว๊ย โฮล, เยีย อ๋อย เฒาะ นิ่น บัว มี่ง เหฑ่ง, ไม้ เลี่ยว เหยียด เต้า. เยีย เล่ย ฆอย นิ่น บัว เญย เฒี่ยง โห่, นิ่น บัว อ๋อย หฒุ โค้ว อ๊ะ.

13ฮนั้ง เซี่ยน ต้อ นิ่น เญย ตอน ธ้วด มี่ง หฒุ กะน้าย ไต๋, เอฟาอิม อ๋อย หฒุ ฮนั้ง วั้ว นอ ต้อ นิ่น เญย น่าม โญ์ว ธ้วด มี่ง หฒุ ไต๋.”

14โอ เฒี้ยว อ่า, โท้ เหธย ปุน นิ่น บัว. เม่ย อ๋อย เหธย หาย หญู่ง ปุน นิ่น บัว? โท้ ปุน นิ่น บัว เญย มเซียะ ตอน ไม้ ไฮ่ ม่าย กู้งว์า, หย่า ปุน นิ่น บัว เญย หญอ ฆาย.

15เฒี้ยว ก๊อง, “นิ่น บัว โหฒว เญย หญู่งๆ เอ๊าะ สี่ เยียม กินกาน. เยียม หน่าย เยีย เจี์ย กอน ฑอง นิ่น บัว. หลาย นิ่น บัว โหฒว เญย สี่ เอ๊าะ ไห่, เยีย อ๋อย หฒุ่น นิ่น บัว ธ้วด เยีย เญย เปย๊า. เยียม น้าย มี่ง เยีย ฯฒฯ ไม้ ฮนั้ม นิ่น บัว, นิ่น บัว เญย เหยียด ฒู้ง เจียน ขูง เฮญี้ยว แหง่ง ฮนั้ง.

16เอฟาอิม หฒุ โค้ว. นิ่น บัว เญย ฑู่ง ฆาย หมี่ อ๊ะ, นิ่น บัว ไม้ ไฮ่ เฒี่ยง เปี๊ยว. ไม้ กุ๊น นิ่น บัว ยู์ง กู้งว์า, เยีย อ๋อย ไต๋ นิ่น บัว ฮนั้ม เญย ฝุเจว๊ย.”

17เยีย เญย ทิน-ฮู่ง อ๋อย ฒอย นิ่น บัว กวั่ง หลาย นิ่น บัว ไม้ หมวัง นิ่น เญย หว่า. นิ่น บัว อ๋อย หฒุ โย่ว เจี๊ยน มี่ง หม่าน กั๊วะ บุด๋ง.

← Chapter 8 Jump to: Chapter 10 →