Hosea 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1เยีย อ๋อย หฒ่อ อิสะลาเอน เญย เฒี่ยง โห่, เอฟาอิม เญย ฒุ์ย-หนิบ เหธา สะมาเลีย โหฒว เอ๊าะ เญย สี่ ปิ๋ว เม่ง ธ้วด ต้าย. นิ่น บัว โหฒว สี่ จ๊า, ม่าย จั๋น-หฒะ ป์อง เปียะ เปย๊า, หย่า ม่าย ลู้ เญย เมี่ยน เยียม กะเหญี่ย ลู้.

2นิ่น บัว ไม้ ฮนั้ม เถา เยีย จั๋ง นิ่น บัว โหฒว เญย เหยียด ฒู้ง เอ๊าะ สี่. อี้ หฒั่น นิ่น บัว เญย ฒุ์ย เว่ย ก๋อม นิ่น บัว, หย่า เยียม เยีย เญย หฑะเฮมียน.

3นิ่น บัว โหฒว เญย เอ๊าะ สี่ ปุน ฮู่ง เตี๋ย อะเฮน้ย, นิ่น บัว ก๊อง-แปะ เญย หว่า ปุน เจียน ปวั๊ง เฮญี้ยว.

4นิ่น บัว เหยียด ฒู้ง เป๋น เหฮยียน เญย เมี่ยน, นิ่น บัว เซ ฮนั้ง จอม ไห่ เญย โต์ว-โล่ว, ต้ง เยียม โหฒว ฌั้ว หฒั่ง เจี์ย กอน ไหธ ฌั้ว เถา ฌั้ว ปุ๊ด ต้าย, นิ่น ไม้ เฒ่ย โต์ว หฮยาง.

5โห่ว เยีย บัว เญย ฮู่ง เตี๋ย วั้ว ฮนอย, เจียน หลาย อะหงุ่น ติ๊ว เญย ชะ ปุ๊ด แป่ง. ฮู่ง เหธา เจี๊ยน ฮว้วด เญย เมี่ยน ซูง ปั์ว.

6นิ่น บัว จอม เฮญี้ยว ฮนั้ง โต์ว-โล่ว นอ จอม, เป่ย เดี๊ย ต๊า หว่าย เญย หฒะเอ๋ย, นิ่น บัว เฒี่ยง ม์วน เฉีย เจี์ย, ฮนั้ง อ๊บ เจี๊ยน โต์ว, ลู่ง ดอม กะเฉีย แป๊ด ธ้วด ฮนั้ง หฌบ โต์ว นอ.

7นิ่น บัว เหยียด ฒู้ง จอม ฮนั้ง โต์ว-โล่ว, นิ่น บัว หย่า นะ กุ๊น นิ่น บัว วั้ว เต๋ย. นิ่น บัว เญย เหยียด ฒู้ง ฮู่ง เตี๋ย คีง เหฌี่ย ไต่, หย่า ไม้ ม่าย นิ่น บัว เหยียด เต้า ต้าย เห่ว เยีย.

8“เอฟาอิม กั้น มี่ง หฒอบ เหฒีย ฝีง เมี่ยน, เอฟาอิม ฮนั้ง ฒิ มป่า ไม้ เบี๊ยน เญย ฌั้ว นอ.

9กั้น ฝีง เมี่ยน นะ นิ่น เญย ชะ, นิ่น หย่า ไม้ ฮิ้ว. นิ่น เญย บะเปยย ฒู้ง แปะ เต๋ย, นิ่น หย่า ไม้ ฮิ้ว.

10อิสะลาเอน เมี่ยน โหฒว เหมา เญย เจ๊า โหฒว ฒอง-เหฒง ก๊อง นิ่น บัว, มป่า นิ่น บัว ไม้ หฑวน ต้าย ล์อ เฒี้ยว, นิ่น บัว เญย ทิน-ฮู่ง. ไม้ กุ๊น ปวั้ง น้าย เต๋ย เหยียด ฒู้ง สี่, นิ่น บัว ไม้ ล์อ นิ่น.

11“เอฟาอิม เซ ฮนั้ง นอม แปะ ก๊บ, หฮงง หย่า ฮนั้ม ไม้ ฮิ้ว หาย หญู่ง, ฯฒฯ เห่ว อียิบ หย่า มี่ง ล์อ อัดซีเลีย.

12นิ่น บัว มี่ง เญย เฒี่ยง โห่, เยีย อ๋อย เฒาะ เยีย เญย มู์ง หฒาว เจี๊ยน นิ่น บัว. เยีย อ๋อย แปง นิ่น บัว เหฌี่ย ฮนั้ง เยียม ด๊าม-ลู่ง เญย เหนาะ. เยีย อ๋อย หฒิว นิ่น บัว โหฒว เญย เอ๊าะ สี่ เบ๊าะ หฌาว นิ่น บัว.

13เหว่ย หฒุ นิ่น บัว เล่ย เยีย, นิ่น บัว หฒุ โค้ว อ๊ะ. เหว่ย หฒุ นิ่น บัว แหง่ง เจี๊ยน เยีย, นิ่น บัว อ๋อย หฒุ เหมียด. เยีย อ๋อย หฒัวะ นิ่น บัว หฑวน, มป่า นิ่น บัว หล่ง ก๊อง-แปะ เญย หว่า ก๊อง เถา เยีย.

14นิ่น บัว ไม้ หล่ง เฮญี้ยว เห่ว เยีย, มป่า นิ่น บัว เยียม นิ่น บัว เญย โหธว ชะ เญี้ยม. นิ่น บัว ก๊าด นิ่น บัว เญย ซิน เหว่ย โท้ เบย้า เหธา เซียง-อะหงุ่น ติ๊ว, หย่า แหง่ง เจี๊ยน เยีย.

15ไม้ กุ๊น เยีย หฌาว นิ่น บัว โหะ หลิ่น, ปุน นิ่น บัว เญย ปั์ว ม่าย ชะ เฮ้น, นิ่น บัว ต๊า หฒะเอ๋ย โหฒว เอ๊าะ ปุน เยีย.

16นิ่น บัว ฮวิน มี่ง ล์อ บาอัน เฒี่ยน, นิ่น บัว ฮนั้ง ป๊วน ไม้ เหฒียง เญย จวัง-หฒิน. นิ่น บัว เญย เจียน หฒุ หฑุ ด๊าว ไต๋ หลาย นิ่น บัว เญย ฑุ่ย ปู๋ง เญย หว่า-เหมา. เหว่ย น้าย เต๋ย สี่ เยียม อียิบ เต่ย-ปูง เญย เมี่ยน จั๊ด นิ่น บัว.

← Chapter 6 Jump to: Chapter 8 →