Hosea 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1อิสะลาเอน เมี่ยน อ้า! เม่ย บัว อ๋อย หฒุ หมวัง เฒี้ยว เญย หว่า, เหว่ย หฒุ เฒี้ยว ม่าย ต๋อง โก๋ น้าย นอม เต่ย-ปูง เญย แปะ ฝีง. “เยียม เต่ย-ปูง ไม้ ม่าย เหฒียบ ฒัวะ เญย เจ๊า ไฟ โหฒว หลง เญย สี่ ไฟ หาย เต้า เหญี่ยม ทิน-ฮู่ง.

2ม่าย โฮ้ว เญย สี่, เมี่ยน ก๊อง-แปะ, ไต๋ เมี่ยน, หนิ่ม กะน้าย เหธา เหฮยียน เญย สี่. นิ่น บัว ชั้ง ม่าน โหฒว โตะ, ไต๋ เมี่ยน ลิ่น เจี๊ยน เหยียด เต้า เจี๋ย เหยียด เต้า.

3เหว่ย น้าย เต่ย-ปูง เฑ่า เญี้ยม เยียม เต่ย-ปูง กะญั์ว เญย เหยียด ฒู้ง เมี่ยน โค้ว เจี๊ยน เหฌี่ย, เลี่ยม หล่ม-ฮวาง เญย เฮยี่ย ฒ่อย, ด๊าม-ลู่ง เญย เหนาะ, เลี่ยม ค้อย กะญั์ว เญย เบย์า ไต่.

4มป่า ไม้ ตู๋ง ปุน หาย เต้า ก๊อง แปะ ฝีง ไฟ ปุน หาย เต้า โก๋ หาย เต้า, เยีย โก๋ เญย เซ เม่ย บัว ไซ เมี่ยน.

5ลู่ง ฮนอย หฒั่น เม่ย บัว ดิ๊ หฒุ ดอบ, ลู่ง ม์วน หฒั่น โต่ว หว่า เมี่ยน หย่า เหธา เจี๊ยน เม่ย บัว ดิ๊ หฒุ ดอบ, เยีย ฒู้ง อ๋อย เหมียด เม่ย บัว เญย มา.

6เยีย เญย แปะ ฝีง หฒุ เหมียด หลาย ไม้ ม่าย ว่วน ฒาง. “เหว่ย หฒุ เม่ย บัว เฆ่ม ว่วน ฒาง, เยีย ฯฒฯ เฆ่ม เม่ย บัว, ไม้ ปุน เม่ย บัว โหฒว ไซ เมี่ยน ฟู-สู เยีย. เหว่ย หฒุ เม่ย บัว หละคุ เม่ย บัว เญย ทิน-ฮู่ง เญย เล์ย-หลัด, เยีย หย่า อ๋อย หละคุ เม่ย บัว เญย เฒ้ย-ฟุน.

7ไซ เมี่ยน เหยียด เฒย ธั้ม เหยียด เฒย ป์าม ฒุ์ย ต่อง เยีย. เยีย อ๋อย เฒาะ นิ่น บัว เญย ฌัง-หล่าง ทิ้ว เป๋น ไญ้ เญย สี่.

8นิ่น บัว ปั่ง เยีย เญย แปะ ฝีง เญย ฒุ์ย หญั่น, ฒู้ง อะเฮน้ย เยีย เญย แปะ ฝีง ป์าม ฒุ์ย.

9ไซ เมี่ยน ฮนั้ง หาย นอ, แปะ ฝีง ฯฒฯ ฮนั้ง วั้ว นอ. เยีย อ๋อย ตี่ง นิ่น บัว เญย ฒุ์ย เหว่ย นิ่น บัว โหฒว เญย เจ๊า, หย่า หฒิว นิ่น บัว โหฒว เญย สี่ วิ่น ปุน นิ่น บัว.

10“นิ่น บัว ตุ๊ หญั่น มป่า ไม้ เป๊ว. นิ่น บัว อ๋อย เหฮยียน มป่า ไม้ หฮยาง, หลาย นิ่น บัว กวั่ง เฒี้ยว เหว่ย กัน เหญี่ย เญย เฒี่ยน.

11“โล์-อะหงุ่น ติ๊ว เหธา เซียง-อะหงุ่น ติ๊ว ธ้าง ธ้วด เมี่ยน เปียะ เฮญี้ยว เญย เจ๊า.

12เยีย เญย แปะ ฝีง หน่าย หล่ง เดี๋ยง โหฒว ต้าย เญย กะน้าย, แอ๋ง หล่ง ติ้ว ปย๊า เตา นิ่น บัว. เหว่ย หฒุ นิ่น บัว เหฮยียน เญย เฮญี้ยว ต้อ นิ่น บัว มี่ง ต่อง เจ๊า, นิ่น บัว กวั่ง นิ่น บัว เญย ทิน-ฮู่ง มี่ง โหฒว เหฮยียน เญย สี่.

13นิ่น บัว เยียม บง-นี้ง กู้ หงว่าย, เหธา บง-ไอ๊ กู้ หงว่าย, เยียม บะอง เฒวย เดี๋ยง, ปอบล่า เดี๋ยง เหธา บะอง เฒวย เดี๋ยง กะเดี๊ย ฝ่ง ห่อ เหฒี่ย หย่า ปั๊ว ฮูง, เหว่ย หฒุ เยียม น้าย เต๋ย เดี๋ยง กะเดี๊ย ล่าง เญย. ฮนั้ง หน่าย เม่ย บัว เญย เซียะ หม่าย ซิน, เม่ย บัว เญย เซียง-บวั์ง หย่า เหฮยียน.

14เม่ย บัว เญย เซียะ มี่ง หม่าย ซิน, เม่ย บัว เญย เซียง-บวั์ง เหฮยียน เญย เฒี่ยง โห่, เยีย ไม้ ตี่ง นิ่น บัว เญย ฒุ์ย, เหว่ย หฒุ มจั่ง ตอน กั้น มี่ง เหธา หม่าย ป๊วน-ซิน เญย มเซียะ ตอน, หย่า เหธา เจี๊ยน วั้ว เต๋ย หม่าย ป๊วน-ซิน เญย มเซียะ ตอน ฝ่ง ห่อ เหฒี่ย. ไม้ ฮิ้ว หาย หญู่ง เญย ฝีง ฒู้ง อ๋อย หฒุ เหมียด.

15“อิสะลาเอน เมี่ยน อ้า! ไม้ กุ๊น เม่ย มี่ง เหฮยียน, ไม้ ตู๋ง ปุน ยูดา โหฒว ต่อง ฒุ์ย. ไม้ ตู๋ง เปียะ กินกาน มู้ง ไฟ ฝาว มี่ง เบดอาเวน. หย่า ไม้ ตู๋ง โฮ้ว หว่า ก๊อง, ‘เยีย เฒี้ยง เจี๊ยน เฒี่ยง เจี๊ยน เญย เฒี้ยว. ’

16อิสะลาเอน เมี่ยน เฮญี้ยว แหง่ง ฮนั้ง ไม้ หมวัง หว่า เญย ง่ง เญ์ย. อี้ หฒั่น เฒี้ยว ไฮ่ ยู์ง นิ่น บัว ฮนั้ง ปู๋ง ปะกี ยู่ง ตอน เยียม จั๊ง เญย เมี้ย-เธี้ยง ไฟ?

17เอฟาอิม มี่ง กัน หมิ่ว-ฝัง หมี่ อ๊ะ, เซว่ย นิ่น มี่ง อ๊ะ.

18นิ่น บัว เป๋น กวั้น ฮบ ติ๊ว ฆวิน เญย เมี่ยน, กัน เจี๊ยน เหฮยียน เญย เจ๊า มี่ง. นิ่น บัว อ๋อย ไห่ ไญ้ เญย สี่ เก้า ธั้ม นิ่น บัว เญย ฌัง-หล่าง.

19หฑยาว อ๋อย ป่วน นิ่น บัว มี่ง, นิ่น บัว ฯฒฯ หลาย นิ่น บัว เหฒี่ย เญย กะน้าย หฒุ ไญ้.

← Chapter 3 Jump to: Chapter 5 →