Leviticus 13

Mien Bible (Thai Script) © Thailand Bible Society, 2007

2“สี ก๊อง หาย เต้า ปวัด ด๊บ อ๋ม, ไฟ ด๊บ ฮู้, ไฟ ฮนั้ง โต์ว ปั๊ว ล์าว นอ, เหฑีย เป๋น ก้ม ฮู้ แป่ง. อ๋อย หฒุ ต้อ มี่ง เถา อาโลน ไซ เมี่ยน ไฟ อาโลน เญย เฒ้ย-ฟุน เหยียด เต้า ไซ เมี่ยน.

3ไซ เมี่ยน ฯฒฯ ฒ่า หมั่ง ด๊บ เป๋น แป่ง วั้ว นอม ต๋อง. ปวัด วั้ว นอม ต๋อง เญย เปยย แปะ หมี่ อ๊ะ, หย่า ปวัด แป่ง ไม้ ตาน เยียม ด๊บ ฮนั้ง, เซ เปียะ โด เญย, ฯฒฯ ฝุน เป๋น ก้ม ฮู้ แป่ง. ไซ เมี่ยน ฯฒฯ ตี่ง นิ่น ม่าย หวุย อ๊ะ.

4มป่า ปวัด วั้ว นอม ต๋อง แปะ หย่า ฮนั้ง ขูง เยียม ด๊บ เป๋น ฮนั้ง, วั้ว นอม ต๋อง เญย เปยย หย่า ไม้ แปะ นอ, ไซ เมี่ยน ฯฒฯ ขวน เจี๊ยน ปุ๊ด แป่ง วั้ว เต้า กั้น เยียม นอม ต๋อง เสี่ย ฮนอย.

5เถา ตะเธี้ยด ฮนอย, ไซ เมี่ยน แอ๋ง ฒ่า นิ่น. สี ก๊อง หฒิว ไซ เมี่ยน ปวัด, ด๊บ ไม้ กั้น หญู่ง, ไม้ จา ปุ๊ด นอ, ไซ เมี่ยน ฯฒฯ แอ๋ง ขวน เจี๊ยน เสี่ย ฮนอย.

6เถา ตะเธี้ยด ฮนอย, ไซ เมี่ยน แอ๋ง ฒ่า หฑุ่น. ปวัด วั้ว นอม ต๋อง หมิด เต๋ย, ไม้ จา ปุ๊ด นอ, ไซ เมี่ยน ฯฒฯ ตี่ง นิ่น ธีง-เหฑ่ง, ขูง ธ้วด เต๋ย ป๊า กะน้าย ฮนั้ง. นิ่น อ๋อย หฒุ โหฑ ลุย-โหว ฯฒฯ ธีง-เหฑ่ง หมี่ อ๊ะ.

7นิ่น ตุ๊ ไซ เมี่ยน ตี่ง นิ่น ธีง-เหฑ่ง เญย มป่า สี ก๊อง ฆะฮ้า ปวัด ด๊บ แอ๋ง จา ฮู้ เจี๊ยน มี่ง, อ๋อย หฒุ แอ๋ง มี่ง ปุน ไซ เมี่ยน หมั่ง.

8ไซ เมี่ยน ฒ่า ลิ์ว, ปวัด จา ปุ๊ด จั๊ง เจี๊ยน มี่ง, ไซ เมี่ยน ฯฒฯ ตี่ง ด๊บ ฮู้ วั้ว เต้า เมี่ยน ม่าย หวุย. เซ ก้ม ฮู้ แป่ง อ๊ะ.

9“สี ก๊อง ม่าย หาย เต้า ปุ๊ด ก้ม ฮู้ แป่ง, อ๋อย หฒุ ต้อ มี่ง ไซ เมี่ยน วั้ว.

10ไซ เมี่ยน ฯฒฯ ฒ่า หมั่ง. ปวัด ด๊บ แปะ หย่า อ๋ม, ปุน วั้ว นอม ต๋อง เญย เปยย แปะ, อ๋ม เญย ต๋อง หย่า ทง, ธ้วด อ๊อ-ซิ,

11ปุน ธีง ไม้ ไฮ่ หลง, เป๋น เยียม ด๊บ เญย ก้ม ฮู้ แป่ง. ไซ เมี่ยน ฯฒฯ ตี่ง นิ่น ม่าย หวุย อ๊ะ. ไม้ ตู๋ง ขวน นิ่น อ๊ะ, เหว่ย หฒุ นิ่น ฒู้ง ม่าย หวุย หมี่ อ๊ะ.

12“สี ก๊อง ด๊บ เญย แป่ง ปุ๊ด ก๋อม ซิน, หฒิว ไซ เมี่ยน ปวัด เซ เยียม มฆ้อง เหฌี่ย เถา เหฒา,

13ไซ เมี่ยน อ๋อย หฒุ ฒ่า หมั่ง. ปวัด แป่ง ปวั๊ง เหฑ่ง เฒี่ยง ซิน, เยียม มฆ้อง เถา เหฒา, ฯฒฯ ตี่ง นิ่น ธีง-เหฑ่ง หมี่ อ๊ะ. เหว่ย หฒุ เฒี่ยง ซิน แปะ เหฑ่ง นิ่น ฯฒฯ ธีง-เหฑ่ง หมี่ อ๊ะ.

14มป่า สี ก๊อง ม่าย อ๊อ-หลุน ซิ ปุ๊ด ธ้วด หาย นอม ต๋อง, นิ่น ม่าย หวุย อ๊ะ.

15ไซ เมี่ยน ฒ่า หมั่ง, ปวัด อ๊อ-หลุน ซิ ปุ๊ด ธ้วด, ฯฒฯ ตี่ง นิ่น ม่าย หวุย. วั้ว เต๋ย อ๊อ-หลุน ม่าย หวุย. เซ ก้ม ฮู้ แป่ง อ๊ะ.

16สี ก๊อง น้าย เต๋ย อ๊อ-หลุน ถุย เซ้ด แปะ เหฑ่ง, นิ่น อ๋อย หฒุ แอ๋ง มี่ง ล์อ ไซ เมี่ยน.

17ไซ เมี่ยน อ๋อย หฒุ ฒ่า หมั่ง. ปวัด วั้ว เต๋ย ต๋อง ถุย เซ้ด แปะ, ไซ เมี่ยน ฯฒฯ ตี่ง วั้ว ล่าน เมี่ยน เซ ธีง-เหฑ่ง เญย. นิ่น ฯฒฯ ธีง-เหฑ่ง หมี่ อ๊ะ.

18“สี ก๊อง ม่าย เมี่ยน เฒี่ยง เฒว่ย หลง มี่ง,

19ฆะฮ้า เยียม เฒี่ยง เจี๋ย เฒว่ย เญย ต๋อง อ๋ม ต้าย แปะ เญย ไฟ ม่าย เต๋ย ต๋อง แปะ ซิ, นิ่น อ๋อย หฒุ มี่ง ปุน ไซ เมี่ยน หมั่ง.

20ไซ เมี่ยน ฒ่า หมั่ง ปวัด ปุ๊ด วั้ว นอม ต๋อง ไม้ ตาน เยียม ด๊บ ฮนั้ง, เซ เปียะ โด เญย, วั้ว นอม ต๋อง เญย เปยย หย่า ถุย เซ้ด แปะ เหฑ่ง หมี่ อ๊ะ, ไซ เมี่ยน ฯฒฯ ตี่ง วั้ว ล่าน เมี่ยน ม่าย หวุย. เซ เป๋น ก้ม ฮู้ แป่ง เยียม เฒี่ยง เจี๋ย เฒว่ย เญย ต๋อง ธ้วด.

21มป่า สี ก๊อง ไซ เมี่ยน ฒ่า หมั่ง เญย เฒี่ยง โห่ ปวัด วั้ว นอม ต๋อง เญย เปยย ไม้ แปะ, ขูง ด๊บ เป๋น ฮนั้ง, ไม้ เปียะ โด, หย่า ปวัด หมิด เต๋ย อ๊ะ, ไซ เมี่ยน ฯฒฯ ขวน เจี๊ยน วั้ว ล่าน เมี่ยน, ปุน นิ่น กั้น เยียม นอม ต๋อง เสี่ย ฮนอย.

22ปวัด ด๊บ แอ๋ง ปุ๊ด จั๊ง เจี๊ยน มี่ง นอ, ไซ เมี่ยน ฯฒฯ ตี่ง นิ่น ม่าย หวุย. เซ ไฮ่ เจี๋ย เมี่ยน เญย แป่ง.

23มป่า สี ก๊อง ปวัด วั้ว นอม ต๋อง ฮนั้ง โล์ นอ, ไม้ ปุ๊ด จั๊ง เจี๊ยน มี่ง, เซ เฒว่ย เญย หนาน ฮนั้ง. ไซ เมี่ยน ฯฒฯ ตี่ง นิ่น ไม้ ม่าย หวุย.

24“หาย เต้า หฒุ โต์ว ปั๊ว, เยียม หฒุ ปั๊ว วั้ว นอม ต๋อง ปวัด อ๊อ-หลุน ธ้วด แปะ ซิ ไฟ แปะ,

25ไซ เมี่ยน อ๋อย หฒุ ฒ่า หมั่ง. ปวัด วั้ว นอม ต๋อง เญย เปยย ถุย เซ้ด แปะ เหฑ่ง, หย่า ปวัด ไม้ ตาน เยียม ด๊บ ฮนั้ง, เซ เปียะ โด เญย, เซ ก้ม ฮู้ แป่ง เยียม โต์ว ปั๊ว เญย ต๋อง ธ้วด. ไซ เมี่ยน ฯฒฯ ตี่ง นิ่น ม่าย หวุย. เป๋น ก้ม ฮู้ แป่ง อ๊ะ.

26มป่า สี ก๊อง ไซ เมี่ยน ฒ่า หมั่ง, ปวัด วั้ว นอม ต๋อง เญย เปยย ไม้ แปะ, ปวัด ไม้ โด, ขูง ด๊บ เป๋น ฮนั้ง, หย่า ปวัด หมิด เต๋ย, ไซ เมี่ยน ฯฒฯ ขวน เจี๊ยน ปุน แป่ง เมี่ยน กั้น เยียม นอม ต๋อง เสี่ย ฮนอย.

27เถา ตะเธี้ยด ฮนอย, ไซ เมี่ยน อ๋อย หฒุ แอ๋ง ฒ่า หฑุ่น นิ่น. สี ก๊อง ปวัด ฮู้ เจี๊ยน กัน ด๊บ มี่ง, ไซ เมี่ยน ฯฒฯ ตี่ง นิ่น ม่าย หวุย, เซ ก้ม ฮู้ แป่ง.

28มป่า สี ก๊อง ปวัด วั้ว นอม ต๋อง มต้าย ฮนั้ง โล์ วั้ว นอ, หย่า ไม้ ฮู้ เจี๊ยน กัน ด๊บ มี่ง, หย่า หมิด เต๋ย เญย, เซ อ๋ม หลาย หฒุ โต์ว ปั๊ว ฮนั้ง, ไซ เมี่ยน ฯฒฯ ตี่ง นิ่น ไม้ ม่าย หวุย. เซ ขูง โต์ว ปั๊ว เญย หนาน ฮนั้ง.

29“ไม้ กุ๊น มจั่ง ไฟ มเซียะ, หาย เต้า ปุ๊ด ฟาง เยียม มฆ้อง ไฟ ฮ่า ป้า,

30ไซ เมี่ยน อ๋อย หฒุ ฒ่า หมั่ง น้าย เต๋ย ฟาง. ปวัด ไม้ ตาน เยียม ด๊บ ฮนั้ง, เซ เปียะ โด เญย, ปวัด วั้ว นอม ต๋อง เญย บะเปยย ไฟ ซยาม ถุย เซ้ด ยั่ง เญย, หม่วน เญย, ไซ เมี่ยน ฯฒฯ ตี่ง นิ่น ม่าย หวุย. เซ เยียม มฆ้อง ไฟ เยียม ฮ่า ป้า ปุ๊ด ฟาง เซี้ยด เญย ก้ม ฮู้ แป่ง.

31สี ก๊อง ไซ เมี่ยน ฒ่า หมั่ง ปวัด ปุ๊ด ฟาง เซี้ยด เญย ต๋อง ไม้ โด, ขูง เยียม ด๊บ ฮนั้ง, หย่า ไม้ ม่าย บะเปยย ไฟ ซยาม เจี๊ยะ เยียม วั้ว นอม ต๋อง, ไซ เมี่ยน ฯฒฯ ขวน เจี๊ยน วั้ว ล่าน เมี่ยน ปุน นิ่น กั้น เยียม นอม ต๋อง เสี่ย ฮนอย.

32เถา ตะเธี้ยด ฮนอย, ไซ เมี่ยน แอ๋ง หมั่ง ปุ๊ด ฟาง เญย ต๋อง. ปวัด เซี้ยด เญย ต๋อง ไม้ จา ฮู้ มี่ง, เยียม ฟาง กะญั์ว ไม้ ม่าย บะเปยย ยั่ง, หย่า ปวัด ฮนั้ง ขูง เยียม ด๊บ เป๋น ฮนั้ง, ไม้ เปียะ โด,

33น้าย เต้า เมี่ยน อ๋อย หฒุ เถย บะเปยย ไฟ ซยาม. มป่า ปุ๊ด ฟาง เญย ต๋อง ไม้ ตู๋ง เถย. ไซ เมี่ยน ฯฒฯ แอ๋ง ขวน เจี๊ยน เสี่ย ฮนอย.

34ตะเธี้ยด ฮนอย ไซ เมี่ยน อ๋อย หฒุ ฒ่า หมั่ง ปุ๊ด ฟาง เซี้ยด เญย ต๋อง. สี ก๊อง ปวัด ด๊บ ไม้ ปุ๊ด จั๊ง เจี๊ยน มี่ง นอ, หย่า ขูง เยียม ด๊บ ฮนั้ง, ไม้ เปียะ โด, ไซ เมี่ยน ฯฒฯ ตี่ง นิ่น ไม้ ม่าย หวุย. นิ่น อ๋อย หฒุ โหฑ ลุย-โหว ฯฒฯ ไม้ ม่าย หวุย อ๊ะ.

35สี ก๊อง นิ่น สา ลิ์ว หวุย มป่า ฆะฮ้า ปุ๊ด ฟาง เซี้ยด เญย ต๋อง ปุ๊ด จั๊ง เจี๊ยน มี่ง,

36อ๋อย หฒุ ปุน ไซ เมี่ยน ฒ่า หมั่ง นิ่น. สี ก๊อง ปวัด ปุ๊ด ฟาง เซี้ยด เญย ต๋อง เยียม ด๊บ ปุ๊ด จั๊ง เจี๊ยน มี่ง, ไซ เมี่ยน ไม้ หฒุ ล์อ เปยย ยั่ง. นิ่น ฒู้ง ม่าย หวุย อ๊ะ.

37มป่า หฒิว ไซ เมี่ยน หมั่ง ปวัด ปุ๊ด ฟาง เซี้ยด เญย ต๋อง ไม้ จา ปุ๊ด, เยียม ฟาง กะญั์ว หย่า ธ้วด เปยย เจี๊ยะ นอ, ปุ๊ด ฟาง เญย ต๋อง เซ หลง หมี่ อ๊ะ. วั้ว เต้า เมี่ยน หย่า ไม้ ม่าย หวุย. ไซ เมี่ยน ฯฒฯ ตี่ง นิ่น ธีง-เหฑ่ง หมี่ อ๊ะ.

38“ไม้ กุ๊น มจั่ง มเซียะ, สี ก๊อง ซิน หฒั่ง เญย ด๊บ แปะ มี่ง เหยียด เตี๊ยม เหยียด เตี๊ยม เญย,

39ไซ เมี่ยน อ๋อย หฒุ ฒ่า หมั่ง. สี ก๊อง ปวัด วั้ว นอม ต๋อง ขูง แปะ ฮนั้ง, ไม้ โหย่ว นอ, วั้ว เต้า เมี่ยน เซ ธีง-เหฑ่ง เญย, ไม้ ม่าย หวุย.

40“สี ก๊อง หาย เต้า มจั่ง ตอน เญย บะเปยย โปย้, นิ่น เซ มฆ้อง ฌัง เญย มป่า ธีง-เหฑ่ง, ไม้ ม่าย หวุย.

41หาย เต้า เญย ปย้อง เธ้ย เหธา มฆ้อง หฑะเฮมียน แหมง เญย บะเปยย โปย้, นิ่น เญย มฆ้อง ฌัง เญย มป่า นิ่น ธีง-เหฑ่ง, ไม้ ม่าย หวุย.

42มป่า สี ก๊อง มฆ้อง ไฟ ปย้อง ฌัง ธ้วด เต๋ย แปะ ซิ เญย ต๋อง, น้าย เซ เยียม มฆ้อง ฌัง ไฟ ปย้อง ธ้วด เญย ก้ม ฮู้ แป่ง.

43ไซ เมี่ยน อ๋อย หฒุ ฒ่า หมั่ง. สี ก๊อง ปวัด เยียม มฆ้อง ไฟ ปย้อง อ๋ม เญย ต๋อง แปะ ซิ ฮนั้ง ก้ม ฮู้ แป่ง นอ,

44วั้ว เต้า เมี่ยน ฯฒฯ ม่าย ก้ม ฮู้ แป่ง. นิ่น ม่าย หวุย อ๊ะ. ไซ เมี่ยน ฯฒฯ ตี่ง นิ่น ม่าย หวุย, เหว่ย หฒุ แป่ง ปุ๊ด ธ้วด เยียม นิ่น เญย มฆ้อง.

45“เมี่ยน ปุ๊ด ก้ม ฮู้ แป่ง อ๋อย หฒุ ฒุ เป๊ด ฮู้ เญย ลุย-โหว, ปู๋ง บะเปยย เฟาะ, ปวัง เจี๊ยน กู้ หงว่าย วั้ว แหมง ฑุ่ย เหมย, หย่า เห่ว เจี๊ยน ก๊อง, ‘ม่าย หวุย, ม่าย หวุย อ๊ะ.’

46ตะฟ่าน ปุ๊ด เจี๊ยน วั้ว หญู่ง แป่ง, นิ่น ม่าย หวุย อ๊ะ. นิ่น อ๋อย หฒุ มี่ง เยียม กะเหญี่ย หฒิ ด๊บ-ลิ่ว เธี้ยง, หย่า อ๋อย หฒุ ดุ เต้า กั้น เยียม ฮนั้ง.

47“สี ก๊อง ลุย-โหว เจี๋ย บั๊ว, ไม้ กุ๊น ปะกี ยู่ง เปยย ไฟ ล่าม่า เดีย เญย ลุย-โหว,

48เซ หล่ง ล่าม่า สุย ไฟ ปะกี สุย ดั๊ด ต้าย ไฟ ธิ ต้าย เญย ลุย-โหว, ไฟ แซง-คู้ ด๊บ ไฟ หล่ง แซง-คู้ ด๊บ โหฒว ต้าย เญย หาย หญู่ง กะน้าย,

49หย่า สี ก๊อง น้าย เต๋ย ลุย-โหว ไฟ หล่ง ด๊บ โหฒว ต้าย เญย กะน้าย เจี๋ย บั๊ว ต้าย แมง เญย ไฟ ซิ เญย, น้าย หญู่ง กะน้าย-บั๊ว เซ ไฮ่ ปุ๊ด เจี๊ยน มี่ง. ฒู้ง อ๋อย หฒุ ปุน ไซ เมี่ยน ฒ่า หมั่ง.

50ไซ เมี่ยน หมั่ง ลิ์ว ฯฒฯ กั้น หธะเหล่ง เฮยี้ยด เจี๊ยน เหยียด นอม ต๋อง เสี่ย ฮนอย.

51เถา ตะเธี้ยด ฮนอย, ไซ เมี่ยน แอ๋ง ฒ่า หมั่ง. ปวัด น้าย เต๋ย กะน้าย-บั๊ว แอ๋ง ปุ๊ด เจี๊ยน มี่ง, ไม้ กุ๊น เยียม ลุย-โหว ไฟ ดั๊ด ต้าย ไฟ ธิ ต้าย เญย กะน้าย, ไฟ หาย หญู่ง หล่ง ด๊บ โหฒว ต้าย เญย กะน้าย, น้าย หญู่ง กะน้าย-บั๊ว เซ โตะ เญย. น้าย เต๋ย เจี๋ย บั๊ว เญย กะน้าย ฯฒฯ ม่าย หวุย.

52ไซ เมี่ยน อ๋อย หฒุ ปั๊ว กวั่ง เหฑ่ง น้าย เต๋ย หล่ง ปะกี สุย ไฟ ล่าม่า เดีย ดั๊ด ต้าย เญย ลุย-โหว ไฟ หล่ง ด๊บ โหฒว ต้าย เญย กะน้าย, เหว่ย หฒุ น้าย หญู่ง กะน้าย-บั๊ว เซ โตะ เญย. อ๋อย หฒุ หล่ง โต์ว ปั๊ว กวั่ง.

53“มป่า ไซ เมี่ยน ฒ่า หมั่ง เญย เฒี่ยง โห่, สี ก๊อง ปวัด เยียม ดั๊ด ต้าย ไฟ ธิ ต้าย เญย ลุย-โหว ไฟ หล่ง ด๊บ โหฒว ต้าย เญย กะน้าย, เจี๋ย น้าย หญู่ง บั๊ว ไม้ ปุ๊ด จั๊ง เจี๊ยน มี่ง,

54ไซ เมี่ยน อ๋อย หฒุ หัด โหฑ เจี๋ย บั๊ว เญย กะน้าย. โหฑ ลิ์ว, อ๋อย หฒุ แอ๋ง อัน เจี๊ยน วั้ว เสี่ย ฮนอย.

55โหฑ ลิ์ว, สี ก๊อง ปวัด น้าย เต๋ย กะน้าย ไม้ ถุย เซ้ด, ไม้ กุ๊น ไม้ ปุ๊ด จั๊ง เจี๊ยน มี่ง, หธ่อ ม่าย หวุย. ไม้ กุ๊น เจี๋ย บั๊ว กะญั์ว ไฟ กะเหญี่ย แหมง, อ๋อย หฒุ หล่ง โต์ว ปั๊ว กวั่ง.

56สี ก๊อง โหฑ ลิ์ว, ไซ เมี่ยน แอ๋ง ฒ่า หมั่ง วั้ว หฒั่น ปวัด เจี๋ย บั๊ว เญย ต๋อง เญย เซ้ด ถุย นอ, อ๋อย หฒุ เป๊ด เจี๋ย บั๊ว เญย ต๋อง ธ้วด วั้ว เต๋ย ลุย-โหว ไฟ ด๊บ ไฟ ดั๊ด ต้าย, ธิ ต้าย เญย เดีย.

57มป่า สี ก๊อง ฆะฮ้า น้าย เต๋ย ลุย-โหว, ไฟ ดั๊ด ต้าย, ธิ ต้าย เญย เดีย, ไฟ หล่ง ด๊บ โหฒว ต้าย เญย กะน้าย, หธ่อ แอ๋ง เจี๋ย บั๊ว, ปวัด ปุ๊ด ธั้ม เจี๊ยน ฝาว, อ๋อย หฒุ หล่ง โต์ว ปั๊ว กวั่ง.

58มป่า สี ก๊อง โหฑ ลิ์ว น้าย เต๋ย ลุย-โหว, ไฟ ดั๊ด ต้าย, ธิ ต้าย เญย เดีย, ไฟ หล่ง ด๊บ โหฒว ต้าย เญย กะน้าย, หย่า ปวัด เจี๋ย บั๊ว เญย ต๋อง เญย เซ้ด ถุย เหฑ่ง นอ, อ๋อย หฒุ แอ๋ง โหฑ หฑุ่น. น้าย เต๋ย กะน้าย ฯฒฯ ธีง-เหฑ่ง.”

59น้าย เซ กะน้าย เจี๋ย บั๊ว เญย เล์ย เหว่ย ตี่ง กะน้าย เซ ธีง-เหฑ่ง ไฟ ม่าย หวุย, ไม้ กุ๊น เซ หล่ง ปะกี สุย ไฟ ล่าม่า เดีย เญย ลุย-โหว, ดั๊ด ต้าย, ธิ ต้าย เญย เดีย, ไฟ หล่ง แซง-คู้ ด๊บ โหฒว ต้าย เญย กะน้าย.

← Chapter 12 Jump to: Chapter 14 →