Leviticus 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1เฒี้ยว ก๊อง บั๋ว โมเซ, “อ๋อย หฒุ บั๋ว ไซ เมี่ยน, เซ บั๋ว อาโลน เญย ตอน บัว, ‘ไซ เมี่ยน ไม้ ตู๋ง หลาย กั้น เญย เมี่ยน ไต่ ปุน กั้น ม่าย หวุย,

2ธ้วด ลิ์ว เหว่ย เก้า เธียน เจี๋ย วั้ว เต๋ย. เซ เหว่ย กั้น เญย เตี๋ย หม่า, ตอน ไฟ เซียะ, ก๋อ ไฟ โย์ว,

3ไฟ ไม้ ธ้วด แก้ง เญย ต่อ ไฟ หมั่ว. ต่อ ไฟ หมั่ว ไม้ ม่าย โหฆ ฯฒฯ เหว่ย นิ่น หฒุ ม่าย หวุย ตุ๊ เญย.

4หย่า ไม้ ตู๋ง เหว่ย ธีง-จา เหญี่ยม เธียน วั้ว เต๋ย ม่าย หวุย.

5“‘ไซ เมี่ยน ไม้ ตู๋ง เถย บะเปยย ไฟ จั๊บ ซยาม เตว๊ย-เมว์ย ไฟ ก๊าด กั้น เญย ซิน.

6นิ่น บัว อ๋อย หฒุ ธีง-เหฑ่ง เหว่ย นิ่น บัว เญย ทิน-ฮู่ง, หย่า ไม้ ตู๋ง ป่าย นิ่น บัว เญย ทิน-ฮู่ง เญย บั๋ว. นิ่น บัว อ๋อย หฒุ ธีง-เหฑ่ง เหว่ย หฒุ นิ่น บัว เฒาะ หล่ง โต์ว ปั๊ว เหฒี่ย ฝ่ง ห่อ เญย กะน้าย ปุน เฒี้ยว, เซ นิ่น บัว เญย ทิน-ฮู่ง เญย หญั่น ฮบ.

7“‘ไซ เมี่ยน ไม้ ตู๋ง หล่ง หม่าย ป๊วน-ซิน เญย มเซียะ ตอน, ไฟ หฑย่าว เจี๋ย ตอน เญย เซียะ, ไฟ เอ๊า-เล่ย โหฒว เอ๊า. ไซ เมี่ยน อ๋อย หฒุ ธีง-เหฑ่ง เญย เหว่ย นิ่น บัว เญย ทิน-ฮู่ง.

8อ๋อย หฒุ ฝุน นิ่น บัว ธีง-เหฑ่ง เหว่ย หฒุ นิ่น บัว ฝ่ง ห่อ เม่ย บัว เญย ทิน-ฮู่ง เญย หญั่น ฮบ. อ๋อย หฒุ ฝุน นิ่น บัว ธีง-เหฑ่ง, เหว่ย หฒุ เยีย, เฒี้ยว, ต้ง ปุน เม่ย บัว ธีง-เหฑ่ง วั้ว เต้า, เซ ธีง-เหฑ่ง.

9“‘สี ก๊อง หาย เต้า ไซ เมี่ยน เญย เซียะ เป๋น หม่าย ป๊วน-ซิน เญย มเซียะ ตอน ปุน กั้น ม่าย หวุย ฯฒฯ ป่าย นิ่น เญย เตีย, อ๋อย หฒุ หล่ง โต์ว ปั๊ว ไต่.

10“‘เยียม นิ่น เญย ก๋อ-โย์ว บุด๋ง ออน โหฒว ต้ม ไซ เมี่ยน, ตุ๊ โย่ว โต๋ นิ่น เญย มฆ้อง ฝูง ปุน ทิน-ฮู่ง ฯฒฯ ม่าย เล์ย ฒุ โหฒว ไซ เญย ลุย-โหว วั้ว เต้า, ไม้ ตู๋ง ปุน บะเปยย เฟาะ ไฟ เป๊ด กั้น เญย ลุย-โหว.

11หาย นอม ต๋อง ม่าย เมี่ยน ไต่, ไม้ ตู๋ง เปียะ วั้ว นอม ต๋อง. เลี่ยม เตีย ไฟ มา ไต่, ไม้ ตู๋ง ปุน กั้น ม่าย หวุย.

12หย่า ไม้ ตู๋ง ธ้วด นิ่น เญย ทิน-ฮู่ง เญย สีง ติ่น ไฟ ปุน สีง ติ่น ม่าย หวุย, เหว่ย หฒุ นิ่น ตุ๊ นิ่น เญย ทิน-ฮู่ง เญย ออน เมี่ยน โย่ว เฮยี้ยด เจี๊ยน นิ่น ปุน ธีง ฝูง ปุน ทิน-ฮู่ง หมี่ อ๊ะ. เยีย เซ เฒี้ยว.

13“‘ต้ม ไซ เมี่ยน อ๋อย หฒุ หล่ง ไม้ เปว๋ย เจี๋ย ตอน เญย เซียะ โหฒว เอ๊า.

14ไม้ ตู๋ง หล่ง เอ๊า-กว๊า, เอ๊า-เล่ย, ไฟ หฑย่าว เจี๋ย ตอน เญย เซียะ ไฟ หม่าย ป๊วน-ซิน เญย มเซียะ ตอน. ขูง หล่ง กั้น เญย แปะ ฝีง, ไม้ เปว๋ย เจี๋ย ตอน เญย เซียะ, โหฒว เอ๊า ฮนั้ง.

15อ๋อย หฒุ ฮนั้ง น้าย โหฒว เหว่ย ไม้ ปุน กั้น เญย ตอน-เจว๊ย ฟุน-ฟะ เยียม กั้น เญย แปะ ฝีง กะญั์ว ม่าย หวุย. เยีย เซ เฒี้ยว, ต้ง ปุน นิ่น ธีง-เหฑ่ง วั้ว เต้า.’”

16เฒี้ยว ก๊อง บั๋ว โมเซ,

17“บั๋ว อาโลน, ‘เม่ย เญย ต่อย เจี๋ย ต่อย เญย เฒ้ย-ฟุน, หาย เต้า เญย ซิน หฒั่ง หว่าย ฝัง เญย, ไม้ ไฮ่ ต้าย ฟัด ฝ่ง ห่อ นิ่น เญย ทิน-ฮู่ง เญย หญั่น ฮบ.

18ตะฟ่าน หว่าย ฝัง เญย เมี่ยน ไม้ ตุ๊ ต้าย ฟัด. เซ มฒีง แม่ง เญย, ไฟ เหฒา ไบ เญย, เฮมียน หว่าย ฝัง เญย, ซิน หฒั่ง หว่าย ฝัง เญย,

19ปั์ว-เหฒา หว่าย เญย,

20จ๊าย โบ๊ว เญย, ญั้น เญย, มฒีง หว่าย เญย, ม่าย ด๊บ ฮู้, ปุ๊ด ฟาง เญย แป่ง, ไฟ ไจ๋-ดุ้ย งั่น หว่าย เญย.

21อาโลน ไซ เมี่ยน เญย เฒ้ย-ฟุน, ตะฟ่าน หาย เต้า หว่าย ฝัง เญย, ไม้ ไฮ่ ต้าย ฟัด ฝ่ง ห่อ หล่ง โต์ว ปั๊ว เหฒี่ย ฝ่ง ห่อ ปุน เฒี้ยว เญย กะน้าย. หลาย นิ่น หว่าย ฝัง, ไม้ ไฮ่ ต้าย ฟัด ฝ่ง ห่อ นิ่น เญย ทิน-ฮู่ง เญย หญั่น ฮบ.

22นิ่น หญั่น นิ่น เญย ทิน-ฮู่ง เญย หญั่น ฮบ ตุ๊ เญย, ไม้ กุ๊น เก้า ธีง-เหฑ่ง เจี๋ย เญย ไฟ ธีง-เหฑ่ง เญย หญั่น ฮบ.

23มป่า หลาย นิ่น เญย ซิน หฒั่ง หว่าย, นิ่น ไม้ ไฮ่ เถา ฟัด สีง ติ่น เญย แบะ แก้ง เดีย ไฟ เหฒี่ย-ต้อง, ปุน เยีย เญย สีง ติ่น ม่าย หวุย. เยีย เซ เฒี้ยว, ต้ง ปุน นิ่น บัว ธีง-เหฑ่ง วั้ว เต้า.’”

24โมเซ ฯฒฯ ก๊อง เหฑ่ง น้าย เต๋ย เจ๊า-โหล่ว บั๋ว อาโลน เหธา นิ่น เญย ตอน เหธา อิสะลาเอน เญย หฒวัง เมี่ยน.

← Chapter 20 Jump to: Chapter 22 →