Leviticus 6

Mien Bible (Thai Script) © Thailand Bible Society, 2007

← Chapter 5 Jump to: Chapter 7 →

1เฒี้ยว ก๊อง บั๋ว โมเซ,

2“สี ก๊อง ม่าย เมี่ยน ป์าม ฒุ์ย, ไม้ เหฒียบ ฒัวะ เญย โหฒว ปุน เฒี้ยว, เซ นิ่น ดั๊ว จวั่ง ล์าง เญย ก๋อ-โย์ว เยียม เมี่ยน เญย ตี่ง-ฒิ่น, ไฟ เมี่ยน จุ๋ย ปุน นิ่น เซียว เญย กะน้าย, ไฟ นิ่น หนิ่ม เมี่ยน เญย กะน้าย, ไฟ โหฒว ปุน เมี่ยน หฒุ เควย,

3ไฟ หฒวด ตุ๊ กะน้าย หย่า ไม้ เหญี่ยม, ไฟ ก๊อง จ๊า หว่า โด๊ว เหฒียว, ไฟ โหฒว หาย หญู่ง เมี่ยน ไฮ่ โหฒว ต่อง เญย ฒุ์ย,

4วั้ว เต้า ฯฒฯ โหฒว ต่อง, ม่าย ฒุ์ย อ๊ะ. นิ่น อ๋อย หฒุ ถุย หฑวน นิ่น หนิ่ม เญย, ไฟ ปุน เมี่ยน หฒุ เควย เญย, ไฟ เมี่ยน จุ๋ย ปุน นิ่น เญย กะน้าย, ไฟ หฒวด ต้าย เญย กะน้าย,

5ไฟ นิ่น เหว่ย หาย หญู่ง กะน้าย โด๊ว เหฒียว จ๊า เญย. ต้อ กะน้าย มี่ง เหฒี่ย เหว่ย โหฒว ต่อง ฒุ์ย วั้ว ฮนอย, นิ่น อ๋อย หฒุ ถุย เหฑ่ง แอ๋ง ปุ้ย ปยา โก๊ว เญย เหยียด โก๊ว ปุน วั้ว เต๋ย กะน้าย เญย เฒี้ยว.

6นิ่น อ๋อย หฒุ เหว่ย นิ่น โหฒว ต่อง เญย ฒุ์ย ต้อ เต้า ไม้ หว่าย ฝัง เญย ปะกี ยู่ง โก๊ว เถา ไซ เมี่ยน วั้ว ปุน เฒี้ยว. เม่ย กั้น อ๋อย หฒุ ฝุน ปะกี ยู่ง เญย จ๋า-ฒิ่น ผุย หอบ เหว่ย โหฒว ต่อง ฒุ์ย เหฒี่ย เญย กะน้าย.

7ไซ เมี่ยน ฯฒฯ เยียม เฒี้ยว เญย หฑะเฮมียน เถง นิ่น ฟิ ฒุ์ย. ฮนั้ง หน่าย, ไม้ กุ๊น นิ่น โหฒว หาย หญู่ง ต่อง ฒุ์ย, นิ่น ตุ๊ กวั่ง หมี่ อ๊ะ.”

8เฒี้ยว ก๊อง บั๋ว โมเซ,

9“อ๋อย หฒุ ฮนั้ง น้าย นอ พ้าย อาโลน เหธา นิ่น เญย ตอน บัว, ‘ปั๊ว เหฒี่ย เญย เล์ย-เหญ่ย เซ ฮนั้ง น้าย. ปั๊ว เหฒี่ย เญย กะน้าย อ๋อย หฒุ เยียม เหฒี่ย-ต้อง กู้ หงว่าย เฒี่ยง ม์วน ปั๊ว เถา ลู่ง ฌัง. เหฒี่ย-ต้อง เญย โต์ว หย่า อ๋อย หฒุ หฒั่นๆ เหฒียะ เจี๊ยน.

10ไซ เมี่ยน อ๋อย หฒุ ฒุ ล่าม่า เดีย เญย ลุย-ด๊าว เหธา ล่าม่า เดีย เญย โหว, เฒาะ เยียม เหฒี่ย-ต้อง ปั๊ว ลิ์ว เหฒี่ย เญย กะน้าย เญย ซ้าย, อัน เจี๊ยน เหฒี่ย-ต้อง กะเฮลน.

11ฆะฮ้า อ๋อย หฒุ เหยี่ยน ฆอย ลุย-โหว แอ๋ง ฒุ กั้น เต๋ย, ฯฒฯ ต้อ ซ้าย ธ้วด กะเหญี่ย หฒิ ด๊บ-ลิ่ว เธี้ยง เถา นอม ไม้ ม่าย หวุย เญย ต๋อง.

12เยียม เหฒี่ย-ต้อง เญย โต์ว อ๋อย หฒุ หฒั่นๆ เหฒียะ เจี๊ยน, ไม้ ตู๋ง ปุน ไต่. ไซ เมี่ยน ดอมๆ อ๋อย หฒุ จา ฒ่าง แอ๋ง เฒาะ ปั๊ว เหฒี่ย เญย กะน้าย เฒว่ย เยี้ยด เฒว่ย เหญ่ย เญย อัน โต์ว กู้ หงว่าย. แอ๋ง เฒาะ เหฒี่ย เหว่ย จิว ทง เญย แซง-คู้ เฮมย จา กู้ หงว่าย.

13เหฒี่ย-ต้อง เญย โต์ว อ๋อย หฒุ หฒั่นๆ เหฒียะ เจี๊ยน. ธิน-หม่าน ไม้ ตู๋ง ปุน ไต่.

14“‘ฝ่ง ห่อ เหฒี่ย เญย ล่าง หฒิ เญย เล์ย-เหญ่ย เซ ฮนั้ง น้าย. อาโลน เญย ตอน บัว อ๋อย หฒุ เยียม เหฒี่ย-ต้อง หฑะเฮมียน เฒาะ ฝ่ง ห่อ เญย ล่าง หฒิ เหฒี่ย ปุน เฒี้ยว.

15ไซ เมี่ยน อ๋อย หฒุ เฒาะ เหยียด เญา บ๊วน-หม่วน หฒอบ เจี๊ยน กะลั้น โย่ว, เหธา เฮยี้ยด เจี๊ยน ล่าง หฒิ เญย เหยียด ฒู้ง ฮูง, อัน เหฒี่ย-ต้อง กู้ หงว่าย ปั๊ว เหฒี่ย เหว่ย ปุน เฒี้ยว จั๋ง ฝ่ง ห่อ เญย เมี่ยน, เว่ย ดาง เญย เฉีย หอบ เฒี้ยว เญย เฮญี้ยว.

16เหฒ่ง เหฌี่ย เญย ป่วน, อาโลน เหธา นิ่น เญย ตอน บัว หญั่น. ไม้ ตู๋ง อัน ปี๊ง. หย่า อ๋อย หฒุ เยียม นอม ธีง-เหฑ่ง เญย ต๋อง, เซ เยียม หวุ่ย ปวั้ง ด๊บ-ลิ่ว เญย หลาด กะญั์ว แหมง หญั่น.

17ไม้ ตู๋ง อัน ปี๊ง ฒิ. น้าย เซ หล่ง โต์ว ปั๊ว เหฒี่ย ฝ่ง ห่อ ปุน เยีย เญย กะน้าย, ต้ง เยีย จิว ปุน ไซ เมี่ยน เป๋น นิ่น บัว เญย ป่วน. เซ ธีง-เหฑ่ง เจี๋ย เญย, ฮนั้ง เหฒี่ย ฟิ ฒุ์ย เหธา โหฒว ต่อง ฒุ์ย เหฒี่ย เญย กะน้าย ธีง-เหฑ่ง.

18อาโลน เญย เฒ้ย-ฟุน, โม์ว เต้า มจั่ง ตอน, หญั่น ตุ๊ เญย. น้าย เซ หล่ง โต์ว ปั๊ว ฝ่ง ห่อ ปุน เฒี้ยว, ต่อย เจี๋ย ต่อย เหยียด ลิ์ว ตุ๊ เญย ป่วน. หาย เต้า มัวะ หฒุ น้าย เต๋ย กะน้าย ฯฒฯ ธีง-เหฑ่ง.’”

19เฒี้ยว ก๊อง บั๋ว โมเซ,

20“น้าย เซ หล่ง โย่ว ออน อาโลน เหธา นิ่น เญย ตอน บัว โหฒว ไซ เมี่ยน วั้ว ฮนอย อ๋อย หฒุ ฝ่ง ห่อ ปุน เฒี้ยว. อ๋อย หฒุ ต้อ อี เมาะ บ๊วน-หม่วน เว่ย ฮนอยๆ เหฒี่ย เญย ล่าง หฒิ. ลู่ง ดอม ฝ่ง ห่อ เหยียด ป่วน, ลู่ง หฮมวัง เหยียด ป่วน.

21เฒาะ กะลั้น โย่ว โต๋ เจี๊ยน บ๊วน, โช้ว หลง, อัน แธง น้าด. แอ๋ง แมะ ต้าย ฝ่ง ห่อ โหฒว เหฒี่ย เญย ล่าง หฒิ, เว่ย ดาง เญย เฉีย หอบ เฒี้ยว เญย เฮญี้ยว.

22หล่ง โย่ว ออน อาโลน เญย หาย เต้า เฒ้ย-ฟุน หฑิบ เจี๊ยน โหฒว ไซ เมี่ยน, อ๋อย หฒุ เฒาะ น้าย เต๋ย ฝ่ง ห่อ เญย ล่าง หฒิ เหยียด ฒู้ง ปั๊ว เหฑ่ง เหฒี่ย ปุน เฒี้ยว. น้าย เซ เหยียด ลิ์ว อ๋อย หฒุ กัน เญย เล์ย.

23ตะฟ่าน ไซ เมี่ยน ฝ่ง ห่อ เหฒี่ย เญย ล่าง หฒิ, หฑุ่นๆ อ๋อย หฒุ ปั๊ว เหฑ่ง. ไม้ ตู๋ง หญั่น.”

24เฒี้ยว ก๊อง บั๋ว โมเซ,

25“อ๋อย หฒุ บั๋ว อาโลน เหธา นิ่น เญย ตอน บัว, ‘เหฒี่ย ฟิ ฒุ์ย เญย เล์ย-เหญ่ย เซ ฮนั้ง น้าย. เหฒี่ย ฟิ ฒุ์ย เญย แซง-คู้ อ๋อย หฒุ เยียม เฒี้ยว เญย หฑะเฮมียน ไต๋, เซ เยียม ไต๋ ปั๊ว เหฒี่ย เญย แซง-คู้ เญย ต๋อง ไต๋. น้าย เซ เก้า ธีง-เหฑ่ง เจี๋ย เญย กะน้าย.

26ปุน เถง เหฒี่ย ฟิ ฒุ์ย วั้ว เต้า ไซ เมี่ยน หญั่น น้าย เต้า แซง-คู้. หย่า อ๋อย หฒุ เยียม ธีง-เหฑ่ง เญย ต๋อง, เซ เยียม หวุ่ย ปวั้ง ด๊บ-ลิ่ว เญย หลาด กะญั์ว แหมง หญั่น.

27ตะฟ่าน หาย หญู่ง มัวะ หฒุ น้าย เต๋ย อ๊อ, วั้ว หญู่ง ฯฒฯ ธีง-เหฑ่ง หมี่ อ๊ะ. สี ก๊อง วั้ว เต้า แซง-คู้ เญย ฑย้าม กั๊วะ หฒุ ลุย, อ๋อย หฒุ เยียม นอม ธีง-เหฑ่ง เญย ต๋อง โหฑ เหฑ่ง.

28โฒ้ว น้าย เต๋ย อ๊อ เญย เนีย-มอ อ๋อย หฒุ เบ๊าะ ฮู้. มป่า สี ก๊อง หล่ง ต้ง ซิ แธง โฒ้ว นอ, อ๋อย หฒุ ฑ้าด, แอ๋ง หล่ง ววม หฑาว.

29ตะฟ่าน ไซ เมี่ยน เญย ฮมวั้ง ต่อย, มจั่ง ตอน วั้ว เต๋ย, หญั่น ตุ๊ เญย. เซ ธีง-เหฑ่ง เจี๋ย เญย กะน้าย.

30มป่า สี ก๊อง ไซ เมี่ยน ต้อ หาย เต้า เหฒี่ย ฟิ ฒุ์ย เญย แซง-คู้ ฑย้าม เปียะ หวุ่ย ปวั้ง เญย ด๊บ-ลิ่ว, เยียม ธีง-เหฑ่ง วั้ว ฉง ฟิ ฒุ์ย, ไม้ ตู๋ง หญั่น วั้ว เต้า แซง-คู้ เญย อ๊อ. อ๋อย หฒุ ปั๊ว เหฑ่ง.

← Chapter 5 Jump to: Chapter 7 →