Leviticus 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1อาโลน เญย อี เต้า ตอน มี่ง ฟัด เฒี้ยว ฯฒฯ ไต่ หมี่ อ๊ะ. ฆะฮ้า เฒี้ยว ก๊อง บั๋ว โมเซ,

2“อ๋อย หฒุ บั๋ว เม่ย เญย ก๋อ, อาโลน, ไม้ ตู๋ง หฒั่นๆ เปียะ แบะ แก้ง เดีย กะญั์ว วั้ว ฉง, เซ เก้า ธีง-เหฑ่ง เจี๋ย วั้ว ฉง, ต้ง เฒี้ยว เหธย เอน เญย เหว่ย เยียม แล์ง แหง่ง หว่า ฟาง กู้ หงว่าย วั้ว นอม ต๋อง. เหฑีย นิ่น ฒู้ง หฒุ ไต่, เหว่ย หฒุ เยีย อ๋อย เยียม บ๋วน หิ่น ธ้วด เหธย เอน เญย เหว่ย กู้ หงว่าย.

3“อาโลน อ๋อย เปียะ ธีง-เหฑ่ง เจี๋ย เญย ต๋อง, นิ่น อ๋อย หฒุ ฮนั้ง น้าย นอ โหฒว. อ๋อย หฒุ หล่ง เต้า ง่ง โก๊ว ธาน เหฒี่ย เหว่ย ฟิ ฒุ์ย หย่า หล่ง เต้า ปะกี ยู่ง โก๊ว เหว่ย ปั๊ว เหฒี่ย.

4อ๋อย หฒุ ฒุ เจี๊ยน ล่าม่า เดีย เญย ธีง-เหฑ่ง ลุย-ด๊าว หย่า ฒุ เจี๊ยน ล่าม่า เดีย เญย โหว, ไซ เจี๊ยน จ๊าย เญย ล่าม่า เดีย, แอ๋ง เฒาะ ล่าม่า เดีย เญย มฆ้อง-เปว เปว เจี๊ยน มฆ้อง. น้าย เซ ธีง-เหฑ่ง เญย ลุย-โหว ฯฒฯ อ๋อย หฒุ หล่ง ววม หฑาว เหฑ่ง ซิน หธีง ฒุ เจี๊ยน.

5อ๋อย หฒุ เยียม อิสะลาเอน เญย หฒวัง เมี่ยน กะญั์ว เฒาะ ธ้วด อี เต้า ยู่ง โก๊ว เหฒี่ย เหว่ย ฟิ ฒุ์ย หย่า เฒาะ เต้า ปะกี ยู่ง โก๊ว เหว่ย ปั๊ว เหฒี่ย.

6“อาโลน อ๋อย หฒุ เฒาะ ฟิ กั้น เญย ฒุ์ย วั้ว เต้า ง่ง โก๊ว เหฒี่ย เหว่ย ฟิ กั้น เญย ฒุ์ย เหธา กั้น เญย เปย๊า ฒง เมี่ยน เญย ฒุ์ย.

7นิ่น อ๋อย หฒุ แอ๋ง เฒาะ วั้ว เต๋ย อี เต้า ยู่ง โก๊ว เยียม หวุ่ย ปวั้ง ด๊บ-ลิ่ว เญย แก้ง ด่าง ฝ่ง ห่อ ปุน เฒี้ยว.

8อาโลน อ๋อย หฒุ เหว่ย น้าย เต๋ย อี เต้า ยู่ง โก๊ว ตี่ง แหม่ง หมั่ง. เหยียด เต้า ด๊อด เป๋น เฒี้ยว เญย, เหยียด เต้า เป๋น เถย ฒุ์ย เญย ยู่ง โก๊ว.

9อาโลน ฯฒฯ เฒาะ ด๊อด เป๋น เฒี้ยว เญย ป่วน วั้ว เต้า ยู่ง โก๊ว เหฒี่ย เหว่ย ฟิ ฒุ์ย.

10มป่า ด๊อด เป๋น เถย ฒุ์ย วั้ว เต้า ยู่ง อ๋อย หฒุ เลี่ยม นั่ง ฝ่ง ห่อ ปุน เฒี้ยว เหว่ย ฟิ ฒุ์ย, ฯฒฯ ฝูง กวั่ง วั้ว เต่ย-ปูง-ฮวาง เถย ฒุ์ย.

11“อาโลน อ๋อย หฒุ เฒาะ ฟิ กั้น เญย ฒุ์ย วั้ว เต้า ง่ง โก๊ว ไต๋ ต้าย เหฒี่ย ฟิ กั้น เญย ฒุ์ย เหธา เปย๊า ฒง เมี่ยน เญย ฒุ์ย.

12นิ่น อ๋อย หฒุ แอ๋ง เฒาะ ฮูง-โล่ว ตั๊บ ปวั๊ง เยียม เฒี้ยว เญย หฑะเฮมียน เญย เหฒี่ย-ต้อง เญย โต์ว-ถาน-นั่ง เหธา อี เญา ฒง หม่วน เญย ฮูง, ต้อ เจี๊ยน เปียะ แบะ แก้ง เดีย กะญั์ว.

13อ๋อย หฒุ เยียม เฒี้ยว เญย หฑะเฮมียน เฒาะ ฮูง อัน เจี๊ยน โต์ว กู้ หงว่าย ปุน ฮูง-เสียว ฝาว อม เจี๊ยน เหธย เอน เญย เหว่ย, แล์ง แหง่ง หว่า ฟาง กู้ หงว่าย, เหว่ย ปุน กั้น ไม้ หฒุ ไต่.

14นิ่น อ๋อย หฒุ แอ๋ง เฒาะ เต๋ย ง่ง โก๊ว เญย ฑย้าม หล่ง ปั์ว-โด๊ะ ทิว ฑย้าม มี่ง กั๊วะ เหธย เอน เญย เหว่ย หฑะเฮมียน, แอ๋ง หล่ง ปั์ว-โด๊ะ โธะ ฑย้าม ทิว มี่ง เหธย เอน เญย เหว่ย หฑะเฮมียน แหมง เสี่ย หฑุ่น.

15“อาโลน อ๋อย หฒุ ไต๋ เหว่ย เถง หฒวัง แปะ ฝีง เหฒี่ย ฟิ ฒุ์ย วั้ว เต้า ยู่ง, เฒาะ เต๋ย ยู่ง ฑย้าม ต้อ เปียะ แบะ แก้ง เดีย กะญั์ว. นิ่น อ๋อย หฒุ โธะ ยู่ง ฑย้าม ทิว มี่ง กั๊วะ เหธย เอน เญย เหว่ย กู้ หงว่าย แหมง เหธา หฑะเฮมียน แหมง, ฮนั้ง หล่ง ง่ง โก๊ว เญย ฑย้าม โหฒว วั้ว นอ.

16ฮนั้ง หน่าย, อาโลน ฯฒฯ เหว่ย เก้า ธีง-เหฑ่ง เจี๋ย วั้ว ฉง ฟิ ฒุ์ย, เซ หลาย อิสะลาเอน เมี่ยน เญย หวุย เหธา แหง่ง เฒี้ยว เญย สี่ หย่า หลาย นิ่น บัว เญย เหยียด ฒู้ง ฒุ์ย. อาโลน หย่า อ๋อย หฒุ ฮนั้ง น้าย โหฒว เหว่ย หวุ่ย ปวั้ง เญย ด๊บ-ลิ่ว, หลาย เยียม ม่าย หวุย เญย แปะ ฝีง บุด๋ง.

17เยียม อาโลน เปียะ เก้า ธีง-เหฑ่ง เจี๋ย วั้ว ฉง ฟิ ฒุ์ย เญย เฒี่ยง โห่, ไม้ ตู๋ง ม่าย เมี่ยน เยียม ด๊บ-ลิ่ว กะญั์ว. ฒั้ว เถา เหว่ย กั้น, เหธา เปย๊า ฒง เมี่ยน, เหธา อิสะลาเอน เญย หฒวัง เมี่ยน ฟิ ลิ์ว ฒุ์ย ธ้วด ต้าย.

18“อาโลน ธ้วด ต้าย อ๋อย หฒุ แอ๋ง มี่ง เถา เยียม เฒี้ยว เญย หฑะเฮมียน เญย เหฒี่ย-ต้อง วั้ว, เหว่ย เหฒี่ย-ต้อง ฟิ ฒุ์ย. นิ่น อ๋อย หฒุ แอ๋ง เฒาะ เต๋ย ง่ง โก๊ว เญย ฑย้าม เหธา ยู่ง เญย ฑย้าม ไหฒ เปยย ปูง เหฒี่ย-ต้อง เญย จอง.

19หย่า หล่ง ปั์ว-โด๊ะ โธะ ฑย้าม ทิว มี่ง เหฒี่ย-ต้อง เสี่ย หฑุ่น เหว่ย สา เหฒี่ย-ต้อง เญย หวุย, เซ เยียม อิสะลาเอน เมี่ยน หฒุ ต้าย เญย หวุย. ฮนั้ง น้าย โหฒว, เหฒี่ย-ต้อง ฯฒฯ ธีง-เหฑ่ง หมี่ อ๊ะ.

20“อาโลน เหว่ย เก้า ธีง-เหฑ่ง เจี๋ย วั้ว ฉง เหธา หวุ่ย ปวั้ง เญย ด๊บ-ลิ่ว เหธา เหฒี่ย-ต้อง ฟิ ลิ์ว ฒุ์ย, นิ่น อ๋อย หฒุ เฒาะ นั่ง เญย วั้ว เต้า ยู่ง ฝูง ปุน เฒี้ยว.

21นิ่น ฯฒฯ หล่ง ซูง-ปั์ว มาน เจี๊ยน นั่ง วั้ว เต้า ยู่ง เญย มฆ้อง, เหญี่ยม อิสะลาเอน เญย หฒวัง เมี่ยน โหฒว เฮญี้ยว แหง่ง, โหฒว เอ๊าะ, เหธา โหฒว เญย เหยียด ฒู้ง ฒุ์ย, อัน เจี๊ยน ยู่ง เญย มฆ้อง. ฆะฮ้า ปุน เต้า พ้าย เหฒียง เญย เมี่ยน ต้าย ต้อ ยู่ง มี่ง ปู๋ง วั้ว เต่ย-ปูง-ฮวาง.

22วั้ว เต้า ยู่ง ฯฒฯ เถย นิ่น บัว เญย เหยียด ฒู้ง ฒุ์ย เถา นอม เล่ง เญย ต๋อง, เยียม หน่าย ปู๋ง ยู่ง เปียะ เต่ย-ปูง-ฮวาง มี่ง.

23“ฆะฮ้า อาโลน อ๋อย หฒุ เปียะ หวุ่ย ปวั้ง เญย ด๊บ-ลิ่ว กะญั์ว เหยี่ยน ฆอย ต้ง นิ่น ฒุ เจี๊ยน เปียะ เก้า ธีง-เหฑ่ง เจี๋ย วั้ว ฉง วั้ว เต๋ย ล่าม่า เดีย เญย ลุย-โหว, อัน เจี๊ยน วั้ว.

24นิ่น อ๋อย หฒุ เยียม นอม ธีง-เหฑ่ง ต๋อง หล่ง ววม หฑาว ซิน แอ๋ง ฒุ เจี๊ยน เหยียด เกา ฒุ เญย ไซ เมี่ยน ลุย. ฆะฮ้า อ๋อย หฒุ ธ้วด มี่ง เหว่ย กั้น หย่า เหว่ย แปะ ฝีง เฒาะ กะน้าย ปั๊ว เหฒี่ย ฟิ กั้น เญย ฒุ์ย เหธา แปะ ฝีง เญย ฒุ์ย.

25อ๋อย หฒุ แอ๋ง เฒาะ เหฒี่ย เหว่ย ฟิ ฒุ์ย วั้ว เต้า แซง-คู้ เญย เฮมย อัน วั้ว เหฒี่ย-ต้อง ปั๊ว.

26“ต้อ เถย ฒุ์ย เญย ยู่ง มี่ง ปู๋ง วั้ว เต้า เมี่ยน อ๋อย หฒุ โหฑ ลุย-โหว, หล่ง ววม หฑาว ซิน, ฯฒฯ เปียะ ด๊บ-ลิ่ว เธี้ยง ตุ๊ อ๊ะ.

27โหฒว เหฒี่ย ฟิ ฒุ์ย เญย ง่ง โก๊ว เหธา ยู่ง โก๊ว, ต้ง อาโลน ต้อ ฑย้าม เปียะ เก้า ธีง-เหฑ่ง เจี๋ย วั้ว ฉง ฟิ ฒุ์ย วั้ว เต๋ย แซง-คู้, อ๋อย หฒุ เปี้ยน ธ้วด กะเหญี่ย หฒิ ด๊บ-ลิ่ว เธี้ยง. ด๊บ, อ๊อ เหธา ไฆ้ อ๋อย หฒุ หล่ง โต์ว ปั๊ว เหฑ่ง.

28ปั๊ว น้าย เต๋ย กะน้าย วั้ว เต้า เมี่ยน อ๋อย หฒุ โหฑ ลุย-โหว, หล่ง ววม หฑาว ซิน, ฆะฮ้า เปียะ ด๊บ-ลิ่ว เธี้ยง ตุ๊ อ๊ะ.

29“น้าย เซ เม่ย บัว อ๋อย หฒุ เหยียด ลิ์ว กัน เญย เล์ย, โม์ว หฮญัง เถา เธี้ยด หฮลา แซง-เหฒียบ, เม่ย บัว อ๋อย หฒุ เฒย ไม้ หญั่น หาย หญู่ง. หย่า ไม้ ตู๋ง โหฒว หาย หญู่ง กง, ไม้ กุ๊น ป๊วน-เต่ย เมี่ยน ไฟ เยียม เม่ย บัว บุด๋ง เญย กั้น ฝีง เมี่ยน,

30เหว่ย หฒุ เยียม น้าย นอม ฮนอย อ๋อย หฒุ เหว่ย เม่ย บัว ฟิ ฒุ์ย, ปุน เม่ย บัว ธีง-เหฑ่ง ต้าย. ฮนั้ง น้าย, เม่ย บัว ฯฒฯ เยียม เฒี้ยว เญย หฑะเฮมียน ธีง-เหฑ่ง, เล่ย ดุ๊ด เม่ย บัว เญย เหยียด ฒู้ง ฒุ์ย.

31น้าย เซ ตี้ง กง ฮนอย, อ๋อย หฒุ ฮิด ขวน. เม่ย บัว อ๋อย หฒุ หล่ง เฮญี้ยว เฒย ไม้ หญั่น หาย หญู่ง. เซ เหยียด ลิ์ว อ๋อย หฒุ กัน เญย เล์ย.

32ตุ๊ หล่ง โย่ว ออน ต้าย หฑิบ นิ่น เญย เตีย โหฒว ไซ เมี่ยน วั้ว เต้า อ๋อย หฒุ ฒุ ธีง-เหฑ่ง เญย ล่าม่า เดีย ลุย-โหว เถง ฟิ ฒุ์ย.

33นิ่น อ๋อย หฒุ เหว่ย เก้า ธีง-เหฑ่ง เจี๋ย วั้ว ฉง เหธา หวุ่ย ปวั้ง เญย ด๊บ-ลิ่ว เหธา เหฒี่ย-ต้อง ฟิ ฒุ์ย. หย่า อ๋อย หฒุ เหว่ย หฒวัง ไซ เมี่ยน เหธา หฒวัง แปะ ฝีง ฟิ ฒุ์ย.

34“น้าย เซ เม่ย บัว เหยียด ลิ์ว อ๋อย หฒุ กัน เญย เล์ย. อ๋อย หฒุ เหว่ย อิสะลาเอน เมี่ยน เญย เหยียด ฒู้ง ฒุ์ย เหยียด หฮญัง ฟิ เหยียด หฑุ่น.” โมเซ ฯฒฯ หฒิว เฒี้ยว พ้าย เญย หว่า โหฒว เหฒียง.

← Chapter 15 Jump to: Chapter 17 →