Leviticus 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1เฒี้ยว ก๊อง บั๋ว โมเซ,

2“อ๋อย หฒุ บั๋ว อาโลน เหธา นิ่น เญย ตอน บัว, ‘ฟิ หลง อิสะลาเอน เมี่ยน ฝูง ปุน เยีย เญย ธีง-เหฑ่ง กะน้าย, เหว่ย ไม้ ป่าย เยีย เญย ธีง-เหฑ่ง บั๋ว. เยีย เซ เฒี้ยว. ’

3“อ๋อย หฒุ บั๋ว นิ่น บัว, ‘ต่อย เจี๋ย ต่อย, สี ก๊อง เม่ย บัว เญย หาย เต้า เฒ้ย-ฟุน ม่าย หวุย เญย เฒี่ยง โห่ ต้าย ฟัด อิสะลาเอน เมี่ยน ฝูง ปุน เฒี้ยว เญย ธีง-เหฑ่ง กะน้าย, วั้ว เต้า อ๋อย หฒุ ไพ กวั่ง, ไม้ ตุ๊ เยียม เยีย เญย หฑะเฮมียน. เยีย เซ เฒี้ยว.

4“‘ตะฟ่าน อาโลน เญย หาย เต้า เฒ้ย-ฟุน ปุ๊ด ก้ม ฮู้ แป่ง ไฟ ซิน ม่าย กะน้าย ธ้วด เญย, นิ่น ไม้ ตู๋ง หญั่น ธีง-เหฑ่ง กะน้าย. ฒั้ว เถา นิ่น ธีง-เหฑ่ง หธีง หญั่น ตุ๊. หาย เต้า มัวะ หฒุ ม่าย หวุย เญย กะน้าย ฯฒฯ ม่าย หวุย. เซ มัวะ หฒุ จั๋น-ไต่, ไฟ มัวะ หฒุ ไจ๋-หน่ง ธ้วด เญย เมี่ยน,

5ไฟ มัวะ หฒุ หาย หญู่ง ญอง เดา ไฮ่ ปุน นิ่น ม่าย หวุย เญย กะน้าย, ไฟ มัวะ หฒุ หาย เต้า ไม้ ธีง-เหฑ่ง เญย เมี่ยน ไม้ กุ๊น วั้ว เต้า ม่าย หาย หญู่ง หวุย.

6หาย เต้า มัวะ หฒุ น้าย เต๋ย หาย หญู่ง กะน้าย ฯฒฯ ม่าย หวุย เถา หฮมวัง. นิ่น ไม้ ตู๋ง หญั่น ฝ่ง ห่อ เญย ธีง-เหฑ่ง กะน้าย. อ๋อย หฒุ หล่ง ววม หฑาว ซิน ด่าง.

7เถา บะฮนอย ม้วด เญย เฒี่ยง โห่ นิ่น ธีง-เหฑ่ง หมี่ อ๊ะ. ฆะฮ้า หญั่น น้าย เต๋ย กะน้าย ตุ๊ เญย เหว่ย หฒุ น้าย เซ นิ่น เญย หญั่น ฮบ.

8ไม้ ตู๋ง หญั่น นิ่น กั้น ไต่ เญย กะน้าย ไฟ หฒุ เฮยี่ย ฒ่อย หงาด ไต่ เญย กะน้าย ฯฒฯ หฒุ ม่าย หวุย. เยีย เซ เฒี้ยว.

9“‘ไซ เมี่ยน อ๋อย หฒุ เอย เจี๊ยน เยีย ตี่ง ต้าย เญย เล์ย-เหญ่ย โหฒว. ไม้ เฒย แอ๊ะ, เหฑีย นิ่น บัว อ๋อย หฒุ ดาม ฒุ์ย ฯฒฯ หฒุ ไต่ เหว่ย หฒุ ไม้ เอย เจี๊ยน น้าย เต๋ย เล์ย. เยีย เซ เฒี้ยว, ต้ง ปุน นิ่น บัว ธีง-เหฑ่ง วั้ว เต้า.

10“‘ขูง ไซ เมี่ยน เญย ฮมวั้ง ต่อย ไฮ่ หญั่น ฝ่ง ห่อ เญย ธีง-เหฑ่ง กะน้าย. กั้น เต้า ไม้ คู่ หญั่น. ตี้ง ไซ เมี่ยน เญย เปย๊า เญย แคะ เมี่ยน ไฟ ธี้ง ต้าย เญย กง-เมี่ยน ไม้ คู่ หญั่น.

11มป่า สี ก๊อง ไซ เมี่ยน หล่ง ญ่าน ม์าย โน่ว ไฟ เยียม นิ่น เญย เปย๊า ธ้วด เสย เญย เมี่ยน, หญั่น น้าย เต๋ย กะน้าย ตุ๊ เญย.

12สี ก๊อง ไซ เมี่ยน เญย เซียะ ตอง จา, ไม้ เฒ์ย หล่ง โหฒว ไซ เญย เมี่ยน, นิ่น ไม้ คู่ หญั่น ฝ่ง ห่อ เญย ธีง-เหฑ่ง กะน้าย.

13มป่า สี ก๊อง ไซ เมี่ยน เญย เซียะ กว๊า มี่ง ไฟ เล่ย มี่ง หย่า ไม้ ม่าย ฝุเจว๊ย, แอ๋ง หฑวน ต้าย เยียม นิ่น เญย เตีย เญย เปย๊า ฮนั้ง หลุน เญย เฒี่ยง โห่ นอ, ฯฒฯ หญั่น นิ่น เญย เตีย เญย หญั่น ฮบ ตุ๊ เญย. มป่า กะเหญี่ย เญย เมี่ยน ไม้ คู่ หญั่น.

14“‘สี ก๊อง หาย เต้า ธะ-โป่ว หญั่น ฝ่ง ห่อ เญย ธีง-เหฑ่ง กะน้าย, นิ่น อ๋อย หฒุ จ๊าว ซูง นิ่น หญั่น เญย แอ๋ง ปุ้ย ปยา โก๊ว เญย เหยียด โก๊ว, หย่า เฒาะ น้าย เต๋ย ธีง-เหฑ่ง กะน้าย ฝูง ปุน ไซ เมี่ยน.

15ไซ เมี่ยน ไม้ ตู๋ง ปุน อิสะลาเอน เมี่ยน ฝ่ง ห่อ ปุน เฒี้ยว เญย ธีง-เหฑ่ง กะน้าย ม่าย หวุย.

16หลาย หญั่น ต่อง น้าย เต๋ย ธีง-เหฑ่ง กะน้าย, นิ่น บัว ฯฒฯ หฒุ ดาม-ตอง ตี่ง ฒุ์ย. เยีย เซ เฒี้ยว, ต้ง ปุน นิ่น บัว ธีง-เหฑ่ง วั้ว เต้า.’”

17เฒี้ยว ก๊อง บั๋ว โมเซ,

18“อ๋อย หฒุ บั๋ว อาโลน เหธา นิ่น เญย ตอน เหธา อิสะลาเอน เญย หฒวัง เมี่ยน, ‘ตะฟ่าน เม่ย บัว หาย เต้า อิสะลาเอน เมี่ยน ไฟ เยียม อิสะลาเอน เต่ย-ปูง เญย กั้น ฝีง เมี่ยน, ต้อ กะน้าย ต้าย ฝ่ง ห่อ ปั๊ว เหฒี่ย ปุน เฒี้ยว, ไม้ กุ๊น เหว่ย จ๊าว ซูง แล์ง เญย แหง่ง หว่า ไฟ ธ้วด ฟิม ฝ่ง ห่อ เหฒี่ย,

19อ๋อย หฒุ ต้อ เต้า ไม้ หว่าย ฝัง เญย ง่ง โก๊ว ไฟ ปะกี ยู่ง โก๊ว ไฟ ยู่ง โก๊ว, เฒี้ยว หธีง ต้าย ฒิบ.

20ไม้ ตู๋ง ต้อ หาย หญู่ง หว่าย ฝัง เญย, เหว่ย หฒุ เฒี้ยว ไม้ ฒิบ เม่ย บัว เญย.

21หาย เต้า ต้อ เยียม ง่ง กวั้น, ยู่ง กวั้น ไฟ ปะกี ยู่ง กวั้น เญย แซง-คู้ ต้าย เหฒี่ย ปุน เฒี้ยว เหว่ย จิว ทง, ไฟ จ๊าว ซูง แล์ง เญย แหง่ง หว่า, ไฟ ธ้วด ฟิม ฝ่ง ห่อ, อ๋อย หฒุ ต้อ ไม้ หว่าย ฝัง หย่า ไม้ ม่าย ต๋อง เฆ่ม เญย แซง-คู้, เฒี้ยว หธีง ต้าย ฒิบ.

22ไม้ ตู๋ง ต้อ มฒีง แม่ง เญย, หฒุ มุน เซียง เญย, ปั์ว-เหฒา หว่าย เญย, ม่าย กะน้าย เหลี่ยว ธ้วด เญย, ปุ๊ด ฟาง ปุ๊ด หลาย เญย แซง-คู้ ฝ่ง ห่อ ปุน เฒี้ยว. ไม้ ตู๋ง เฒาะ น้าย เต๋ย หาย หญู่ง อัน เหฒี่ย-ต้อง หล่ง โต์ว ปั๊ว เหฒี่ย ฝ่ง ห่อ ปุน เฒี้ยว.

23สี ก๊อง ต้อ เฒี่ยง ต้าย หว่าย เต๋ย ฝัง ไฟ ญั้น เญย ง่ง ไฟ ปะกี ยู่ง ตอน ธ้วด ฟิม เหฒี่ย ตุ๊ เญย. มป่า สี ก๊อง เหฒี่ย เหว่ย จ๊าว ซูง แล์ง เญย แหง่ง หว่า, เฒี้ยว ไม้ ฒิบ.

24ไม้ ตู๋ง หล่ง ไจ๋-ดุ้ย ฝาว ฑย้าม เญย, ไฟ ดี้ง เญย, ไฟ กะน้าย เป๊ด หฒุ เญย, ไฟ ผาย ไจ๋-ดุ้ย เญย แซง-คู้ ฝ่ง ห่อ ปุน เฒี้ยว. เยียม เม่ย บัว เญย เต่ย-ปูง ไม้ ตู๋ง ฮนั้ง น้าย โหฒว.

25หย่า ไม้ ตู๋ง หล่ง เยียม จั๋น ตุ๊ ต้าย เญย น้าย ปั๊วะ แซง-คู้ ฝ่ง ห่อ โหฒว เม่ย บัว เญย ทิน-ฮู่ง เญย หญั่น ฮบ. น้าย หญู่ง แซง-คู้ หว่าย ฝัง, ม่าย ต๋อง เฆ่ม เญย, เฒี้ยว ฯฒฯ ไม้ ฒิบ.’”

26เฒี้ยว ก๊อง บั๋ว โมเซ,

27“ง่ง ไฟ ปะกี ยู่ง ไฟ ยู่ง หาย หฒั่น เหฌี่ย ตอน ต้าย, ตอน อ๋อย หฒุ เหธา มา เยียม เสี่ย ฮนอย. เยียม ตะเป๊ด ฮนอย ฝาว แหมง โหฒว เหฒี่ย เญย กะน้าย ตุ๊ เญย, หล่ง โต์ว ปั๊ว เหฒี่ย ฝ่ง ห่อ ปุน เฒี้ยว, เฒี้ยว อะเฮน้ย ฒิบ.

28ไม้ กุ๊น ง่ง เญ์ย ไฟ ปะกี ยู่ง เญ์ย, ไม้ ตู๋ง เหธา นิ่น เญย ตอน ต้ง ฮนอย ไต๋.

29“ต้อ กะน้าย มี่ง เหฒี่ย เหว่ย แล์ง ฒี่ง เฒี้ยว, อ๋อย หฒุ โหฒว หอบ เล์ย เหว่ย ปุน เฒี้ยว อะเฮน้ย.

30ต้ง วั้ว ฮนอย อ๋อย หฒุ หญั่น เถา เหฑ่ง, ไม้ ตู๋ง เลี่ยว เหยียด เต๋ย เถา ตะเหญ่ย ดอม. เยีย เซ เฒี้ยว.

31“เม่ย บัว อ๋อย หฒุ กัน หลง เยีย บั๋ว เญย หว่า หย่า เอย เจี๊ยน โหฒว. เยีย เซ เฒี้ยว.

32ไม้ ตู๋ง ป่าย เยีย เญย ธีง-เหฑ่ง บั๋ว. เยียม อิสะลาเอน เมี่ยน บุด๋ง อ๋อย หฒุ ท่าย เยีย ธีง-เหฑ่ง. เยีย เซ เฒี้ยว, ต้ง ปุน เม่ย บัว ธีง-เหฑ่ง

33หย่า ต้อ เม่ย บัว เยียม อียิบ เต่ย-ปูง ธ้วด ต้าย เหว่ย โหฒว เม่ย บัว เญย ทิน-ฮู่ง วั้ว เต้า. เยีย เซ เฒี้ยว. ”

← Chapter 21 Jump to: Chapter 23 →