Amos 1

Kamba (Mbivilia) 1956

Jump to: Chapter 2 →

1Ndeto sya Amosi, ũla waĩ katĩ wa aĩthi ma Tekoa, ila wonie ũndũ wa Isilaeli mĩthenya ya Usia mũsumbĩ wa Yuta, na mĩthenya ya Yelovoamu mwana wa Yoasi mũsumbĩ wa Isilaeli, myaka ĩlĩ mbee wa kĩla kĩtetemo kya nthĩ.

2Na asya, Yeova akaluma e Saioni, na kumĩlĩlya wasya wake e Yelusaleme; na isesi sya aĩthi ikameta, na mũthya wa kĩĩma kya Kalimeli ũkooma.

3Ũũ nĩw’o Yeova ũnũkwasya: Nũndũ wa mavĩtyo atatũ ma Ndamasiku, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa nĩmavũĩte Ngileati na ivũi sya kĩaa.

4Ĩndĩ ngaete mwaki nyũmbanĩ ya Aasaeli, na ũkamina nyũmba nene mbanakavye sya Mbeni‐aatati.

5Na ngatũlan’ya kĩvingi kya Ndamasiku, na kũmũveta ũla ũtwĩe mwandanĩ wa Aveni, na ũla ũkwete ndata ya ũsumbĩ kuma nyũmbanĩ ya Eteni; na andũ ma Silia makaenda me atave kũvika Kili, easya ũu Yeova.

6Ũũ nĩw’o Yeova ũnũkwasya: Nũndũ wa mavĩtyo atatũ ma Ngasa, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa nĩmatavie mbaĩ nima, nĩ kana mamanengane kwa Etomu.

7Ĩndĩ ngaete mwaki ĩũlũ wa ũvai wa Ngasa, na ũkamina nyũmba nene mbanakavye syayo.

8Na ngamũveta ũla ũtwĩe Asitoti, na ũla ũkwete ndata ya ũsumbĩ Asikeloni; na ngathyũũĩa Ekiloni kw’oko kwakwa; na ũtialo wa Avilisiti ũkaa, easya ũu Mwĩaĩi Yeova.

9Ũũ nĩw’o Yeova ũnũkwasya: Nũndũ wa mavĩtyo atatũ ma Tile, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa manenganie mbaĩ nima kwa Etomu, na matyaalilikana ũtianĩo wa ana‐a‐ĩthe.

10Ĩndĩ ngaete mwaki ĩũlũ wa ũvai wa Tile, na ũkamina nyũmba nene mbanakavye syayo.

11Ũũ nĩw’o Yeova ũnũkwasya: Nũndũ wa mavĩtyo atatũ ma Etomu, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa amũatĩĩe mwana‐a‐ĩthe e na ũvyũ, na avetete ĩnee yonthe, na ũthatu wake watembũangaa mavinda onthe, na nĩwekalaa na ũthatu wake ĩndĩ yonthe.

12Ĩndĩ ngaete mwaki ĩũlũ wa Temani, na ũkamina nyũmba nene mbanakavye sya Mbosila.

13Ũũ nĩw’o Yeova ũnũkwasya: Nũndũ wa mavĩtyo atatũ ma ana ma Amimoni, ĩĩ, nũndũ wa ana, ndikathyũũa ũsilĩlo wayo; nĩkwĩthĩwa mamataũie aka me aito ma Ngileati, nĩ kana makũĩĩsye mĩvaka yoo.

14Ĩndĩ ngakwatya mwaki ũvainĩ wa Lava, na ũkamina nyũmba nene mbanakavye syayo, vamwe na kua mbu mũthenya wa kaũ, na kĩuutani mũthenya wa kĩlingĩ;

15na mũsumbĩ woo akaenda e mũtave, we vamwe na anene make me mbee ũsumbĩnĩ, easya ũu Yeova.

Jump to: Chapter 2 →