Amos 4

Kamba (Mbivilia) 1956

← Chapter 3 Jump to: Chapter 5 →

1Ĩw’ai ndeto ĩno, inyw’ĩ ng’ombe nga sya Mbasani, ila syĩ kĩĩmanĩ kya Samalia, ila ithĩnasya ngya, na kũvinyĩĩa athĩni, ila syĩaa eaĩi masyo, Etei, tũnyw’e.

2Mwĩaĩi Yeova nĩwĩvĩtĩte na ũtheu wake, sisyai, mĩthenya nĩkamũkĩa, ĩla makamũtwaa na mboloi, na ũtialo wenyu na ngolya sya ũkwatya makũyũ.

3Nenyu nĩmũkaumaalĩla vala ve movũthũe, kĩla ũmwe aeleele mbee wake; na mũkeeyĩkya inyw’ĩ ene Alimoni, easya ũu Yeova.

4Ũkai Mbethi‐eli, mũvĩtye; ũkai Ngilikali, mwongeleele mavĩtyo; na etei nthembo syenyu kĩla kĩoko, na ilungu syenyu sya ĩkũmi ĩtina wa kĩla mĩthenya ĩtatũ;

5na thembai nthembo ya mũvea ya kĩla kĩkĩĩtwe ĩlawa, na tavan’yai na kũnyaĩĩkya ũvoo wa nthembo sya kumya na ngoo ya kwenda: nũndũ ũu nũmwendeeasya, inyw’ĩ ana ma Isilaeli, easya ũu Mwĩaĩi Yeova.

6O na ĩngĩ nakwa nĩnĩmũnengete maeo momũ ndũanĩ syenyu syonthe, na kwaĩwa nĩ kĩmũtũ kũndũ kwenyu kw’onthe; ĩndĩ mũtinzyokeete, easya ũu Yeova.

7O na ĩngĩ nakwa nĩnĩmĩsiĩĩe mbua ndĩkaue kwenyu, yĩla vatiele myei ĩtatũ kũvikĩa ngetha; na namyusya ndũanĩ ĩmwe, na natuma ĩtaua ndũanĩ ĩngĩ: kĩlungu kĩmwe nĩkyauie, na kĩlungu kĩla kĩtaaua kyooma.

8Na ĩndĩ ndũa ilĩ kana itatũ syanganga syathi ndũanĩ ĩmwe inyw’e kĩw’ũ, na ityaalaũka; ĩndĩ mũtinzyokeete, easya ũu Yeova.

9Nĩnĩmũkũnĩte na wũmanĩlu na mbuka: wingĩ wa mĩũnda yenyu na mĩũnda yenyu ya mĩsavivũ na mĩkũyũ yenyu na mĩthata yenyu kĩtĩlĩ nĩkĩminĩte: ĩndĩ mũtinzyokeete, easya ũu Yeova.

10Nĩnĩetete katĩ wenyu mũimũ o ta mũthemba ũla wa Misili: anake menyu nĩnĩmoaĩte na ũvyũ, na nĩndwaĩte mbalasi syenyu; na nĩndumĩte mũnyungo mũthũku wa mwakonĩ wa maeema wenyu wambata o na manyiũũnĩ menyu: ĩndĩ mũtinzyokeete, easya ũu Yeova.

11Nĩnĩng’uthũlangĩte ndũa katĩ wenyu, o ta yĩla Ngai wang’uthũlangile Sotomo na Ngomola, na mwailyĩ kĩsinga kĩvulĩtw’e yekethenĩ: ĩndĩ mũtinzyokeete, easya ũu Yeova.

12Kwondũ wa ũu ngakwĩka ũu, we Isilaeli; na nĩkwĩthĩwa ngakwĩka ũu, ĩyũmban’ye kũkomana na Ngai waku, we Isilaeli.

13Nũndũ, sisya, ũsu wũmbaa iĩma, na wũmba kĩseve, na aivuanĩsya mũndũ ũla wĩ kĩlilikanonĩ kyake; ũla ũtusaa kĩoko kĩvindu, na kũkinyangaa kũndũ kũtũlu kwa nthĩ — Yeova, Ngai wa nguthu, nĩyo syĩtwa yake.

← Chapter 3 Jump to: Chapter 5 →