Amos 9

Kamba (Mbivilia) 1956

← Chapter 8 Jump to:

1Noonie Mwĩaĩi aũngeme ũtee wa kĩthembeo: na asya, Kũna mĩthya ya ituĩ, nĩ kana myalyo ya mĩomo ĩthingithe; noimĩtilangĩla ilungu mĩtwenĩ yoo yonthe; na ngooaa ũtialo woo na ũvyũ: vati ũmwe wamo ũkakĩa, na vati ũmwe wamo ũkavonoka.

2O na makenza kũvika Seoli, kw’oko kwakwa kũkamaumya o vo; o na makambata ĩtunĩ, ngamatũnga nthĩ kuma vo.

3O na makeevitha ene kĩĩmanĩ kya Kalimeli ĩũlũ, ngamantha na kũmaumya o vo; o na me avithe kyũngũnĩ kya ũkanga ndikamone, o vo ngeeaĩa nzoka, na ĩkamaũma.

4O na makaenda mbee wa amaitha moo me atave, o vo ngeeaĩa ũvyũ, na ũkamoaa: na ngamaketeea na metho makwa nĩmeke naĩ, na ndimeka nesa.

5Nũndũ Mwĩaĩi, Yeova wa nguthu, nĩwe ũla ũkiitaa nthĩ na ĩkĩtweka, na onthe ala mamĩtwĩe makameta; na ĩkookĩla vyũ ta ũla Ũsĩ, na ĩkalika ĩngĩ, ta Ũsĩ wa Misili;

6nĩwe ũla wakaa nyũmba syake matunĩ, na kũlũlũmĩlya mwambĩlĩlyo wa ũtũo wake nthĩ; ũla wĩtaa manzĩ ma ũkanga moke, na akĩmatulũla ĩũlũ wa nthĩ; Yeova nĩyo syĩtwa yake.

7Inyw’ĩ mũi ta ana ma Aethiovia kwakwa, inyw’ĩ ana ma Isilaeli? Ekũlya ũu Yeova. Ndyaambatya Isilaeli kuma nthĩ ya Misili, na Avilisiti kuma Kavitoli, na Asilia kuma Kili?

8Sisyai, metho ma Mwĩaĩi Yeova me ĩũlũ wa ũsumbĩ mwathe, na ngawananga kuma ĩũlũ wa nthĩ; ate o ndikamyananga vyũ nyũmba ya Yakovo, easya ũu Yeova.

9Nũndũ, sisyai, ngeeaĩa, na ngathũngũthangĩsya nyũmba ya Isilaeli katĩ wa mbaĩ syonthe, tondũ lĩu wa mbaa ngetha ũthũngũthangaw’a kĩsunginĩ, ĩndĩ kũikavalũka kaveke kamwe nthĩ.

10Athe onthe na andũ makwa makooawa na ũvyũ, ala maasya, Ũla ũthũku ndũkatũkwata, o na kũkomana naitũ.

11Mũthenya ũsu ngaũngamya wĩkalo wa Ndaviti ũla mũvalũku, na kũlinda mawatũe maw’o; na ngatũngĩĩa kũla waombokie, na ngootũngĩĩa o tondũ watilyĩ mĩthenya ya tene;

12nĩ kana mamesye ũtialo wa Etomu, na mbaĩ syonthe ila syĩtanĩaw’a na syĩtwa yakwa, easya ũu Yeova ũla wĩkaa ũu.

13Sisyai, mĩthenya nĩyũkĩte, yĩla mũĩmi wĩkwata mũkethi, na mũangi wa nzavivũ wĩkwata ũla ũvuĩaa mbeũ, easya ũu Yeova; na iĩma ikalovotangya mbinyu ĩ mũyo, na tũlĩma tw’onthe tũkatweka.

14Na ngatũnga andũ makwa Isilaeli kuma kũtavwanĩ, na makatũngĩĩa ndũa ila syaĩ maanzo, na kwitũaa; na makavanda mĩũnda mĩsavivũ, na kũnyusaa mbinyu yayo; o na makaseũvya mĩũnda, na kũĩsaa ũsyao wayo.

15Na ngamavanda nthĩ yoo, na maikakũwa nthĩ yoo ĩngĩ ĩla nĩmanengete, easya ũu Yeova Ngai waku.

← Chapter 8 Jump to: