Amos 7

Kamba (Mbivilia) 1956

← Chapter 6 Jump to: Chapter 8 →

1Ũũ nĩw’o Mwĩaĩi Yeova wambonisye: na, sisya, oombie ngie mwambĩlĩlyonĩ wa kũthongooa kwa ĩthongooa ya ĩtina; na, sisya, ĩthongooa yĩu ya ĩtina yaĩ ĩtina wa mũsumbĩ eengethya nyeki sya ũĩthyo.

2Na kweethĩwa, yĩla syaminũkĩlye kũya nyeki sya nthĩ, nĩvo naisye, Ame Mwĩaĩi Yeova, ekea, nĩngũkwĩsũva: Yakovo akaũngama ata? Nũndũ nĩ mũnini.

3Yeova eetũnga ũndũ wa ũu: Ũũ ndũkethĩwa, easya ũu Yeova.

4Ũũ nĩw’o Mwĩaĩi Yeova wambonisye: na, sisya, Mwĩaĩi Yeova eetie mokĩlan’yo ma mwaki; na wamina ala manzĩ ma syũngũ nene, na waĩ ũtonya kũya ĩ nthĩ.

5Nĩvo naisye, Ame Mwĩaĩi Yeova, eka, nĩngũkwĩsũva: Yakovo akaũngama ata? Nũndũ nĩ mũnini.

6Yeova eetũnga ũndũ wa ũu: O na ũũ ndũkethĩwa, easya ũu Yeova.

7Ũũ nĩw’o wambonisye: na, sisya, Mwĩaĩi aũngama ũtee wa wako wakĩtwe wĩ mũthime na kavilũ, e na kavilũ kw’okonĩ kwake.

8Na Yeova angũlya, Amosi, wĩona kyaũ? Nakwa nasya, Nĩ kavilũ. Nĩvo Mwĩaĩi waisye, Sisya, nĩngwia kavilũ katĩ wa andũ makwa Isilaeli; ndikamavĩta ĩngĩ o na ĩndĩĩ;

9na kũla kũndũ kũtũlu kwa Isaka kũkeethĩwa kũthei, na kũla kũndũ kũtheu kwa Isilaeli kũkaanangwa; na ngookĩlĩla nyũmba ya Yelovoamu na ũvyũ.

10Nĩvo Amasia mũthembi wa Mbethi‐eli watũmanie kwa Yelovoamu mũsumbĩ wa Isilaeli, akĩmwĩa, Amosi nũkũsamĩĩte katĩ wa nyũmba ya Isilaeli: nthĩ nĩemetwe nĩ kũmĩĩsya ndeto syake syonthe.

11Nũndũ Amosi aasya atĩĩ, Yelovoamu akooawa na ũvyũ, na vate ndĩi Isilaeli akatavwa kumw’a nthĩ yake.

12Na ĩngĩ Amasia amwĩa Amosi, We mwoni, kĩa, ũthi nthĩ ya Yuta, na ũkĩaa kĩmũtũ kw’o, na kwathanĩaa kw’o:

13ĩndĩ ndũkathanĩe ĩngĩ o na ĩndĩĩ vaa Mbethi‐eli; nũndũ nĩ vala vandũ vatheu va mũsumbĩ, na nĩ nyũmba ya kĩũsumbĩ.

14Nĩvo Amosi wasũngĩie, na amwĩa Amasia, Ndyaĩ mwathani, o na ndyaĩ mwana wa mwathani; ĩndĩ naĩ mũĩthi, na mũsĩvĩi wa mĩkũyũ:

15na Yeova ambosa ngĩĩthya ndĩthya sya mbũi na malondu, na Yeova ambĩa, Enda, wathane andũnĩ makwa ma Isilaeli.

16Na yu kwondũ wa ũu ĩw’a ndeto ya Yeova: We wĩmbĩa, Ndũkathanĩe Isilaeli, na ndũkaneenee nyũmba ya Isaka ndeto yaku;

17kwondũ wa ũu Yeova easya atĩĩ: Kĩveti kyaku kĩkeethĩwa ĩlwaya ndũanĩ, na ana maku na eĩtu maku makavalũkw’a na ũvyũ, na nthĩ yaku ĩkaaanw’a na ũlii wa kũthima; naku mwene ũkakw’ĩa nthĩ mbuku, na Isilaeli vate ndĩi kũtavwa aumw’e nthĩ yake.

← Chapter 6 Jump to: Chapter 8 →