Amos 3

Kamba (Mbivilia) 1956

← Chapter 2 Jump to: Chapter 4 →

1Ĩw’ai ndeto ĩno ĩla Yeova ũneenete ĩũlũ wenyu, inyw’ĩ ana ma Isilaeli, ĩũlũ wa mũvĩa mũima ũla nambatisye kuma nthĩ ya Misili, ngyasya,

2No inyw’ĩ nĩsĩ katĩ wa mĩvĩa yonthe ya nthĩ: kwondũ wa ũu ngamũsilĩlaa ũndũ wa mothũku menyu onthe.

3Elĩ makaendan’ya vamwe, matew’anĩte?

4Mũnyambũ ũkaluma kĩthekanĩ yĩla ũtakwatĩte? Mũnyambũ wa mũika ũkakoomea kĩsumonĩ kyaw’o, ethĩwa ndũkwete kĩndũ?

5Nyũnyi nĩtonya kũkwatw’a nĩ kĩtei ĩũlũ wa nthĩ, vala ĩtaseũvĩw’e kĩtei? Kĩtei kĩkavyanyũka nthĩ, kĩtakwatĩtye kĩndũ nongi?

6Soo ũkavuvĩwa ndũanĩ, na andũ mailea ũkĩa? Ũthũku ũkakwata ndũa, na ti Yeova ũwĩkĩte?

7Nĩ w’o, Mwĩaĩi Yeova ndakeka ũndũ, ateũvuanĩsya athũkũmi make athani nzama yake.

8Mũnyambũ nũminĩte kũluma; nũũ ũteĩw’a w’ĩa? Mwĩaĩi Yeova nũneenete; nũũ ĩndĩ ũtonya kũlea kwathana?

9Nyaĩĩkyai ũvoo nyũmbanĩ nene mbanakavye vu Asitoti, na nyũmbanĩ nene mbanakavye nthĩ ya Misili, na kwasya, Ũmbanĩai iĩmanĩ sya Samalia, na mũisisya ũndũ inenevete ituu ila syĩ vo nthĩnĩ, na ũndũ mathĩna manenevete katĩ wasyo.

10Nũndũ matyĩsĩ kwĩka w’o, easya Yeova, ala meyiĩaa ũng’endu na ũvutani nyũmbanĩ nene syoo mbanakavye.

11Kwondũ wa ũu Mwĩaĩi Yeova easya atĩĩ: Kũkeethĩwa mũmaitha, o na kũthyũlũlũka ĩ nthĩ; na akavalũkya vinya waku nthĩ wume kwaku, na nyũmba syaku nene mbanakavye ikeethĩwa syĩ ndave.

12Ũũ nĩw’o Yeova ũnũkwasya: O tondũ mũĩthi ũvonokanasya maũũ elĩ kuma kanyw’anĩ wa mũnyambũ, kana kĩlungu kya kũtũ, o ta ũu ana ma Isilaeli makavonokanw’a mekalaa Samalia kĩkotonĩ kya ũkomo, na ĩũlũ wa mĩto ya alili ya ũkomo.

13Ĩw’ai inyw’ĩ, na kũsĩĩai nyũmba ya Yakovo, easya ũu Mwĩaĩi Yeova, Ngai wa nguthu.

14Nũndũ mũthenya ũla nĩsilĩla Isilaeli ũndũ wa mavĩtyo make, ngasilĩla ithembeo sya Mbethi‐eli nasyo; na mbya sya kĩthembeo ikatilwa, na kũvalũka nthĩ.

15Na ngakũna nyũmba ya ĩvinda ya mbevo vamwe na nyũmba ya ĩvinda ya syũa; na nyũmba iseũvĩtw’e na maeo ma nzou ikaanangĩka, na nyũmba ila nene ikathela, easya ũu Yeova.

← Chapter 2 Jump to: Chapter 4 →