Amos 6

Kamba (Mbivilia) 1956

← Chapter 5 Jump to: Chapter 7 →

1Woo nĩ wa ala methũmũĩtye Saioni, na wa ala mekalĩte meyelele kĩĩmanĩ kya Samalia, andũ me na nguma ma mbaĩ ĩla yĩ na ũnene, ala nyũmba ya Isilaeli ĩendaa kwoo!

2Vĩtai mũende Kalene, na mũisisya; na kuma vo endai Amathi ĩla nene; na ĩndĩ theeai Ngathi ya Avilisiti: me kavaa kwĩ mosumbĩ asu? Kana mũvaka wamo nĩ mũnene kwĩ mũvaka wenyu?

3Inyw’ĩ ala mũtwaangaa mũthenya Mũthũku kũasa, na kũtuma wĩkalo wa ũng’endu ũthengeea;

4ala makomaa mokomonĩ ma maeo ma nzou, na kwĩkooteaa mokomonĩ moo, na kũĩsaa tũtena twa malondu maumĩtye ndĩthyanĩ, na tũsaũ maumĩtye kĩtũũnĩ;

5ala mainaa mbathi sya mana na wasya wa kananda; ala meyambĩlĩlĩasya syĩndũ sya kũinga, o ta Ndaviti;

6na ala manywĩaa mbinyu mbakũlinĩ, na kwĩvaka ene mauta ala maseo mbee; ĩndĩ ĩndĩ mati na woo nũndũ wa thĩna wa Yosevu.

7Kwondũ wa ũu yu makaenda me atave vamwe na ala metavwa mbee; na kĩsekele kya ala meekootaa kĩkathela.

8Mwĩaĩi Yeova nĩwevĩtie nake mwene, easya ũu Yeova, Ngai wa nguthu: Nĩngũthĩtha ũnene wa Yakovo, na nĩngũmena nyũmba nene syake mbanakavye; kwondũ wa ũu nganengane ĩ ndũa na syonthe ila syĩ nthĩnĩ wayo.

9Na kũkeethĩwa, ethĩwa vakatiala andũ ĩkũmi nyũmbanĩ ĩmwe, makakw’a.

10Na yĩla mwendw’a‐ĩthe wa mũndũ ũla mũkw’u wĩũkĩlya ĩ kimba, aumye mavĩndĩ nyũmbanĩ, o ũsu wĩkĩvĩvya, na akakũlya ũla wĩ kũndũ kwĩ nthĩnĩ kwa nyũmba, Ve o ũmwe wĩ naku? Nake akasũngĩa, Aiee; nĩvo ĩndĩ wĩasya, Kilya ki; nũndũ tũtitonya kũweta syĩtwa ya Yeova.

11Nũndũ, sisya, Yeova nĩwaĩaĩte, na nyũmba ĩla nene ĩkakũnwa ĩye mawatũe, na nyũmba ĩla nini ĩye mawatũku.

12Mbalasi ikasembela ĩvianĩ? Ve ũmwe wĩĩma vo na ng’ombe? Ũndũ inyw’ĩ mũalyũlĩte ũsili wa katĩ ũtw’ĩke nyongo, na ũsyao wa ũlũngalu ũtw’ĩke kĩndũ kĩ ũũ;

13inyw’ĩ ala mũtanĩaa ũndũ wa mana, na kwasya, Tũtyĩyoseete mbya na vinya witũ ene?

14Nũndũ, sisyai, ngamũkĩlĩlya mbaĩ, inyw’ĩ nyũmba ya Isilaeli, easya ũu Yeova, Ngai wa nguthu; na makamũthĩn’ya kuma ũlikĩlonĩ wa Amathi kũvika kalũsĩ ke Alava.

← Chapter 5 Jump to: Chapter 7 →