Amos 5

Kamba (Mbivilia) 1956

← Chapter 4 Jump to: Chapter 6 →

1Ĩw’ai, inyw’ĩ, ndeto ĩno ĩla ngũneena ĩtw’ĩke kĩĩo kya kũmũĩĩa, inyw’ĩ nyũmba ya Isilaeli.

2Mwĩĩtu mũtheu wa Isilaeli nũvalũkĩte; ndakokĩla ĩngĩ: nĩwĩkĩtw’e nthĩ ĩũlũ wa nthĩ yake; vai ũmwe wa kũmũkĩlya.

3Nũndũ ũũ nĩw’o Mwĩaĩi Yeova ũnũkwasya: Ndũa ĩla yaumaalile me ngili ĩkatiala ĩana, na ĩla yaumaalile me ĩana ĩkatiala ĩkũmi, ma nyũmba ya Isilaeli.

4Nũndũ Yeova etavya nyũmba ya Isilaeli atĩĩ, Manthai nyie, na mũkeethĩwa thayũ;

5ĩndĩ mũikamanthe Mbethi‐eli, o na mũikalike Ngilikali, na mũikavĩte mũthi Mbeeli‐sieva: nũndũ vate ndĩi Ngilikali ĩkaenda yĩ ndave, na Mbethi‐eli ĩkatw’ĩka mana.

6Manthai Yeova, na mũkeethĩwa thayũ; ndakese kwakana ta mwaki nyũmbanĩ ya Yosevu, na kũmĩmina, na kũtikethĩwa wa kũvosya nthĩnĩ wa Mbethi‐eli.

7Inyw’ĩ ala mũalyũlaa ũsili wa katĩ wĩthĩwe kĩndũ kĩ ũũ, na kwĩkya ũlũngalu nthĩ,

8mũmanthei ũla ũseũvĩtye Kĩeemea na Olioni, na kũalyũla kyuu kya kĩkw’ũ kĩthĩwe kĩoko, na kũtw’ĩkĩthya mũthenya kĩvindu kwondũ wa kũtuka; ũla wĩtaa manzĩ ma ũkanga moke, na aimatulũla ĩũlũ wa nthĩ (Yeova nĩyo syĩtwa yake);

9ũla ũetae wanangĩko wa kĩthũlũmũko ĩũlũ wa ala me na vinya, na kwondũ wa ũu wanangĩko nĩwũkĩaa ngome.

10Nĩnamũmenaa ũla ũmakanĩasya mbingĩlonĩ, na kũmũthĩtha mũno ũla ũneenaa w’o.

11Nĩkwĩthĩwa ĩndĩ mũkinyangaa ũla ngya, na kũmumĩthya nganũ na vinya: nĩmwakĩte nyũmba sya mavia masũvye, ĩndĩ mũikatũa nthĩnĩ wasyo; nĩmũvandĩte mĩũnda ya mĩsavivũ mĩseo, ĩndĩ mũikanyw’a mbinyu yayo.

12Nũndũ nĩnĩsĩ mavĩtyo menyu ũndũ maingĩvĩte, na naĩ syenyu ũndũ inenevete — inyw’ĩ ala mũthĩnasya alũngalu, na kwosa ĩvaki, na kwathũkya athĩni ala me mbingĩlonĩ matikose kĩla kyoo.

13Kwondũ wa ũu ũla wĩ kĩlĩko akakilya ĩvinda ta yĩu; nũndũ nĩ ĩvinda ĩthũku.

14Manthai ũseo, na ti ũthũku, nĩ kana mwĩthĩwe thayũ; na ĩndĩ Yeova, Ngai wa nguthu, akeethĩwa nenyu, o tondũ mwaasya.

15Menai ũla ũthũku, na mũkyenda ũla ũseo, na kũlũlũmĩlya ũsili wa katĩ mbingĩlonĩ: nokwĩthĩwa Yeova, Ngai wa nguthu, eĩka ũtialo wa Yosevu nesa.

16Kwondũ wa ũu Yeova, Ngai wa nguthu, Mwĩaĩi, easya atĩĩ: Kĩĩo kĩkeethĩwa nzĩanĩ nthanthau syonthe; na makaĩĩaa nzĩanĩ nene syonthe, Ĩiaa! Ĩiaa! Na makeeta mũĩmi kĩmetonĩ, na ala ai kũĩanĩ maĩe.

17Na mĩũndanĩ yonthe ya mĩsavivũ kũkeethĩwa kĩĩo; nũndũ ngavĩtĩla katĩ waku, easya ũu Yeova.

18Woo nĩ wenyu ala mwendaa mũthenya ũsu wa Yeova! Nĩ ũndũ wa kĩ mũkwenda kwĩthĩwa na mũthenya wa Yeova? Nĩ kĩvindu, na ti kyeni.

19No ta kethĩwa mũndũ akakĩa mũnyambũ, na nduva ĩkakomana nake; kana akĩenda nyũmba na kwaĩĩsya kw’oko kwake wakonĩ, na nzoka ĩkĩmũũma.

20Mũthenya ũsu wa Yeova ndũkethĩwa kĩvindu, na ti kyeni? O kĩvindu kĩnene, na vate ũtisu nthĩnĩ waw’o?

21Nĩngũmena, nĩngũvũthya mboka syenyu, o na nditanaw’a nĩ maũmbano menyu makilĩtye.

22Ĩĩ, o na mwanthembea nthembo syenyu sya kũvĩvw’a na nthembo sya mũtu, ndikasyĩtĩkĩla; o na ndikasyĩtĩkĩla nthembo sya mũuo sya indo syenyu nou.

23Veta wasya wa mbathi syaku vala nĩĩ; nũndũ ndikew’a wasya wa tũnanda twaku.

24Ĩndĩ ũsili wa katĩ ũtheee ta manzĩ, na ũlũngalu ta ũsĩ mũnene.

25Mwaandetee nthembo sya kũtonywa na nthembo sya mũtu weũnĩ myaka mĩongo ĩna, inyw’ĩ nyũmba ya Isilaeli?

26Ĩĩ, nĩmwakuie kakalũ ka mũsumbĩ wenyu na kakalũ ka mĩvw’anano yenyu, ndata ya ngai yenyu, ila mweeseũvĩsye ene.

27Kwondũ wa ũu ngatuma mũenda mwĩ atave mbee wa Ndamasiku, easya ũu Yeova, ũla syĩtwa yake nĩ Ngai wa nguthu.

← Chapter 4 Jump to: Chapter 6 →